2020 جىلى 1,2 ميلليوننان استام ادام جۇمىسپەن قامتۋعا جاردەمدەسۋ شارالارىمەن قامتىلادى. بۇل تۋرالى قر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ مالىمدەدى. 

ورتالىق كوممۋنيكاتسيالار قىزمەتىندە ونلاين رەجيمدە وتكەن حالىققا ەسەپ بەرۋ كەزدەسۋى بارىسىندا مينيستر وسى جىلدىڭ ءى-توقسان قورىتىندىسىندا ەكونوميكادا جۇمىسپەن قامتىلعانداردىڭ سانى 8,8 ملن ادامدى، جۇمىسسىزدىق دەڭگەيى 4,8%-دى قۇراعانىن اتاپ ءوتتى. ناۋرىز-ءساۋىر ايلارىندا كارانتيندىك شارالاردىڭ ەنگىزىلۋىنە بايلانىستى 4,2 ميلليون قازاقستاندىق ۋاقىتشا جۇمىستان بوساتىلدى.

«كارانتيندىك شارالاردى جەڭىلدەتۋ ۇستىمىزدەگى جىلدىڭ 20 ساۋىرىندە باستالدى. بۇل كەزەڭ-كەزەڭىمەن جۇمىسقا ورالۋعا مۇمكىندىك بەردى. ۇكىمەت جۇمىسپەن قامتۋعا كوڭىل ءبولىپ، ەكونوميكانى قالپىنا كەلتىرۋ بويىنشا قابىلداپ وتىرعان شارالار وسى جىلدىڭ شىلدە ايىنان باستاپ ەڭبەك نارىعىنداعى جاعدايدى تۇراقتاندىرادى دەپ ەسەپتەيمىز»، - دەدى ءبىرجان نۇرىمبەتوۆ.

ونىڭ اتاپ وتۋىنشە، جىل سوڭىندا كۇتىلەتىن جۇمىسسىزدىق دەڭگەيى 6,1 پايىز بولۋى مۇمكىن. وسى ورايدا، ول وسى جىلى جۇمىسپەن قامتۋعا جاردەمدەسۋ شارالارىنا 1 ميلليون 220 مىڭ ادامدى تارتۋ جوسپارلانىپ وتىرعانىن اتاپ ءوتتى.

«ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسىن ىسكە اسىرۋ اياسىندا – 600 مىڭ ادام، جۇمىسپەن قامتۋدىڭ جول كارتاسى اياسىندا – 255 مىڭ ادام، باسقا مەملەكەتتىك باعدارلامالار بويىنشا 364 مىڭ ادام جۇمىسپەن قامتىلادى»، - دەدى ءبىرجان نۇرىمبەتوۆ.

ءمينيستردىڭ ايتۋىنشا، 1 ماۋسىمداعى جاعداي بويىنشا 224 مىڭنان استام ادام «ەڭبەك» مەملەكەتتىك باعدارلاماسىنا قاتىسىپ، ولاردىڭ 185 مىڭى جۇمىسقا ورنالاستىرىلدى. مەملەكەتتىك قولداۋ شارالارى اياسىندا بوس جۇمىس ورىندارىنا 99 مىڭ ادام، قوعامدىق جۇمىستارعا – 62 مىڭ، الەۋمەتتىك جۇمىس ورىندارىنا – 13 مىڭ، جاستار پراكتيكاسى بويىنشا 11 مىڭ ادام جۇمىسپەن قامتىلدى.

Abai.kz