قازاقستاندا مەملەكەتتىك قىزمەتكە ورنالاسۋ بويىنشا كونكۋرس ەندى 2 كەزەڭمەن وتكىزىلەدى. بۇل تۋرالى مەملەكەتتىك قىزمەت ىستەرى اگەنتتىگىنىڭ ءباسپاسوز قىزمەتى حابارلايدى.

مەملەكەت باسشىسى قول قويعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭى نەگىزىندە «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭىنا تۇزەتۋلەر ەنگىزىلدى.

ەنگىزىلگەن تۇزەتۋلەرگە سايكەس، بارلىق مەملەكەتتىك ورگانداردىڭ قىزمەتكەرلەرى اراسىندا وتەتىن ىشكى كونكۋرس جالپى كونكۋرسپەن بىرىكتىرىلگەن. وزگەرىستەر 2020 جىلدىڭ 17 شىلدەسىنەن باستاپ كۇشىنە ەندى.

بۇعان دەيىن مەملەكەتتىك ورگاندار كونكۋرستاردىڭ ءۇش ءتۇرىن جۇيەلى تۇردە وتكىزىپ كەلدى. ولار: مەملەكەتتىك ورگاننىڭ ءوز قىزمەتكەرلەرى اراسىنداعى كونكۋرس، بارلىق مەملەكەتتىك قىزمەتكەرلەر اراسىنداعى كونكۋرس جانە بارلىق ازاماتتار اراسىنداعى جالپى كونكۋرس.

ءوز كەزەگىندە، بۇل جاڭاشىلدىق مەملەكەتتىك ورگانداردىڭ بوس لاۋازىمدارىن ۋاقىت سوزباي تولتىرۋعا ىقپال ەتەدى.

بۇدان بولەك، اتالعان جاڭاشىلدىق ستراتەگيالىق ماقساتتارعا قول جەتكىزۋ ءۇشىن كادرلىق شەشىمدەر قابىلداۋدا مەملەكەتتىك ورگانداردىڭ ۇتقىرلىعىن ارتتىرۋعا سەپتىگىن تيگىزەدى.

وسىنىڭ الدىندا كونكۋرستاردىڭ ءۇش ءتۇرىن وتكىزۋ بوس ورىنداردى تولتىرۋ ءۇشىن كوپ ۋاقىتتى تالاپ ەتەتىن. بوس لاۋازىمدارعا ورنالاسۋ كونكۋرستارىنىڭ بارلىق كەزەڭدەرىن وتكىزۋ ءۇشىن 50 جۇمىس كۇنىنە دەيىن سوزىلاتىن، ال قازىرگى ۋاقىتتا بۇل ءراسىم 15 جۇمىس كۇنىنە دەيىن قىسقارتىلدى.

اتالعان ءتاسىل جۇيەنىڭ مانساپتىق مودەلىن بۇزبايدى، ال وعان ۇلكەن ۇتقىرلىق بەرەدى جانە تۇتاستاي العاندا، جەكە سەكتوردان تالانتتى مامانداردى تارتۋ پروتسەسىن جەدەلدەتۋگە مۇمكىندىك بەرەدى.

سونىمەن قاتار، مەملەكەتتىك قىزمەتشىلەردىڭ جالپى كونكۋرستارعا قاتىسۋ ءتارتىبى جەڭىلدەتىلدى. وتكەن جىلدىڭ قاراشا ايىندا زاڭعا مەملەكەتتىك قىزمەتكەرلەردى جالپى كونكۋرسقا قاتىسۋ كەزىندە تەستىلەۋدەن وتۋدەن بوساتاتىن تۇزەتۋلەر ەنگىزىلدى.

وسىلايشا، مەملەكەتتىك قىزمەتشىلەر ەندى جالپى كونكۋرستارعا جالپى نەگىزدە ەمەس، ىشكى كونكۋرسقا ۇقساس جەڭىلدەتىلگەن ءتارتىپ بويىنشا قاتىسادى. وسىعان بايلانىستى، كونكۋرس كەزەڭدەرىن قىسقارتۋ مەريتوكراتيا قاعيداتتارىنا تەرىس اسەر ەتپەيدى.

Abai.kz