قازاقستاننىڭ سىبايلاس جەمقورلىققا قارسى كۇرەس قىزمەتى الەۋمەتتىك مەدساقتاندىرۋ قورىنىڭ بۇرىنعى باسشىلارىنا قاتىستى قىلمىستىق ءىس قوزعادى. بۇل تۋرالى اگەنتتىكتىڭ Telegram-كانالىندا ءمالىم بولدى.

"سىبايلاس جەمقورلىققا قارسى قىزمەت ساتىپ الىناتىن قىزمەتتەردىڭ قۇنىن كوتەرۋ ارقىلى "الەۋمەتتىك مەديتسينالىق ساقتاندىرۋ قورى" كەاق-نىڭ قاراجاتىن جىمقىرۋ فاكتىسى بويىنشا سوتقا دەيىنگى تەرگەۋدى باستادى.

وزگە اقپاراتتار قر قپك 201 بابىنا سايكەس، تەرگەۋ مۇددەسى ءۇشىن جاريا ەتىلمەيدى", - دەلىنگەن رەسمي حابارلامادا.

ەستەرىڭىزگە سالا كەتەيىك، وسىعان دەيىن الەۋمەتتىك مەديتسينالىق ساقتاندىرۋ قورىنىڭ بۇرىنعى باسشىسى ايباتىر جۇماعۇلوۆتىڭ ايەلى الەۋمەتتىك جەلىدە اسىرە داراقىلىعىمەن ايگىلى بولعان ەدى. ول Instagram جەلىسىندە كۇيەۋىنىڭ (ايباتىر جۇماعۇلوۆتىڭ - رەد.) وعان 12-ءشى كولىگىن سىيلاعانىن ايتىپ "ماقتانعان". جۇماعۇلوۆتىڭ جارىنىڭ سول جازعاندارى جەلىدە قىزۋ تالقى بولىپ، قوعام نارازىلىعىن تۋدىرعان.

ال 10 شىلدە كۇنى مەملەكەت باسشىسى ۇكىمەتكە الەۋمەتتىك مەديتسينالىق ساقتاندىرۋ قورى باسشىلىعىن قىزمەتىنەن بوساتۋدى قاتاڭ تاپسىرعان.

"سوڭعى كەزدە الەۋمەتتىك مەديتسينالىق ساقتاندىرۋ قورى توڭىرەگىندە اڭگىمە كوبەيدى. مەنىڭشە، ول جەرگە تىم داراقى (مەنەە گلامۋرنوگو) ەمەس، ىسكەر ازاماتتى وتىرعىزۋ كەرەك. سوندا ءارتۇرلى وسەك-اياڭ، قاۋەسەتكە ءوزىمىز سەبەپ تاۋىپ بەرىپ وتىرمىز.  ارينە، ۇكىمەت تاراپىنان قوردىڭ جۇمىسىنا قاتىستى اناليز بولۋى كەرەك. ول قور قانشالىقتى ءتيىمدى، قانشالىقتى ءساتتى جۇمىس ىستەپ جاتىر؟", - دەگەن ەدى پرەزيدەنت.

پرەزيدەنتتىڭ وسى سوزدەرىنەن كەيىن ايباتىر جۇماعۇلوۆ قىزمەتىنەن بوساتىلعان. ال ونىڭ ورنىنا قوردىڭ باسشىسى بولىپ بولات توكەجانوۆ تاعايىندالعان.

Abai.kz