جەكسەنبى, 9 تامىز 2020
COVID-19 قازاقستاندا. جۇقتىرعاندار — 97829. جازىلعاندار — 71609. قايتىس بولعاندار — 1058
جاڭالىقتار 1513 5 پىكىر 6 شىلدە, 2020 ساعات 19:22

شامالعاندا ورتالىق ساياباق اشىلدى

ەلوردانىڭ تۋعان كۇنىنە وراي، قاراساي اۋدانى، شامالعان اۋىلىندا ورتالىق ساياباق اشىلدى. بالالارعا ارنالعان دەمالىس ورنى «رۋحاني جاڭعىرۋ» باعدارلاماسى اياسىندا سالىنعان. قۇرىلىس جۇمىستارى وتكەن جىلدىڭ ءساۋىر ايىندا باستالىپ، استانا كۇنىندە قولدانىسقا بەرىلدى.

«انا-نۇرى» ساياباعىنىڭ جالپى اۋدانى ءبىر جارىم گەكتار. ال، ۇزىندىعى 380 مەتر. ويىن الاڭىنا ءبىر ۋاقىتتا 150 ادامعا دەيىن كەلە الادى. اۋىل تۇرعىندارىنىڭ ايتۋىنشا، ساياباقتىڭ شامالعان وزەنىنىڭ جاعالاۋىندا ورنالاسۋى كەلۋشىلەرگە وتە ىڭعايلى كورىنەدى.

دەمالىس ورنىنىڭ اشىلۋ سالتاناتىنا اۋدان تۇرعىندارىنان بولەك، اۋدان اكىمى جانداربەك دالاباەۆ جانە سپورت ارداگەرى ءارى كاسىپكەر سەرىك باكيشەۆ قاتىستى. ولار ايماق حالقىن مەرەكەمەن قۇتتىقتاپ، جۇرەكجاردى تىلەگىن ءبىلدىردى.

«ساياباق اۋماعىندا ەكى ويىن الاڭى جانە فۋتبول، ۆولەيبول، باسكەتبول الاڭدارى بار. ودان بولەك، ۇستەل تەننيسى، شاحمات، توعىزقۇمالاق ويناۋعا ارنالعان ۇستەلدەر ورنالاسقان. ۇستەل تەننيسىن ءوزىم دە ءبىر رەت ويناپ كوردىم»،-دەدى اۋدان اكىمى جانداربەك دالاباەۆ.

جاڭا دەمالىس ورنىندا بالدىرعاندار سپورتپەن شۇعىلدانىپ قانا قويماي، قازاقستان تاريحىن دا قىزىعۋشىلىقپەن زەرتتەيتىن بولادى. سەبەبى، الاڭنىڭ ءبىر بولىگىنە قازاق حاندارىنىڭ، بيلەرىنىڭ باتىرلارىنىڭ ءومىربايانىنان سىر شەرتەتىن تاقتا قويىلعان. تاربيەلىك ءمانى زور ورىندا ءسۇيىنباي ارونۇلىنىڭ، اباي قۇنانباەۆتىڭ، جامبىل جاباەۆتىڭ قاناتتى سوزدەرى جازىلعان.

«بۇل ساياباق 20 مىڭ شامالعىنداقتار ءۇشىن جاقسى دەمالىس ورنى بولدى. اۋىل تۇرعىنى رەتىندە ايتارىم، بۇرىندارى بۇل جەرلەرمەن ءجۇرۋ قورقىنىشتى بولاتىن. اسىرەسە، جاڭبىرلى كۇندەرى جول باتپاق بولىپ جاتاتىن. ال، قازىر بۇل جەر اۋلىمىزدىڭ كوركىن كەلتىرىپ تۇر. تاعى ءبىر ايتارىم، اۋىلعا جاس اكىم كەلگەلى، كوپتەگەن تۇيىتكىل ماسەلەلەر شەشىمىن تاۋىپ جاتىر. اۋىل تۇرعىندارى اتىنان راقمەتىمدى ايتقىم كەلەدى»، - دەدى اۋىل تۇرعىنى اقىلباي قاڭىلباەۆ.

اۋدان اتقامىنەرلەرىنىڭ ايتۋىنشا، الداعى ۋاقىتتا ساياباقتىڭ اۋماعىن 250 مەترگە دەيىن ۇلعايتىپ، ورتالىق كوشەگە جەتكىزۋ جوسپاردا بار.

ايمان اسىل

Abai.kz

5 پىكىر