رەسەيدىڭ سامارا وبلىسىندا 4 282 وزبەك ميگرانتى تاعى بوگەلىپ قالدى. ولار شەكارا جابىق بولۋىنان ۇيىنە قايتا الماي تۇر. بۇل جونىندە سامارا وبلىسىنىڭ اكىمدىگى حابارلادى.
شەكارا ماڭىنا شاتىر قۇرىلىپ، ميگرانتتارعا ازىق-تۇلىك، سۋ جەتكىزىلگەن. سونىمەن بىرگە ولاردىڭ قاۋىپسىزدىگى قورعالىپ جاتىر دەيدى.
وزبەكستان بيلىگى 12-14 قىركۇيەك ارالىعىندا 1,5 مىڭ ازاماتىن پويىزبەن الىپ كەتكەن. ەندى كەلەسى پويىز 19 قىركۇيەكتە كەلەدى. نوۆوسيبيرسك وبلىسىنا دا تاشكەنتەن پويىز جىبەرىلگەن. سونىمەن بىرگە ماسكەۋ، قازان، روستوۆ-نا-دونۋ، سانكت-پەتەربۋرگ، ەكاتەرينبۋرگ جانە نوۆوسيبيرسكىدەن وزبەكستانعا ۇشاقتار ۇشىپ جاتىر.
كوروناۆيرۋس پاندەمياسى باستالعالى بەرى ميگرانتتاردىڭ دەنى رەسەيدە جۇمىسسىز قالىپ، ەلىنە قايتۋعا ءماجبۇر بولىپ جاتىر. كوكتەمنەن بەرى ورىس-قازاق شەكاراسىندا ميگرانتتار ۇنەمى جينالىپ قالادى. كورشى ەلدەردىڭ بيلىك وكىلدەرى كەلىسسوز جۇرگىزگەننەن كەيىن بارىپ، ولاردى ارنايى كولىك نە ۇشاقپەن الىپ كەتىپ جاتىر.
مامىر ايىنان بەرى وزبەكستان سامارا وبلىسىندا بوگەلىپ قالعان 8,5 مىڭ ازاماتىن الىپ كەتكەن.
سوڭعى مالىمەتتەر بويىنشا، قازاق-ورىس شەكاراسىندا 3300 قىرعىز ازاماتى ەلىنە قايتا الماي تۇر. رەسەيدەگى قىرعىز ەلشىسى اليكبەك جەكشەنكۋلوۆ قازىر قازاقستان تارابىمەن كەلىسسوز جۇرگىزىپ جاتقانىن مالىمدەدى.
قازاقستان كوروناۆيرۋس پاندەمياسى باستالعالى بەرى شەكارالارىن ءالى رەسمي اشقان جوق.
Abai.kz
