سەيسەنبى, 27 قازان 2020
COVID-19 قازاقستاندا. جۇقتىرعاندار — 110542. جازىلعاندار — 105675. قايتىس بولعاندار — 1796
بيلىك 1385 13 پىكىر 17 قىركۇيەك, 2020 ساعات 14:58

قاشىقتان ءبىلىم بەرۋگە بيۋدجەتتە اقشا بار ما؟

مۇحتار قۇل-مۇحاممەد قاشىقتان وقىتۋ كەزىندە تۋىنداعان ماسەلەلەرگە قاتىستى دەپۋتاتتىق ساۋال جولدادى. بۇل تۋرالى سەناتتىڭ ءباسپاسوز قىزمەتى حابارلادى. 

ۇكىمەت باسشىسىنىڭ اتىنا جولدانعان ساۋالدا دەپۋتات قاشىقتان وقىتۋعا قاتىستى وزەكتى ماسەلەلەرگە نازار اۋدارعان. سەناتور وتاندىق ونلاين ءبىلىم بەرۋ پلاتفورمالارىنا ورتاق كەمشىلىك رەتىندە ولاردىڭ جۇمىس ىستەۋ جىلدامدىعىنىڭ تومەندىگىن ايتتى. ونىڭ سوزىنە قاراعاندا، ينتەرنەت-ترافيكتىڭ ءدال سونداي كولەمىمەن شەتەلدىك ونلاين رەسۋرستار مەن قوسىمشالار اناعۇرلىم تەز جۇمىس ىستەيدى. وسىعان وراي دەپۋتات جاڭا ونلاين ءبىلىم پلاتفورماسىن ازىرلەگەن كەزدە وسى ماسەلەنىڭ ەسكەرىلگەنى ورىندى ەكەنىن اتاپ ءوتتى.

سونداي-اق، ساۋالدا قاشىقتان وقىتۋ بارىسىندا، اسىرەسە، شەتەلدىك قوسىمشالاردى پايدالانعان كەزدە بالالاردىڭ قاۋىپسىزدىگىن قامتاماسىز ەتۋ، جات بەينەجازبالاردىڭ تاراپ كەتپەۋىنىڭ الدىن الۋ، كەزەكشى سىنىپتاردى ۇيىمداستىرۋ جانە ءبىلىم الۋ ۇدەرىسىنە ءماجبۇرلى تۇردە قاتىسا الماي وتىرعان از قامتىلعان وتباسىلار بالالارىنىڭ سانىنا تالداۋ جۇرگىزۋ جۇمىستارىنا باسا ءمان بەرىلگەن.

وسى ايتىلعان ماسەلەلەردى ەسكەرە كەلە سەناتور مەملەكەت باسشىسىنىڭ بىرىڭعاي ءبىلىم بەرۋ ونلاين-پلاتفورماسىن قۇرۋ تۋرالى تاپسىرماسى ناقتى قانداي مەرزىمدە ىسكە اسىرىلاتىنىن سۇرادى.

«ونلاين ءبىلىم بەرۋ پلاتفورماسىن قۇرۋعا مۇددەلى مەملەكەتتىك ورگانداردىڭ ءوزارا ءىس-قيمىلى ايقىندالدى ما؟ پروتسەستى جىلدامداتۋعا تەحنيكالىق مۇمكىندىكتەر بار ما؟ بۇل جۇمىسقا بيۋدجەتتەن قوسىمشا شىعىندار قاراستىرىلعان با؟ قاشىقتان وقىتۋ اياسىندا ازاماتتاردىڭ تەگىن ورتا ءبىلىم الۋى ءۇشىن كونستيتۋتسيالىق كەپىلدىكتەر قامتاماسىز ەتىلگەن بە؟»، – دەدى مۇحتار قۇل-مۇحاممەد.

سونداي-اق، ساۋال بارىسىندا ۇزاق مەرزىمدى قاشىقتان وقىتۋدىڭ سالدارىنان ءبىلىم بەرۋ دەڭگەيىنىڭ تومەندەۋىمەن بايلانىستى الداعى ۋاقىتتا قانداي شارالاردى قولعا الىناتىنى جانە ءارتۇرلى الەۋمەتتىك توپتارداعى ءبىلىم الۋشىلاردىڭ اراسىنداعى ءبىلىم بەرۋ دەڭگەيىنىڭ الشاقتىقتىعىن ازايتۋ بويىنشا ۇكىمەتتىڭ قانداي جوسپارى بار ەكەنى سۇرالدى.

Abai.kz

13 پىكىر