قازىر كۇللى الەم جۇرتىن الەككە تۇسىرگەن كوروناۆيرۋس ىندەتى قازاقستان مەديتسيناسىنا دا اۋىر سوققى بولىپ تيگەنى بەلگىلى. ەلدە ىندەت جۇقتىرعاندان سانى 67 مىڭ ادامعا جۋىقتادى. وتكەن ءبىر تاۋلىكتە 1700 ادام ىندەت جۇقتىرعان. ونىڭ ىشىندە 782 ناۋقاس كلينيكالىق بەلگىلەرى جوق تاسىمالداۋشى ەتىندە تىركەلگەن. اتالعان ىندەتتەن جازىلىپ شىققاندار سانى 40 مىڭنان استى.

تارتىساتىن ەمەس، تار كەزەڭگە تاپ بولدىق. ەل دە، ەل باسقارۋشىلار دا. ىندەت ەلدەگى ءىرى قالالارعا عانا ەمەس، اۋىل-ايماققا دا تاراپ ۇلگەردى. وسىنداي الاعاي دا بۇلاعاي كەزدە پرەزيدەنت قاسىم-جومارت توقاەۆ ەل ازاماتتارىنا ۇندەۋ تاستاپ، ءبىر جاعادان باس، ءبىر جەڭگەن قول شىعارىپ، كۇش بىرىكتىرۋگە شاقىردى. پرەزيدەنتتىڭ باستاماسىنا قازاقستاننىڭ ءوڭىر-وڭىرىندەگى بەلسەندى ازاماتتار، قوعامدىق ۇيىمدار مەن ساياسي پارتيالار، ءىرىلى-ۇساقتى كاسىپ يەلەرى ت.ب. ۇيىمدار قولداۋ ءبىلدىردى.

بارشاعا ءمالىم، 2020 جىل قازاقستاندا «ەرىكتىلەر جىلى». رەسپۋبليكالىق ۆولونتەرلىك فرونت-ءوفيستىڭ اشىلۋىندا ءسوز سويلەگەن پرەزيدەنت توقاەۆ: «ەرىكتىلەر جىلى – كەزەكتى ناۋقان ەمەس. ول حالقىمىزدىڭ ءومىر-سالتىنا اينالۋى كەرەك. ەرىكتىلەردىڭ بويىنداعى قايرات، كۇش-جىگەر از ازاماتتى ىنتالاندىرۋى كەرەك. ەلىمىزدىڭ ءار ايماعى بۇل ماڭىزدى جۇمىستان تىس قالمايدى دەپ سەنەمىن.

مەن ەلىمىزدىڭ ءاربىر وڭىرىندە ەرىكتى بولۋعا نيەتتى ازاماتتاردىڭ كوپتىگىنە سەنەمىن. ۇكىمەت ولارعا قولداۋ ءبىلدىرۋ ءۇشىن بارلىق شارالاردى قابىلدايدى. اباي: «ادامزاتتىڭ ءبارىن ءسۇي باۋىرىم دەپ»، ايتىپ كەتكەن. ەرىكتى بولۋى – جۇرەكتىڭ ءىسى»، - دەگەن ەدى.

پاندەميا باستالىپ، كوروناۆيرۋس پەن قارجىلىق قيىندىق قوس بۇيىردەن قىسقان تار كەزەڭ كەلگەندە الماتى بەلسەندىلەرى «ەرىكتى بول» اكتسياسىن قولعا الدى.

2 ميلليوننان اسا تۇرعىنى بار الماتى قالاسىندا جۋىردا قوسىمشا كۇندىزگى ەمدەۋ ستاتسيونارى اشىلاتىنى اقپاراتتا جاريا بولعان. ول جەرگە ورتاشا دەڭگەيلى ناۋقاستار قابىلدانادى دەپ جوسپارلانعان. ياعني، پنەۆمونيا بەلگىلەرى راستالعان، ورتاشا دەڭگەيلى دياگنوز قويىلعان ناۋقاستار ىندەتى اۋىر دەڭگەيگە ءوتىپ كەتپەۋى ءۇشىن وسى جەرلەرگە جاتقىزىلىپ، ولارعا مەديتسينالىق كومەك كورسەتىلەدى. ول مەكەمەلەردە كاسىبي دارىگەرلەر جۇمىس جاسايدى. سونداي-اق، ەرىكتىلەر توبىن دا كومەككە تارتپاق ەكەن. وسىعان وراي باستاماشى توپ قازاقستان حالقىنا ۇندەۋ جولداپ، مەديتسينالىق فاكۋلتەت ستۋدەنتتەرىن جانە ەرىكتى بولۋىعا نيەتتە بارشا ازاماتتاردى وسى جوباعا شاقىرعان.

«ءبىزدىڭ ماقسات – ەلىمىزدىڭ مەديتسينالىق جۇيەسىنە قولداۋ ءبىلدىرۋ، كومەك قولىن ۇسىنۋ. كۇندىزگى ستاتسيونار ارقىلى اۋرۋحانالارعا جاتقىزىلماي قالعان ازاماتتارعا كومەك بەرۋ. ول ستاتسيونارلاردا كاسىبي ماماندار جۇمىس جاسايدى. ولارعا اۋرۋحانالاردا ورىن جەتىسپەي قالعان بولۋى مۇمكىن. مىنە، وسى كاتەگورياداعى كوپ ازاماتتار ءدارى-دارمەك جەتىسپەۋشىلىگىن سەزىنىپ وتىر. ولارعا مەديتسينالىق تەكسەرۋ مەن باقىلاۋ كەرەك. ولاردىڭ كورشىلىگى ءوز بەتتەرىنشە ەم قابىلداپ جاتىر. جانە ولاردىڭ بارلىعىندا دەرلىك ونسىز دا تاپشى بولىپ وتىرعان ءدارى-دارمەكتەردى ساتىپ الۋعا مۇمكىندىك جوق.

ءبىز ءوزىمىزدىڭ العاشقى كۇندىزگى ستاتسيونارىمىزدى اشقان ساتتە-اق، ءوزىمىزدىڭ جۇمىس جوسپارىمىزدى جاريالايمىز. سونداي-اق، ءوزىمىزدىڭ تاجىربيەمىزدى جاريالايمىز. ول بويىنشا كەز كەلگەن كاسىپكەر نەمەسە وسىنداي ورىندار اشۋعا نيەتتى ازاماتتار ءوز وڭىرلەرىندە دە كۇندىزگى ستاتسيونار اشا الاتىن بولادى.

قاجەتتى قۇرال-جابدىقتاردى الۋ ءۇشىن ءوزىمىز ءجۇرىپ وتكەن جولداردى كورسەتەمىز. وسى ارقىلى ءبىز ەمگە مۇقتاج وتانداستارىمىزعا كومەك كورسەتە الامىز دەپ ويلايمىن»، - دەيدى جوبا ۇيىمداستىرۋشىسى ەرلان نۇرپەيىسوۆ.

ەستەرىڭىزگە سالا كەتەيىك، وسىعان دەيىن ەسىم-سويى ەلگە بەلگىلى كاسىپكەر ايدىن راقىمباەۆ تا الماتى مەن نۇر-سۇلتان قالالارىندا كوروناۆيرۋس ناۋقاستارىن تەگىن ەمدەيتىن مەديتسينالىق ورتالىق اشاتىنىن حابارلاعان.

«الماتى مەن نۇر-سۇلتان قالالارىندا 100-200 ورىندىق كوروناۆيرۋس ناۋقاستارىنا ارنالعان امبۋلاتوريالىق-پروۆيزورلىق ورتالىق اشۋ ءۇشىن ورىن عيمارات ىزدەستىرىپ جاتىرمىز. الداعى ۋاقىتتا ورىندار سانىن ۇلكەيتۋىمىز دە مۇمكىن.

لايىقتى جالپۇلىن تولەۋگە دايىنبىز. دايىن عيماراتتار بولسا، اسىرەسە قوناق ءۇي نەمەسە ىستىق-سۋىق سۋى رەتەلگەن عيماراتتار بولسا جاقسى ەدى. ءبىزدىڭ كومپانيانىڭ عيماراتتارىنىڭ كوبى تۇرعىن ۇيلەردە ورنالاسقان. ول جەكەلەگەن ازاماتتارعا قاۋىپتى»، - دەگەن ەدى راقىمباەۆ.

وسىعان دەيىن «شۇعىلا» قايىرىمدىلىق قورى دا 250 ميلليون تەڭگە قارجى جيناپ، وتتەگى اپپاراتتارىن الدىرتقان بولاتىن.

ودان بولەك، ەرىكتىلەر توبى دا ەلدەن جىلۋ جيناۋدى باستاپ كەتكەن. ال بلوەگەرلىك ەرىكتىلەر توبى 10 ميلليونعا جۋىق قاراجات جيناپ، 20 وتتەگى كونسەنتراتتارىن ساتىپ العان. ول اپپاراتتاردى قاپشاعاي، تالعار جانە الماتى اۋرۋحانالارىنا تابىستاعان.

ال ايتىسكەر اقىن اينۇر تۇرسىنباەۆا مەن ەرىكتىلەر توبى 125 وتتەگى كونسەنتراتىن تۇركيادان جەتكىزگەن.

Abai.kz