پرايمەريزگە قاتىسۋ – ەلىمىزدىڭ ءبىلىمدى، بەلسەندى، باستاماشىل ازاماتتارى ءۇشىن ۇلكەن مۇمكىندىك. مىقتى ليدەرلەر مىقتى پارتيادان شىعادى. ال سول ليدەرلەر ۇلتتىق يدەولوگيانى بويىنا سىڭىرگەن جانە ونى اينالاسىنا ناسيحاتتايتىن بولسا، قوعامنىڭ شەشىلمەي جاتقان وزەكتى ماسەلەلەرى ازايار ەدى، - دەيدى فيلولوگيا عىلىمدارىنىڭ كانديداتى، س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ پروفەسسورى، ۇشتۇعىرلى ءتىل كافەدراسىنىڭ مەڭگەرۋشىسى ايمان زەينۋللا.

بۇل جونىندە ول «Nur Otan» پارتياسى جاقتاستارىنىڭ ليگاسى وتكىزگەن Zoom-كونفەرەنتسيا بارىسىندا ايتتى. ونىڭ ويىنشا پرايمەريز ارقىلى ۇلتتىق ليدەرلەردى تاڭداپ الۋعا مۇمكىندىك مول.

«تاۋەلسىزدىك العالى بەرگى 30 جىلدا كوپ شارۋا اتقارىلدى. بىراق جەتكەن جەتىستىكتەرىمىزگە توقتاپ قالۋعا بولمايدى. ارى قاراي دامۋدىڭ داڭعىل جولىنا ءتۇسۋ ءۇشىن ءبىلىمدى، ەلىنە جانى اشيتىن ازاماتتاردىڭ بيلىككە كەلۋىن قامتاماسىز ەتۋىمىز كەرەك. ءتىل مەن مادەنيەت جاناشىرى، عالىم ءارى جەلتوقساندىق رەتىندە پرايمەريزگە قاتىساتىن ازاماتتارعا ۇلتتىق يدەيا كەرەك ەكەنىن جەتكىزگىم كەلەدى. يدەيالار تولىپ جاتىر، ونى قالادان نەمەسە دالادان ىزدەۋدىڭ قاجەتى جوق. ۇلت كوسەمى ءاليحاننىڭ «قازاق ەلىنىڭ ءتورت قۇبىلاسى تەڭ بولعان كەزدە ماڭگى جاسايدى» دەگەن ءسوزى بار. ال ءتورت قۇبىلا دەگەنىمىز – ول ەكونوميكا، مادەني-تۇرمىس، بىلىمپازدىق جانە يدەيالىق جيىنتىعىمىز. يدەيانى جازىپ قويىپ نەمەسە ونى قايتالاپ ايتا بەرگەننەن پايدا جوق، سول يدەيانىڭ  اينالاسىندا جۇمىس ىستەيتىن جوسپارىمىز بولۋى كەرەك»، – دەيدى عالىم. 

پرايمەريزگە تەك جاستار عانا ەمەس، اعا بۋىن وكىلدەرى دە قاتىسقانى دۇرىس دەيدى پروفەسسور. ويتكەنى ۇرپاقتار ساباقتاستىعى بولماسا، ەشقانداي شارۋا شەشىلمەيدى. پرايمەريزدى پايدالانا وتىرىپ، ازاماتتىق كوزقاراسى ايقىن، جەمقورلىققا بوي ۇرمايتىن، وتىرىك سويلەمەيتىن، تازا جۇرەتىن ەل اعالارىنان ۇلگى الا وتىرىپ، ۇلكەن ۇلتتىق رۋحاني ارميا جاساقتاۋىمىز كەرەك. سوندا عانا ماسەلە شەشىلەدى دەيدى پروفەسسور. 

Abai.kz