بۇگىن وتكەن ۇكىمەت وتىرىسىندا ۇلتتىق ەكونوميكا ءمينيسترى رۋسلان دالەنوۆ 2020 جىلدىڭ قاڭتار-شىلدە ايلارىنداعى الەۋمەتتىك ەكونوميكالىق دامۋدىڭ قورىتىندىسى تۋرالى ايتىپتى. دالەنوۆتىڭ مالىمەتىنشە، جەتى ايدا قازاقستانداعى جالپى ىشكى ءونىم 2,9%-عا تومەندەگەن.

جالپى ىشكى ءونىمنىڭ تومەندەۋىنە بيىل قاڭتار-شىلدە ايلارىندا تاۋارلار ءوندىرىسىنىڭ 2,1%-عا ءوسىپ، كورسەتىلەتىن قىزمەتتەردىڭ 6,2%-عا قىسقارعانى اسەر ەتكەن.

سونداي-اق، مينيستر جىلدىق ينفلياتسيا 7,1% قۇراعانىن ايتتى. بۇل 8-8,5% دەپ  كۇتىلگەن ينفلياتسيا دالىزىنەن تومەن.

ال، اۋىل شارۋاشىلىعى، قۇرىلىس، وڭدەۋ ونەركاسىبى سالالارىندا ءوسىم بايقالعان كورىنەدى.

«وندىرىستىك سەكتوردا 2,1%-عا ءوسىم بايقالادى، ونىڭ ىشىندە قۇرىلىستا – 6,3%، وڭدەۋ ونەركاسىبىندە – 3,8%، اۋىل شارۋاشىلىعىندا – 2,5%-عا وسكەن. يمپورتتىڭ تومەندەۋى اياسىندا وڭ ساۋدا بالانسى ساقتالۋدا»، — دەدى ر. دالەنوۆ.

سونىمەن قاتار، كارانتيندىك شەكتەۋلەرگە بايلانىستى سەرۆيستىك قىزمەتتەر كولەمىنىڭ قىسقارىپ، مۇناي ءوندىرۋ قارقىنىنىڭ جوسپارلى تومەندەۋى بايقالاعان. ناتيجەسىندە تاۋ-كەن ءوندىرۋ ونەركاسىبى 0,4%-عا تومەندەگەن.

ال، 2020 جىلعى قاڭتار - شىلدە ايلارىنىڭ قورىتىندىسى بويىنشا مۇناي جانە كوندەنسات ءوندىرۋ كولەمى 51,5 ملن توننانى قۇراپتى. بۇل 2019 جىلدىڭ سايكەس كەزەڭىمەن سالىستىرعاندا 1,4%-عا تومەن.

سونىمەن قاتار ۇلتتىق ەكونوميكا ءمينيسترى قاڭتار-ماۋسىمدا سىرتقى ساۋدا اينالىمى $42,5 ملرد قۇراعانىن مالىمدەدى. ونىڭ ىشىندە، ەكسپورت $26 ملرد، يمپورت $16,5 ملرد بولعان. سونداي-اق، ەسەپتى كەزەڭدە نەگىزگى كاپيتالعا 6,1 ترلن تەڭگە سوماسىندا ينۆەستيتسيا تارتىلعان.

ودان بولەك، قاڭتار-شىلدە ايلارىندا قازاقستاندا مۇناي ەكسپورتى 42 ملن توننانى، گاز ءوندىرۋ كولەمى 33,4 ملرد تەكشە مەتردى، تابيعي گازدى ىشكى تۇتىنۋ كولەمى 9,5 ملرد تەكشە مەتردى، ۋران ءوندىرۋ كولەمى 11 873 مىڭ توننانى  قۇراعان. ال، سۇيىتىلعان مۇناي گازىن ءوندىرۋ كولەمى 1,8 ملن توننانى قۇراپ، ونىڭ 938 مىڭ تونناسى ىشكى نارىقتا پايدالانىلىپتى.

Abai.kz