بەلارۋستە قايتا پرەزيدەنت سايلاۋى تەك جاڭا كونستيتۋتسيا قابىلداعاننان كەيىن عانا بولادى دەپ مالىمدەدى الەكساندر لۋكاشەنكو مزكت زاۋىتىنا بارعان كەزىندە. بۇل جونىندە "ريا نوۆوستي" حابارلادى.

تاسس اگەنتتىگىنىڭ جازۋىنشا، لۋكاشەنكو جاڭا كونستيتۋتسيانى بۇكىلحالىقتىق رەفەرەندۋمدا قابىلداعاننان كەيىن عانا پرەزيدەنت سايلاۋى ءوتۋى مۇمكىن دەپ مالىمدەگەن.

BBC-ءدىڭ حابارلاۋىنشا، لۋكاشەنكو وزىنە قىسىم جاسالسا دا، بيلىكتەن باس تارتپايتىنىن ايتقان.

پرەزيدەنتتىكتەن ۇمىتكەر بولعان سۆەتلانا تيحانوۆسكايا جاڭا سايلاۋ وتكىزۋ ءۇشىن جانە رەفورما جۇرگىزۋ ءۇشىن جاۋاپكەرشىلىكتى وزىنە الىپ، ساياسي ليدەر بولۋعا دايىن ەكەنىن مالىمدەدى.

اقش پرەزيدەنتى دونالد ترامپ بەلارۋستەگى جاعدايدى "جان تۇرشىگەرلىك" دەپ اتاپ، بۇل جاعدايدى امەريكا باقىلاپ وتىرعانىن جەتكىزگەن.

بىرەر كۇن بۇرىن پولشا استاناسىندا سويلەگەن سوزىندە اقش مەملەكەتتىك حاتشىسى مايك پومپەو دا ۆاشينگتون بەلارۋستەگى جاعدايدى باقىلاپ وتىر دەپ مالىمدەگەن. ونىڭ ايتۋىنشا، ءوزىنىڭ ەو ليدەرلەرىمەن بايلانىستاعى ماقساتى – بەلارۋس حالقىنا "ەگەمەندىك پەن بوستاندىققا جەتۋىنە" كومەكتەسۋ.

Abai.kz