قازاقستاندا وقۋشىلار 1 قىركۇيەكتەن باستاپ ءبىرىنشى توقساندى قاشىقتان وقيتىن بولدى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ ايتتى. 

ۇكىمەت وتىرىسىندا ءسوز سويلەگەن ءبىلىم جانە عىلىم ءمينيسترى اسحات ايماعامبەتوۆ باستى باسىمدىق – بالالار مەن مۇعالىمدەردىڭ ءومىرى مەن دەنساۋلىعى ەكەنىن جەتكىزدى.

«وسىعان قاراي كەلەسى شەشىمدەردى ۇسىنامىن: بىرىنشىدەن، شالعايدا ورنالاسقان شاعىن جيناقتى مەكتەپتەردى قوسپاعاندا 1 قىركۇيەكتەن باستاپ ەلىمىزدىڭ بارلىق مەكتەبىندەگى 1-11 سىنىپ وقۋشىلارى ءۇشىن وقۋ جىلىنىڭ العاشقى توقسانىن قاشىقتان وقىتۋ فورماتىندا وتكىزۋ»، - دەدى ول.

ءوز كەزەگىندە ۇكىمەت باسشىسى اسقار مامين دەنساۋلىق ساقتاۋ مەن ءبىلىم جانە عىلىم، تسيفرلاندىرۋ مينيسترلىكتەرى بويىنشا 1 قىركۇيەكتەن باستاپ ورتا مەكتەپتەردە ءبىرىنشى توقساندى قاشىقتان وقىتۋ فورماتىندا وتكىزۋگە دايىن بولۋىن قامتاماسىز ەتۋدى تاپسىردى.

«قاجەت بولعان جاعدايدا باستاۋىش سىنىپ وقۋشىلارى اتا-انالارىنىڭ جازباشا وتىنىشتەرى بويىنشا سانيتارلىق-ەپيدەميولوگيالىق تالاپتاردى قاتاڭ ساقتاي وتىرىپ، كەزەكشى سىنىپتاردىڭ قىزمەتىن قامتاماسىز ەتۋدى تاپسىرامىن»، - دەدى ول.

Abai.kz