قازاقستاندا كارانتين كەزىندە تابىسسىز قالعاندارعا بەرىلەتىن الەۋمەتتىك كومەكتى تامىز ايىندا 2,2 ملن ادام العان. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى حابارلادى. بۇل جولى قازاقستاندىقتارعا تامىز ايىنىڭ ەكى اپتاسى ءۇشىن 21 250 تەڭگەدەن بەرىلگەن.

«10 تامىز ساعات 10.00-دەگى جاعداي بويىنشا، شىلدە ايىندا مەملەكەتتىك الەۋمەتتىك ساقتاندىرۋ قورىنان بىرجولعى تولەم تاعايىنداۋعا ازاماتتاردان 2 ملن 508 مىڭ ادامنان ءوتىنىش قابىلدانعان. تولەم مولشەرى ەڭ تومەنگى جالاقى – 42 500 تەڭگەگە تەڭ. تولەمدى 2 ملن 257,3 مىڭ قازاقستاندىق الدى، ونىڭ ىشىندە 2 ملن 241,6 مىڭ ادام تامىز ايىندا كارانتيننىڭ ۇزارتىلۋىنا بايلانىستى 21 250 مىڭ تەڭگە مولشەرىندە قوسىمشا اقى الدى»،- دەلىنگەن مينيسترلىك حابارلاماسىندا.

ازاماتتار كاتەگورياسى بويىنشا جىكتەسەك، 835,1 مىڭ ءوتىنىشتى بىرىڭعاي تولەم جيىنتىعىن تولەۋشىلەر تۇسىرگەن، 231,1 مىڭ جۇمىس بەرۋشى جالدامالى جۇمىسشىلارى ءۇشىن ءوتىنىش بەرگەن، 1 ملن 441 مىڭ ءوتىنىش وزگە كاتەگورياعا جاتاتىن ازاماتتاردان (جەكە كاسىپكەرلەر، ءوزىن جۇمىسپەن قامتىعاندار دا بار) كەلىپ تۇسكەن. اتاۋلى الەۋمەتتىك كومەك نەمەسە جاردەماقى، زەينەتاقى الاتىندارعا 42 500 تەڭگە تولەنبەيدى. ءوتىنىش قابىلداۋ 1 قىركۇيەككە دەيىن جالعاسادى.

ەلدە كارانتين 16 تامىزدا اياقتالۋى ءتيىس. وسىعان دەيىن مەملەكەتتىك كوميسسيا وكىلدەرى كوروناۆيرۋس احۋالى تۇراقتالعانىن، 17 تامىزدان باستاپ بىرتىندەپ شەكتەۋ شارالارىن الىپ تاستايتىنىن حابارلاعان ەدى. دەگەنمەن كەيبىر وبلىستاردا شەكتەۋ شارالارى كۇشەيىپ، كەيبىر ساۋدا ورىندارى جابىلعان. كارانتين ۇزارتىلا ما، جوق پا، ازىرگە بەلگىسىز.

قازاقستاندا كوروناۆيرۋس ىندەتى قايتا ورشىگەننەن كەيىن ەلدە 5 ماۋسىمنان باستاپ كارانتين شارالارى كۇشەيگەن ەدى. سودان بەرى ەكى اپتا سايىن سوزىلىپ كەلەدى.

ناۋرىز بەن مامىر ايلارىندا جاريالانعان كارانتين كەزىندە دە تۇرعىندارعا 42 500 تەڭگە بەرىلگەن. ۇكىمەتتىڭ ايتۋىنشا، العاشقى ايدا - 4,5 ملن ادام، ەكىنشى ايدا 2 ملن-نان استام ادام 42,5 مىڭ تەڭگە العان. شىلدە ايىندا 1,8 ملن ادام الەۋمەتتىك كومەك العان.

بۇعان دەيىن كەيبىر كاسىپكەرلەر الەۋمەتتىك كومەكتىڭ ماردىمسىز ەكەنىن ايتىپ، بيلىكتەن ساۋدا ورىندارىن اشۋدى تالاپ ەتكەن ەدى. نەسيەلەرىن تولەي الماي وتىرعانىن ايتقان ساۋداگەرلەر بانكروتتىق الدىندا تۇرمىز دەپ شاعىمدانعان. ال بيلىك وكىلدەرى ەپيدەميولوگيالىق احۋالعا بايلانىستى شەشىم قابىلدانادى دەپ مالىمدەگەن.

Abai.kz