كەشە قازاقستان پرەزيدەنتى قاسىم-جومارت توقاەۆ ۇكىمەتكە پاندەميا ستاتيستيكاسىن بىرىزدەندىرۋدى تاپسىرعان بولاتىن. مەملەكەت باسشىسى بۇل تۋرالى Twitter جەلسىندەگى جەكە پاراقشاسىندا جازدى.

«ۇكىمەتكە پاندەميانىڭ ستاتيستيكاسىن بىرىزدەندىرۋ مىندەتتەلدى. ازاماتتاردىڭ دەنساۋلىعى مەن ومىرىنە كوروناۆيرۋستان بولەك، وكپە قابىنۋى دا ۇلكەن زاردابىن تيگىزىپ وتىر.

پاندەميا احۋالى تۋرالى بارلىق اقپارات قانشا جەردەن اششى بولسا دا، ونى قوعام بىلۋگە ءتيىس. جاريالىلىق پەن ءوزارا سەنىم بولعاندا عانا، ءبىز بىرلەسە وتىرىپ بۇل ىندەتتى تەزىرەك جەڭەمىز»، - دەدى پرەزيدەنت.

مەملەكەت باسشىسىنىڭ وسى تاپسىرماسىنان كەيىن ەلىمىزدە پنەۆمونيامەن اۋىرعاندار كوروناۆيرۋس جۇقتىرعانداردىڭ ستاتيستيكاسىنا ەنگىزىلەتىن بولدى. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا دەنساۋلىق ساقتاۋ ءمينيسترى الەكسەي تسوي مالىمدەدى.

ءمينيستردىڭ ايتۋىنشا، كوروناۆيرۋس پەن كلينيكالىق جانە ەپيدەميولوگيالىق بەلگىلەرى كوروناۆيرۋسقا وتە ۇقساس پنەۆمونيا ىندەتى 1 تامىزدان باستاپ بىرگە ەسەپتەلەدى.

«كوروناۆيرۋس پەن پنەۆمونيا بويىنشا مالىمەتتەردىڭ اشىقتىعىن بارىنشا قامتاماسىز ەتۋ ءۇشىن دەنساۋلىق ساقتاۋ مينيسترلىگى ستاتيستيكالىق مالىمەتتەردى تىركەۋ جانە اقپاراتتاندىرۋدىڭ جاڭا امال-ادىستەرىن ايقىندادى.

ددسۇ-نىڭ ەۋروپالىق بيۋروسى جۇرگىزگەن تەحنيكالىق كەڭەستى ەسەپكە الا وتىرىپ، ءبىز كۆي جاعدايلارىن كودتاۋ مەن تىركەۋدە حالىقارالىق اۋرۋلار كۆاليفيكاتسياسىنىڭ جاڭا كودىنا ءوتۋ تۋرالى شەشىم قابىلدادىق», - دەدى الەكسەي تسوي.

ءمينيستردىڭ ايتۋىنشا، كوروناۆيرۋس جۇقتىرعاندار مەن پنەۆمونيامەن اۋىرعانداردى بىرگە ەسەپتەۋدىڭ ارتىقشىلىعى - ەلدەگى ىندەت جاعدايىنا دۇرىس بولجام جاساۋعا پايدالى.

«جاڭا ستاتيستيكانى جۇرگىزۋ ءۇشىن COVID-19 اۋرۋىن كودتاۋ تۇرعىسىندا مەديتسينالىق قىزمەتكەرلەردىڭ قۇزىرەتىن ارتتىرىپ، اقپاراتتىق جۇيەلەردى رەتتەپ، باسقا دا تەحنيكالىق ماسەلەلەردى رەتتەۋ كەرەك بولادى.

سونىمەن قاتار، دەنساۋلىق ساقتاۋ مينيسترلىگى ەسەپ جۇرگىزۋدەگى وزگەرىس قازاقستاننىڭ كوروناۆيرۋس ينفەكتسياسىن جۇقتىرۋ مەن ءولىم-ءجىتىم بويىنشا حالىقارالىق رەيتينگتەگى پوزيتسياسىنا جامان اسەر ەتەتىنىن ءتۇسىنىپ وتىر.

بۇل ءادىس اۋرۋ جاعدايىنا دۇرىس بولجام جاساۋعا، قولداعى رەسۋرستى، ونىڭ ىشىندە مەديتسينالىق كادرلاردى، توسەك-ورىندى، قۇرىلعىلاردى، ءدارى-دارمەكتى ويلى جوسپارلاۋعا، ستاتيستيكانى اشىق جۇرگىزۋگە مۇمكىندىك بەرەدى», - دەدى مينيستر.

الەكسەي تسويدىڭ ايتۋىنشا، جىل باسىنان بەرى 15 شىلدەگە دەيىن 234 187 پنەۆمونيامەن اۋىرۋ جاعدايى تىركەلگەن. بۇل بىلتىرعى جىلمەن سالىستىرعاندا 3-3,5 ەسە كوپ. جىل باسىنان 15 شىلدەگە دەيىن پنەۆمونيادان 3327 ادام قايتىس بولعان.

ايتا كەتەيىك، 3 ماۋسىمنان باستاپ دەنساۋلىق ساقتاۋ مينيسترلىگى كوروناۆيرۋس جۇقتىرعانداردى سيمپتومى بار-جوق دەپ ەكى بولەك ساناپ، تەك اۋرۋ بەلگىسى بارلاردى كوروناۆيرۋس ستاتيستيكاسىنا كىرگىزىپ وتىردى. مينيسترلىك بۇل تاجىريبەدەن 1 شىلدە كۇنى باس تارتىپ، سيمپتومى بار ناۋقاستار مەن اۋرۋ بەلگىسى جوق ناۋقاستاردىڭ دەرەگىن قايتا قوسقان بولاتىن.

وسىدان ءبىر اپتا بۇرىن قىتايدىڭ قازاقستانداعى ەلشىلىگى وسى ەلدە جۇرگەن ازاماتتارىنا اقپار تاراتىپ، قازاقستاندا «بەلگىسىز» پنەۆمونيا بارىن ايتقان. الەم باسىلىمدارى وسى تۋرالى جارىسا جازىپ، دۇنيەجۇزىلىك دەنساۋلىق ساقتاۋ ۇيىمى قازاقستانداعى پنەۆمونيا احۋالى جونىندە پىكىر ءبىلدىردى. ۇيىم ەلدەگى پنەۆمونيا جاعدايلارى كوروناۆيرۋس بولۋى مۇمكىن ەكەنىن ايتتى.

سونداي-اق، قىرعىزستان بيلىگى دە بۇعان دەيىن پنەۆمونيانى كوروناۆيرۋس ستاتيستيكاسىنان بولەك ەسەپتەپ كەلگەن. الايدا كەشە ەلدىڭ ۆيتسە-پرەمەرى ايدا سمايلوۆا قىرعىزستاننىڭ پنەۆمونيا جاعدايلارىن كوروناۆيرۋس دەپ ساناۋعا كوشكەنىن حابارلادى.

Abai.kz