مەملەكەت باسشىسى، پرەزيدەنتىمىز توقاەۆ مىرزانىڭ نازارىنا!

قىتايمەن شەكارالاس جاتقان اۋدانداردان ەلدىڭ كوشۋى توقتاماي تۇر. شەكارا جىلدان جىلعا ەلسىز بوس قالىپ بارادى. كەزىندە، 1997 جىلى مامىر ايىندا پرەزيدەتتىڭ جارلىعىمەن، ەكونوميكالىق قيىندىقتاردى جەلەۋ ەتىپ، رەسپۋبليكاداعى كوپتەگەن اۋداندار ىرىلەندىرىلگەن بولاتىن. وعان شىعىستاعى شەكارا بويىنا ورنالاسقان ءتورت اۋدان ىلىككەن-تۇعىن، ولار; تارباعاتاي، مارقاكول، كاتون قاراعاي، ماقانشى اۋداندارى. سول جىلدارى، شىندىعىن ايتۋ كەرەك اۋدان تۇرعىندارى الماتى، سەمەي، وسكەمەن قالالارىنا، باسقا دا وبلىستارعا تىرلىك ءۇشىن ۇدەرە كوشۋدى باستاعان، كوش ءالى توقتاعان جوق. كوشى قوننىڭ باستى سەبەبى -  اۋدان ورتالىعىنىڭ جۇزدەگەن شاقىرىمعا الىستاۋىنىڭ سالدارىنان ادامداردىڭ كۇن كورىستەرىنىڭ قيىنداۋى، بۇرىنعى اۋدان ورتالىقتارىنىڭ ازام توزگىسىز جاعدايدا قيراۋى، ءبۇلىنۋى اسەر ەتۋدە.

شەكارا جالاڭاشتانىپ بارادى. قانشاما ەلدى مەكەندەر جويىلىپ، قانشاما اۋىلداعى مەكتەپتەر، وقيتىن بالالاردىڭ جوقتىعىنان جابىلىپ قالدى. ءالى دە جابىلادى. بۇل جونىندە كەيىنگى كەزدە اۋدان تۇرعىندارى ءجيى دابىل قاعا باستادى. وكىنىشكە وراي حالىقتىڭ زارىنا ازىرگە قۇلاق اسىپ وتىرعان ەشكىم جوق!

كوشى قوندى توقتاتۋدىڭ، قالالاردان كەزىندە كوشىپ كەتكەندەردى قايتارۋدىڭ، ءبىر سوزبەن ايتقاندا كوشتىڭ باسىن قايتادان كەرى شەكارا اۋداندارىنا بۇرۋدىڭ ەڭ باستى جولى، كەزىندە ىرىلەندىرىلگەن شەكارا بويىندا ورنالاسقان اۋدانداردى قايتا قۇرۋ!!! الماتى وبلىسىندا بۇل ماسەلە وڭ شەشىمىن تاپتى، شىعىستا ازىرگە تىنىشتىق!

ايماق تۇرعىندارى، حالىقتى تىڭدايتىن، تالاپ تىلەگىنە قۇلاق اساتىن مەملەكەتتىڭ باسشىسى رەتىندە، سىزدەن عانا زور ءۇمىت كۇتەدى!

ءتۇسىپحان تۇسىپبەكوۆتىڭ جازباسى

Abai.kz