قر دەنساۋلىق ساقتاۋ مينيسترلىگىنىڭ بۇيرىعىمەن ەرحات سەرىكۇلى ەسقاليەۆ «سق - فارماتسيا» جشس باسقارما توراعاسى بولىپ تاعايىندالدى. 

«مەملەكەت باسشىسى «سق-فارماتسيا» جاڭا توراعاسىنىڭ الدىنا ەلىمىزدەگى  مەديتسينالىق ۇيىمداردى ءدارى-دارمەك پرەپاراتتارىمەن جانە مەديتسينالىق ماقساتتاعى بۇيىمدارمەن تولىق  قامتاماسىز ەتۋگە قاتىستى ماڭىزدى مىندەتتەر قويدى. بۇل جۇمىس اشىق جانە جۇيەلى جۇرگىزىلۋى ءتيىس»،- دەپ اتاپ ءوتتى قر دەنساۋلىق ساقتاۋ ءمينيسترى الەكسەي تسوي    «سق-فارماتسيا»   ۇجىمىنا جاڭا باسشىنى تانىستىرۋ بارىسىندا.

ەرحات ەسقاليەۆ 1976 جىلى 25 قىركۇيەكتە الماتى قالاسىندا دۇنيەگە كەلگەن.

1998 جىلى يۋگوسلاۆياداعى اعايىندى كاريچ ۋنيۆەرسيتەتىنىڭ بانك ءىسى جانە ساۋدا اكادەمياسىن بانك ءىسى ەكونوميسى ماماندىعى بويىنشا بىتىرگەن.

2003 جىلى زاڭتانۋ اكادەمياسى - "ادىلەت" جوعارى قۇقىق مەكتەبىندە زاڭگەر ديپلومىن الدى، 2009 جىلى حالىقارالىق بيزنەس اكادەمياسىن، كورپوراتيۆتىك مەنەدجمەنتتى ءبىتىردى. ءبىلىمىن ءتۇرلى شەتەلدىك وقۋ ورىندارىندا جالعاستىردى. ە.ع.ك. (Ph.D) ىسكەرلىك اكىمشىلىك دوكتورى.

ەڭبەك جولىن (1998) قازاقستان رەسپۋبليكاسى قارجى مينيسترلىگىنىڭ مەملەكەتتىك مۇلىك جانە جەكەشەلەندىرۋ كوميتەتى ينۆەستيتسيالىق ينستيتۋتتارمەن جۇمىس ءبولىمىنىڭ باس مامانى بولىپ باستاعان.

ءار جىلدارى اتىراۋ وبلىسى ەكونوميكا باسقارماسى باستىعىنىڭ ورىنباسارى (1999), قر مەملەكەتتىك كىرىس مينيسترلىگىنىڭ قارجى دەپارتامەنتىنىڭ ديرەكتورى (2002), "قدب-ليزينگ" اق باسقارما توراعاسى (2006), قازاقستان رەسپۋبليكاسى يندۋستريا جانە ساۋدا ۆيتسە-ءمينيسترى (2009) لاۋازىمدارىن اتقاردى. 2018 جىلدان باستاپ قازىرگى ۋاقىتقا دەيىن "اتامەكەن" ۇكپ كولىكتىك لوگيستيكا كوميتەتىنە قاراستى كوميتەتىنىڭ توراعاسى بولىپ جۇمىس ىستەدى.

ايتا كەتەيىك، «سق - فارماتسيا»  جشس باسقارماسى - تەگىن مەديتسينالىق كومەكتىڭ كەپىلدىك بەرىلگەن كولەمى مەن مەديتسينالىق ساقتاندىرۋ جۇيەسى شەڭبەرىندە حالىقتى دارىلىك زاتتارمەن قامتاماسىز ەتۋ جونىندەگى بىرىڭعاي ديستريبيۋتور.

Abai.kz