كوششىلىككە ىڭعايلى بولۋى ءۇشىن مەملەكەتتىك باعدارلامالاردىڭ ورتاق پورتالىن جاساپ، ىسكە قوسۋدامىز. بۇل تۋرالى اقپارات جانە قوعامدىق دامۋ ءمينيسترى ايدا بالاەۆا ءمالىم ەتتى، دەپ حابارلايدى قازاقپارات.

«ماڭىزدى باعىت – حالىققا اقپاراتتى قولجەتىمدى ەتۋ ماسەلەسى. بۇل رەتتە، اقپارات بويىنشا زاڭ جوباسىنا ءبىر بۋما وزگەرىستەر دايىندالىپ قويعان بولاتىن. ولاردىڭ نەگىزگى كوزدەگەن مىندەتتەرى: مەملەكەتتىك ورگانداردىڭ وسى باعىتتاعى قۇزىرەتىن;-ازاماتتاردىڭ اقپاراتقا قولجەتىمدىلىگى تۋرالى پرەزيدەنتكە ەسەپ بەرۋ ماسەلەسىن; ءاربىر مەملەكەتتىك ورگاندا وسى باعىتقا جاۋاپتى قىزمەتكەردى تاعايىنداۋ ماسەلەسىن جانە باسقا دا وزەكتى شارالاردى زاڭ جۇزىندە بەكىتۋ»، - دەدى مينيستر ورتالىق كوممۋنيكاتسيالار قىزمەتىندە ونلاين رەجيمدە وتكەن حالىققا ەسەپ بەرۋ كەزدەسۋى بارىسىندا.

ونىڭ سوزىنە قاراعاندا، حالىقتى شەشىم قابىلداۋ ۇردىستەرىنە تارتۋ ءۇشىن ۆەدومستۆو اكىمدىكتىڭ اشىق مودەلىن جاسادى. قازىردىڭ وزىندە مەملەكەتتىك ورگاندارعا قاراستى كوپتەگەن مەكەمەلەر وسىنداي مودەلمەن جۇمىس جاساپ وتىر. ماسەلەن، 100-دەن اسا ۇيىمدار «اشىق ديالوگ» پورتالىندا ءبىرىنشى باسشىلارىنىڭ بلوگىن اشتى. ءسويتىپ، پورتالدا كوپتەگەن اشىق مالىمەتتەر جاريالانا باستادى.

«تاعى ءبىر اتاپ وتەتىن جايت - قازىر ءبىز جالپاق ەلگە ىڭعايلى بولۋى ءۇشىن مەملەكەتتىك باعدارلامالاردىڭ ورتاق پورتالىن جاساپ، ىسكە قوسۋدامىز. بۇل جەردە ۇكىمەت پەن جەرگىلىكتى ورگاندار جۇزەگە اسىرىپ جاتقان بارلىق باعدارلامالارمەن تۇسىنىكتى ءارى قولجەتىمدى تۇردە تانىسۋعا بولادى. ول دا بولسا ەل-جۇرتتىڭ مەملەكەت پەن قوعامنىڭ ماڭىزدى ماسەلەلەرىنە تىكەلەي ارالاسىپ، تۇبىندە ازاماتتىق قوعامنىڭ وركەنيەتتى دە وسكەن ورتاسىن قالىپتاستىرۋعا قوسىلعان ۇلكەن ۇلەس دەپ بىلەمىن»، - دەدى ا. بالاەۆا.

Abai.kz