بەيرۋت پورتىنداعى جارىلىسقا بايلانىستى بولىپ جاتقان جاپپاي نارازىلىق اكتسيالارىنان كەيىن ليۆان ۇكىمەتى وتستاۆكاعا كەتتى. بۇل تۋرالى Associated Press اگەنتتىگى ەلدىڭ دەنساۋلىق ساقتاۋ ءمينيسترى حامەد حاسانعا سىلتەمە جاساپ مالىمدەدى.

«ۇكىمەت تولىعىمەن تارادى. پرەمەر-مينيستر حاسان دياب قىزمەتىنەن كەتۋ تۋرالى ءوتىنىشىن تاپسىرۋ ءۇشىن پرەزيدەنت رەزيدەنتسياسىنا كەتتى»، - دەدى حاسان.

وسىعان دەيىن ەلدىڭ ادىلەت ءمينيسترى ماري-كلود نادجەم، اقپارات ءمينيسترى مانال ابدەل ساماد، قورشاعان ورتانى قورعاۋ ءمينيسترى داميانوس كاتتار جانە قارجى ءمينيسترى گازي ءۆازنيدىڭ قىزمەتىنەن كەتكەنى حابارلانعان.

8 تامىزدا وتكەن نارازىلىق اكتسيالارىنىڭ قاتىسۋشىلارىن كۇشپەن تاراتۋ كەزىندە 100-گە تارتا كىسى جاراقات الىپ، 22 ادام اۋرۋحاناعا تۇسكەن. قارسىلىق بىلدىرگەندەر ۇكىمەتتىڭ وتستاۆكاعا كەتۋىن جانە پورتتا ساقتالعان جۇكتەردىڭ قاۋىپسىزدىگىن قامتاماسىز ەتە الماعانى ءۇشىن ادامداردى جاۋاپقا تارتۋىن تالاپ ەتكەن.

4 تامىزدا بەيرۋت پورتىنداعى قويمادا 2014 جىلدان بەرى ساقتالىپ تۇرعان 2750 توننا اممياك سەليتراسى جارىلعان. كەمىندە 158 ادام قايتىس بولىپ، ونداعان ادام جوعالىپ كەتكەندەر قاتارىندا. بەس مىڭعا جۋىق ادام جاراقات الدى، 250 مىڭنان استام ادام باسپاناسىز قالدى. ەل بيلىگى قالانى قالپىنا كەلتىرۋ ءۇشىن بىرنەشە ميلليارد دوللار قاجەت ەكەنىن مالىمدەدى.

ليۆاندا ءبىر جىلعا جاقىن ۋاقىتتان بەرى ەكونوميكانىڭ ناشارلاۋىنا، ۆاليۋتانىڭ قۇنسىزدانىپ كەتۋىنە جانە ساياسي داعدارىسقا بايلانىستى نارازىلىق اكتسيالارى ءوتىپ كەلەدى. كوروناۆيرۋسقا بايلانىستى ەنگىزىلگەن كارانتين شارالارى دا ەل ەكونوميكاسىنا اۋىر سوققى بولىپ، ليۆان دەفولت الدىندا تۇرعان.

Abai.kz