مەملەكەت جانە قوعام قايراتكەرى، ەكونوميكا عىلىمدارىنىڭ دوكتورى، قازاقستان جازۋشىلار وداعىنىڭ مۇشەسى مىرزاگەلدى كەمەل 72 جاسىندا ومىردەن ءوتتى.

مىرزاگەلدى كەمەل 1949 جىلى 15 قاڭتاردا وڭتۇستىك قازاقستان وبلىسى، ماقتارال اۋدانىندا تۋعان.

1971 جىلى تاشكەنت يرريگاتسيا جانە اۋىل شارۋاشىلىعىن مەحانيكالاندىرۋ ينجەنەرلەرى ينستيتۋتىنىڭ اۋىل شارۋاشىلىعىن ەلەكترلەندىرۋ ماماندىعىن، 2000 جىلى م.ح.دۋلاتي اتىنداعى جامبىل ۋنيۆەرسيتەتىنىڭ قۇقىقتانۋ فاكۋلتەتىنىڭ زاڭگەر ماماندىعىن تامامداعان.

ەڭبەك جولىن 1971 جىلى ماقتارال اۋدانىنداعى "وكتيابردىڭ 30 جىلدىعى" سوۆحوزىندا اعا ينجەنەر بولىپ باستاعان.

1975–1992 جىلدارى ماقتارال اۋدانىندا پارتيا، كەڭەس قىزمەتىندە بولدى. 1992–1994 جىلدارى كەڭشار ديرەكتورى، 1994–1995 جىلدارى قازاقستان رەسپۋبليكاسى جوعارعى كەڭەسىنىڭ دەپۋتاتى، 1995 جىلى قازاقستان رەسپۋبليكاسى مينيسترلەر كابينەتى جانىنداعى شەتەل ينۆەستيتسياسى جونىندەگى كوميتەتىنىڭ سەكتور مەڭگەرۋشىسى بولىپ قىزمەت اتقارعان. 1995–2004 جىلدارى ءبىرىنشى، ەكىنشى شاقىرىلعان قازاقستان رەسپۋبليكاسى پارلامەنتىنىڭ دەپۋتاتى.

رۋحانيات سالاسىندا 10 كىتاپ شىعارعان، ولاردىڭ ىشىندە ءوزى جازعان ىزگىلىككە، يماندىلىققا، ءبىلىم-بىلىككە، اقىل-پاراساتقا ۇندەيتىن تانىمدىق-كوسەمسوزدىك ەڭبەكتەرگە قوسا، قىتاي اقىلماندارى لاو تسزى مەن كونفۋتسيدى، يسپان ءپالساپاشىسى بالتاسار گراسيان، ەجەلگى ءۇرىم جانە گرەك اقىلماندارىنىڭ افوريزمدەرىن، قازىرگى ىلىمدەردى ناسيحاتتاۋشى لۋيزا حەي، بۇگىنگى كۇننىڭ ەڭ اتاقتى جازۋشىلارىنىڭ ءبىرى پاۋلو كوەلولاردىڭ تاڭداۋلى ەڭبەكتەرىن قازاق تىلىنە تارجىمالاعان.

2004 جىلى ەكونوميكا عىلىمدارىنىڭ دوكتورى اتانعان. قازاقستان رەسپۋبليكاسىنىڭ پرەزيدەنتى جانىنداعى مەملەكەتتىك باسقارۋ اكادەمياسىنىڭ پروفەسسورى، 14 مونوگرافيانىڭ، 100-گە جۋىق عىلىمي ماقالالاردىڭ اۆتورى.

"دۇنيە" جانە "ەكولوگيا ي ۋستويچيۆوە رازۆيتيە" جۋرنالدارىن شىعارعان. "ابزالدىق الىپپەسى", "وزىمە ساباق" سياقتى كىتاپتارى بار.

Abai.kz