10 قىركۇيەك كۇنگى بريفينگ كەزىندە دەنساۋلىق ساقتاۋ ءمينيسترى الەكسەي تسوي ەلدە ەپيدەميولوگيالىق احۋال جاقسارعانمەن ەۋروپا، كورشى وزبەكستان، رەسەيدە جانە وزگە ەلدەردە ىندەتتىڭ ءورشۋى بايقالعاندىقتان ازىرگە قاشىقتان وقۋ فورماتىن ساقتاۋ دۇرىس دەگەن بايلامعا كەلگەن.

– ناۋرىز ايىنان بەرى ۇجىمداردى تاراتىپ، كارانتين ەنگىزىلگەنىنە قاراماستان ەلدە 2 418 بالاعا كوروناۆيرۋس جۇققان. 98 پايىزى جازىلعان. 34-ءى ەمدەلىپ جاتىر. ياعني، ۇجىمدار ينفەكتسيانىڭ تاراۋ ىقتيمالدىعىن كۇشەيتە تۇسەدى. ددسۇ مالىمەتىنشە، 12 جاسقا دەيىنگى بالالار كوروناۆيرۋس ينفەكتسياسىن ءالسىز بولسا دا تاراتا الادى. ال 12 جاس جانە ودان اسقاندار كوروناۆيرۋس ينفەكتسياسىن وتە جىلدام تاراتادى. ولار ۇيدەگىلەرگە، تاۋەكەل توپتارعا ۆيرۋس جۇقتىرۋى مۇمكىن، –دەدى تسوي.

ءبىلىم جانە عىلىم ءمينيسترى اسحات ايماعامبەتوۆتىڭ ايتۋىنشا، جاڭا وقۋ جىل باستالعالى بەرى وقۋشىلاردىڭ 24 پايىزى نەمەسە 800 مىڭى ءداستۇرلى فورماتتا وقىپ جاتىر، 2,6 ملن وقۋشى قاشىقتان ءبىلىم الىپ جاتىر. ول "ساباق ءجوندى وتپەي جاتىر" دەپ قوعامدا ايتىلىپ جاتقان سىندى جوققا شىعارىپ، ءتۇرلى ينتەرنەت-پلاتفورمالارعا كىرگەن ادامدار سانىن دالەل رەتىندە كەلتىردى.

ونىڭ سوزىنە قاراعاندا كۇن سايىن 2 ملن ساباق وتكىزىلەدى. مىسالى، Kundelik پلاتفورماسىنا كۇن سايىن 1 ملن تاپسىرما جۇكتەلىنەدى.

ءبىر كۇن بۇرىن اۋىلدىق جەرلەردەگى ينتەرنەت ساپاسىنىڭ تۇراقسىزدىعى، ءبىلىم سالاسىنداعى تسيفرلاندىرۋ پروتسەسىنىڭ باياۋ ءجۇرۋى، كوپ بالالى وتباسىلاردىڭ قۇرىلعىلارى جوق بولعاندىقتان بالالارىن دۇرىس وقىتا الماي وتىرعانى جايلى سىن ايتىلعان ەدى. ءماجىلىس دەپۋتاتى دانيا ەسپاەۆا "2016 جىلدان بەرى ءبىلىم جۇيەسىنە رەسپۋبليكالىق بيۋدجەتتەن شامامەن 28 ملرد تەڭگە ءبولىندى، ونىڭ ءبىر بولىگى مەكتەپتەردى ينتەرنەتپەن قامتاماسىز ەتۋى ءتيىس ەدى" دەپ مينيسترلىككە قارجىلىق تەكسەرۋ قاجەتتىگىن ايتقان.

10 قىركۇيەكتە مينيستر اسحات ايماعامبەتوۆ "2016 جىلدان بەرى 7 مىڭ مەكتەپتى ينتەرنەتپەن قامتاماسىز ەتۋگە 12 ملرد تەڭگە قارجى ءبولىندى. بۇل ترانسفەرت رەتىندە، ياعني اكىمدىكتەرگە جىبەرىلدى، ءارى قاراي ءبىلىم باسقارمالارى بيۋدجەتتەن بولىنگەن قارجىنى ينتەرنەتكە جۇمساۋى ءتيىس بولعان" دەپ جاۋاپ بەردى.

قازاقستاننىڭ مەكتەپتەرى مەن جوعارى وقۋ ورىندارى 1 قىركۇيەكتەن باستاپ قاشىقتان وقي باستاعان. ىندەتكە بايلانىستى تەك باستاۋىش سىنىپ وقۋشىلارى عانا اتا-انالارى رۇقسات بەرگەن جاعدايدا مەكتەپكە بارعان. شالعايداعى كەيبىر شاعىن مەكتەپ وقۋشىلارى دا ءداستۇرلى فورماتتا وقىپ جاتىر.

بۇعان دەيىن ءبىلىم جانە عىلىم مينيسترلىگى ەلدە جارتى ميلليونعا جۋىق بالانىڭ ينتەرنەتكە قوسىلماعانىن, 185 مىڭنان استام وقۋشىدا قاجەتتى قۇرىلعى جوق ەكەنىن مويىنداعان.

رەسمي مالىمەت بويىنشا، قازاقستاندا 3,4 ملن وقۋشى بار.

Abai.kz