ءبىزدىڭ ەلدىڭ اقپارات كەڭىستىگىنە رەسەيلىك باق-تىڭ قاتتى اسەر ەتەتىنى جاسىرىن ەمەس. اسىرەسە بىزدەگى ورىس ءتىلدى باسىلىمدار، تەلەارنالار رەسەيدە جارىق كورگەن ماقالا-ماتەريالداردى، تەلەحابارلاردى، فيلمدەردى ەش سۇزگىدەن وتكىزبەستەن قازاقستاندىقتاردىڭ نازارىنا ۇسىنىپ ءجۇر. بۇل سوزىمىزگە دالەل تابۋ - الەمدەگى ەڭ وڭاي شارۋا شىعار. تەلەديدارىڭىزدى قوسىپ قالساڭىز، قاپتاعان رەسەيلىك تەلە-سەريالدار... ءمان-ماعىناسىنا قارماي ەفيرگە شىعارىپ وتىرمىز. ال رەسەيلىك كوزقاراسپەن جازىلعان ماقالا، زەرتتەۋلەردى ءتۇرلى باسىلىمداردان وپ-وڭاي تاباسىز...

وسى ماسەلە توڭىرەگىندە بەلگىلى جۋرناليست، قوعام قايراتكەرى ارمان شوراەۆ Facebook جەلىسىندەگى جەكە پاراقشاسىندا جازبا جاريالادى. ارمان مىرزا اتالعان جازباسىندا ون TV تەلەارناسىنىڭ رەسەيلىك «زۆەزدا» ارناسىنىڭ باعدارلامالارىن كورسەتە باستاعانىن ايتىپ، ميللياردەر ۆلاديمير كيم مەن ناتاليا اكەنتەۆا دەيتىن ەكەۋىن ەلىمىزدەگى سەپەراتيزمدى دامىتۋشىلار دەپ ايىپتايدى.

رەسەيلىك ارنا ءوز باعدارلامالارىندا ۋكراينا مەن رەسەي، گرۋزيا مەن رەسەي، مولداۆا مەن رەسەي قارىم-قاتىناسى جايلى بىرجاقتى حابار تاراتىپ، اتالعان ءۇش ەلدى تەرىس جاعىنان تانىستىراتىن كورىنەدى. قازاقستان بيلىگى ءالى بەيتاراپ كوزقاراس ۇستانىپ وتىرعان قىرىم ماسەلەسىن دە بىرجاقتى كورسەتىپ، قىرىمدى رەسەيدىڭ جەرى دەپ اشىق ءناسيحاتتاپ ءجۇر ەكەن.

جۋرناليت ءوز جازباسىندا ون TV تەلەارناسىنىڭ يەسى ربك بانك ەكەنىن ايتادى. ال بۇل بانكتىڭ باستى اكتسيونەرى - ۆلاديمير كيم. كيمنىڭ كىم ەكەنىن ەلدىڭ ءبارى بىلەدى. قازاق مىسىنىڭ قوجايىنى، قازاقستانداعى ەڭ داۋلەتتى كاسىپكەر. ەندەشە قازاقتىڭ ەن بايلىعىن ەمىن-ەركىن پايدالانىپ، ەلدەگى ەڭ باي ادام اتانعان كيم كىمنىڭ سويىلىن سوعىپ ءجۇر؟

ءبىز جۋرناليست ارمان شوراەۆتىڭ سول پىكىرىن قاز-قالپىندا وقىرمان نازارىنا ۇسىنىپ وتىرمىز: 

«بەسىنشى كولوننا قازاقستاندا.

تانىپ، ءبىلىپ جۇرۋلەرىڭىزدى سۇرايمىن – ۆلاديمير كيم مەن ناتاليا اكەنتەۆا – ەلىمىزدەگى ەڭ باستى سەپاراتيزمدى دامىتۋشىلار.

جۋىردا ءبىزدىڭ ەلدەگى ون TV تەلەارناسىنىڭ تولقىنى ارقىلى رەسەيدىڭ اگرەسسيۆتى «زۆەزدا» تەلەارناسى كورسەتىلە باستادى. بۇل - كرەملدىڭ كورشىلەرىنە قارسى كورسەتىپ جۇرگەن اگرەسسياسىنىڭ لوگيكاسىن مەن باسقا دا ميليتاريستىك كوزقاراسىن ءتۇسىندىرىپ، ناسيحاتتايتىن ارنا.

سوندىقتان دا ول بۇتكىل كونتەنتىن مەملەكەتتىك تىلگە اۋدارىپ بەرەدى.

ال ەندى، مەنىڭ تۋعان تىلىمدە، ابايدىڭ انا تىلىندە، ءوز قازاق تىلىمىزدە ولار بىزگە، قازاقتارعا ۋكراينا مەن ۋكراينالىقتاردىڭ قانداي ناشار حالىق ەكەنىن، گرۋزيا مەن گرۋزيندەردىڭ، مولدوۆا مەن ونىڭ حالقىنىڭ دا جاقسى ەمەس ەكەنىن جانە نەگە كرىمنىڭ رەسەيدىكى ەكەنىن دە ناسيحاتتاپ جاتىر.

بىزگە الگى ورت ەۆرازيا ارناسى ازدىق ەتكەندەي، ەندى تاعى ءبىر زومبي-تەلەارنا قوسىلدى.

جانە بۇل ارنانىڭ وتاۋ تۆ كانالدارىنىڭ تەگىن پاكەتى تىزىمىندە بار ەكەنىن دە ايتا كەتكەن ءجون.

بۇل اڭگىمەگە كيم مەن ناتاليا بيكەشتىڭ نە قاتىسى بار دەرسىز؟ ويتكەنى، بۇل تەلەارنانىڭ باسقارۋشىسى – ربك بانك.

كيم، مەن ءسىزدى تۇسىنبەيمىن، بۇل ءسىزدىڭ تىم قاتتى تويىنعانىڭىز با، الدە ءسىز ءبىزدىڭ ەلدى سەپاراتيزمنىڭ قۇشاعىنا يتەرىپ جاتىرسىز با؟ ءسىز ءوزىڭىزدىڭ ارناڭىز تۋرا جارتى كۇن بويى رەسەي دياسپوراسىنا گيۆي مەن موتورولا جانە باسقا دا «جاسىل ادامدار» وسىندا كەلەتىنىنە ءۇمىت سىيلايتىنىن تۇسىنەسىز بە؟ ال ءسىز قالعان جارتى كۇندى قازاقتار مەن ۋكراينداردى، قازاقتار مەن گرۋزيندەردى ءبىر-بىرىنە ايداپ سالىپ وتىرسىز با؟

مەن قازاقستان بيلىگىنەن اتالمىش تەلەارنانىڭ وتاۋ تۆ-دەن تولىق جويىلۋىن جانە ەفير جۇرگىزۋىن توقتاتۋدى تالاپ ەتەمىن!

ءبىز ۋكرايناعا سوعىس جاريالاعان جوقپىز جانە قىرىمدى رەسەيگە تيەسىلى دەپ مويىنداعان جوقپىز!

ونىڭ ۇستىنە، ەگەر ءبىزدىڭ ەلدە رەسەي جاعىندا دونباستا سوعىسىپ جۇرگەن ازاماتتار قىلمىستىق جاۋاپقا تارتىلسا، وندا تەلەديدارلار بولاشاق سودىرلاردىڭ جاسىرىن تۇردە تارتىلۋى تۋرالى نەگە حابار تاراتۋى كەرەك؟

مەنىڭ پىكىرىمدى قولدايتىندار، ربك بانككە بويكوت جاريالاۋىڭىزدى وتىنەمىن.

كيم، ءسىز مىس پەن وتاندى قاتار ساتا المايسىز. بىرەۋىن تاڭداڭىز».

دايىنداعان: قۋانىش قاپپاس

Abai.kz