قازاقستاندا ازىق-تۇلىك باعاسى مەن الەۋمەتتىك ماڭىزى بار تاۋارلار قىمباتتاپ جاتىر. بيلىك باعانى تۇراقتاندىرامىز دەپ ۋادە ەتسە، حالىق كوروناۆيرۋس ەپيدەمياسىنىڭ ەكىنشى تولقىنى باعانىڭ كۇرت ءوسىپ، تاۋار تاپشىلىعىنا اكەلەدى مە دەپ قاۋىپتەنەدى.

قازاقستاندا جىلدان جىلعا نە قىمباتتاپ جاتىر؟ پاتەر، كولىك، سوسىن ارينە ازىق-تۇلىك. قاڭتار ايىنان بەرى الەۋمەتتىك ماڭىزى بار تاۋارلار 4,5 پروتسەنتكە ءوستى دەپ مويىندايدى ساۋدا جانە ينتەگراتسيا ءمينيسترى باقىت سۇلتانوۆ.

"بىراق 2019 جىلدىڭ ءدال قازىرگى ۋاقىتىمەن سالىستىرعاندا، جالپى باعانىڭ ءوسىمى ەكى ەسەگە تومەن. باعانىڭ وسۋىنە نەگىزگى سەبەپ كارانتين ەنگىزۋگە بايلانىستى تاۋار اينالىمىنىڭ توقتاۋى",- دەپ اتاپ ءوتتى سۇلتانوۆ.

بىراق تۇرعىندار ازىق-تۇلىك باعاسى ەداۋىر قىمباتتادى دەيدى.

ازىق-تۇلىك جەتكىزۋمەن اينالىساتىن قازاقستاندىق كاسىپكەرلەر كوروناۆيرۋستىڭ ەكىنشى تولقىنىنان قاۋىپتەنەدى. تاعى دا كارانتين شارالارىن قاتايتىپ، باعا كۇرت ءوسۋى مۇمكىن دەيدى.

ەكونوميست ارمان بەيسەمباەۆ ەگەر كوروناۆيرۋستىڭ ەكىنشى تولقىنى مۇناي باعاسىنا اسەر ەتەتىن بولسا، دومينو ەففەكتىسىنە اكەلۋى مۇمكىن دەيدى.

"بىزدە بارلىق جەردە تەك يمپورت، ءجۇز پايىزدىق قازاقستاندىق ءونىم مۇلدەم جوق. سول سەبەپتەن دوللار باعامى وسسە، بىردەن ينفلياتسيا بولادى", - دەيدى ەكونوميست.

پرەمەر-مينيستر الەۋمەتتىك ماڭىزى بار تاۋارلاردىڭ باعاسىن ۇستاپ تۇرۋعا جەرگىلىكتى بيلىككە تاپسىرما بەردى. شەنەۋنىكتەر ازىق-تۇلىك باعاسىن ۇستاپ تۇرۋعا بيۋدجەتتەن 17 ميلليارد تەڭگە بولىنگەنىن مالىمدەدى.

Abai.kz