تويعا زاڭ جۇزىندە رەفورما جاسالۋى كەرەك. "توي سالىعى", "توي ينسپەكتورى" تاجىريبەسىن ەنگىزسە ارتىق ەمەس.

وتىز جىلدا سول تويعا كيىپ باراتىن ەڭ قۇرىعاندا ناسكي مەن ءتۇرسيدىڭ ءوزىن وندىرمەپپىز. ەرمەك تۇرسىنوۆ ايتپاقشى، بار بىتىرگەنىمىز تويحانا مەن بازار سالدىق. شىنايى قۋانىشتان گورى، "جالپاق شەشەي" جاعىنۋ، بەرگىسى بولماشى باسەكە، ارعىسى استىرتىن تابىس كوزىنە اينالدى. سەكەڭدەگەن ارتىستەردىڭ باعىنا، ءسىڭىرى شىققان كەدەيدىڭ سورىنا، قۇتىرعان بايدىڭ ەرمەگىنە اينالعانى سونشالىق، ء"يتىمىز كۇشىكتەسە" دە سۇيىنشىلەيتىن بولدىق. قينالىپ كومەك سۇراعان ادامعا 1000 تەڭگەنى ارەڭ قيامىز، ايدالاداعى بىرەۋ تويعا شاقىرسا كەمىندە 10 000 تەڭگە الىپ شاپقىلايمىز. ءتىپتى، اقشاڭ بولماسا قارىز سۇراپ بارۋ قالىپتى قۇبىلىسقا اينالدى. قۇنىققان ءارتىستىڭ ءبارى "قازاقتىڭ تويى بىتپەسىن", دەگەن ۇراندى قىلقىلداۋىن قويار ەمەس.

ەلدى ەڭبەككە ەمەس، ەسىرۋگە شاقىراتىن اندەر ساعات سايىن تاراپ جاتىر. ونىڭ ءوزى وزىمىزدىكى ەمەس قوي وكىنىشتىسى. وزبەك پەن قىرعىزدان ۇرلاپ ءان ايتقان ءانشىنىڭ ءبارىن "ارام تاماق" دەپ تانۋ كەرەك. قازىرگى ءاننىڭ 99 پايىزى تويسكي. حالىقتى جۇمىسقا شاقىراتىن "قىرمانعا كەل قالقاتايدان" باسقا ءان جوق-اۋ وسى بىزدە. قولىمىزعا بەس تيىن ارتىق تۇسسە، تامادا مەن ءانشىنىڭ تەلەفونىن ىزدەپ كەتەمىز. ءبىز "سۆەتسكي گوسۋدارستۆومىز" دەپ ۇيالا بەرمەي، وزىمىزگە كەرەعار دۇنيەلەردى زاڭمەن رەتتەپ وتىرۋعا ءتيىسپىز. قىسىلاتىن تۇگى دە جوق، بۇل ماسەلە پارلامەنت دەڭگەيىندە تالقىلانىپ ارنايى زاڭ ازىرلەنۋى ءتيىس. بۇل مىندەت مادەنيەت جانە سپورت مينيسترلىگىنىڭ وڭ جامباسىنا جىعىلىپ جانە سۇرانىپ تۇر.

كارانتين باستالعالى تويحانالاردىڭ يەلەرى كۇن كورىس جوق دەپ ەڭىرەپ جاتىر. ەندى بۇرىنعىداي ەلەرۋ بولا قويماس. ەل ءالى ەسىن تولىق جيعان جوق. كورونۆيرۋسپەن قاتار كەلگەن كريزيستىڭ سوققىسى اۋىر ءتيدى قوعامدىق ساناعا. سوندىقتان، سول ءزاۋلىم تويحانالارىڭدى وندىرىستىك تسەحقا اينالدىرىڭىزدار. اسپازشىلاردى، دايارشىلاردى، ءانشى-تامادالاردى وندىرىسكە بەيىمدەڭىزدەر. اقشاسى اسىپ-تاسىپ، توي سۇراپ كەلگەن ادامدى ىسكە شاقىرىڭىز، سەرىكتەس بولىڭىز!!!

جاسىراتىنى جوق، بۇگىندە قولىنا كۇرەك ۇستاپ جۇمىس ىستەيتىن ادامنان گورى، قالام ۇستاپ جازاتىن ادامدار دا كوبەيىپ كەتتى. سونىڭ ءبىرى وسى جۋرناليست ماماندىعى. قازىر ءوزى تاياق لاقتىرساڭ ءانشى مەن جۋرناليستكە تيەتىن زامان بولدى عوي. بۇل دەگەنىمىز شىرىلداۋىق شەگىركەلەر مەن شاعىپ الار كەسىرتكەلەردىڭ تىم شەكتەن تىس كوبەيىپ كەتكەندىگى.

تويحانالاردىڭ قىزمەتىن توقتاتىپ، ولاردىڭ ءبارىن زاۋىتتارعا، تسەحتارعا، قايتا وڭدەۋشى شارۋاشىلىقتارعا اينالدىرساق ءالى دە كەش ەمەس. توي باققان ەمەس، قوي باققان قازاق كوبەيسىن. ايتپاقشى، وسىدان 11 جىل بۇرىن كەلىنشەگىم ەكەۋمىز تويدى بىرىگىپ جاساعانبىز. ەلۋدە-ەلۋ ەرەجەسىمەن!

ەربول مانديبەكتىڭ الەۋمەتتىك جەلىدەگى جازباسى 

Abai.kz