امەريكالىق Rutgers University-ءنىڭ پروفەسسورى سەرگەي ەروفەەۆ رەسەي وپپوزيتسياسىنىڭ جەتەكشىسى الەكسەي ناۆالنىيدىڭ نوبەل سىيلىعىنا ۇسىنىلعانىن ايتتى.

ناۆالنىيدىڭ نوبەلگە ۇسىنىلعانى تۋرالى ورىس اقپارات قۇرالدارى دا اق تەر، كوك تەر بولىپ، جازىپ جاتىر ەكەن. ال ورىس سەناتورى ولەگ موروزوۆ ناۆالنىيدىڭ نوبەلگە ۇسىنىلۋىن «باتىستىڭ لاس ويىنى»، دەپ باعالاپتى.

«مەن ونىڭ بۇل سىيلىقتى الاتىنىنا كۇمانمەن قارايمىن. بىراق، الىپ قالۋى دا مۇمكىن. مۇنداعى كۇلكىلى ءبىر جايت: مىنە، بىرنەشە كۇننەن بەرى ساراپشىلار ناۆالنىيدىڭ بۇل سىيلىقتى الاتىنىن بولجاپ جاتىر. ياعني، بۇل ابسۋردتىڭ لوگيكاسى الدىن الا بەلگىلى بولعان»، - دەپتى ورىس پارلامەنتىنىڭ دەپۋتاتى.

پروفەسسور سەرگەي ەروفەەۆ تە بۇل اقپارات تۋرالى ءوز پىكىرىن Facebook-تا جاريالاپتى.

«مەن نەگە ناۆالنىيدى نوبەلگە ۇسىنۋعا قارسىمىن؟ ءيا، ناۆالنىي وتە جاقسى جانە كۇرەسكەر ساياساتكەر. بىراق، باياعىدا-اق، ساياسي ويىنداردىڭ قۇرالىنا اينالىپ كەتكەن بەيبىتشىلىك سىيلىعىنىڭ كەرەگى، قاتىسى نە؟

بۇعان قاتىستى پىكىر: ارينە، بۇل سىيلىق ساياسي ويىنداردىڭ قۇرالىنا اينالعان، ال ونىمەن ءدال قازىر ناۆالنىيدى ماراپاتتاۋ - ونىڭ (ناۆالنىيدىڭ) فيزيكالىق ءومىرى ءۇشىن كۇرەسى جولىندا بۇل ينسترۋمەنتتى دۇرىس قولدانا ءبىلۋ دەگەن ءسوز.

وعان قوسا، سىيلىقپەن بىرگە بەرىلەتىن ميلليون دوللار - فبك ىسىنە قاتىستى سوت مىندەتتەگەنى بويىنشا پريگوجينگە بەرىلۋى ءتيىس سومامەن بىردەي. بىلايشا ايتقاندا، ۋدى ۋمەن قايتارۋ. بۇدان وتكەن كۇلكىلى پىكىر بولا ما؟ بەيبىتشىلىك سىيلىعىڭىڭ اقشاسىن ترولدەر مەن سودىرلاردى قارجىلاندىرىپ وتىرعان ادامعا بەرۋ؟.. بۇل پۋتيندىك جۇيەدەگى ابسۋردتىق تسيركتىڭ كۋلميناتسياسى بولار ەدى»، - دەپتى ول.

نوبەل سىيلىعى 1901 جىلدان باستاپ بەيبىتشىلىككە ەرەكشە ۇلەس قوسقان ادامدار مەن ۇيىمدارعا بەرىلەدى.

ايتا كەتەيىك، 20 تامىزدا ناۆالنىي تومسكىدەن ماسكەۋگە ۇشقان. الايدا، ونىڭ جاعدايى كۇرت ناشارلاۋىنا بايلانىستى ۇشاق ومبىعا شۇعىل قونعان. ناۆالنىي سول جەرەگى № 1 جەدەل جاردەم اۋرۋحاناسىنىڭ رەانيماتسيا بولىمىندە جاتقىزىلعان.

22 تامىز كۇنى تاڭەرتەڭ ونى ۇشاقپەن بەرلين Charite كلينيكاسىنا الىپ باردى.

2 قىركۇيەكتە گەرمانيا ۇكىمەتى ناۆالنىيدىڭ دەنەسىنەن قۇرامى جاعىنان نوۆيچوكقا ۇقساس زاتتىڭ ىزدەرى تابىلعانىن حابارلادى.

ساياساتكەردەن الىنعان بيولوگيالىق ماتەريال گەرمانيانىڭ قارۋلى كۇشتەرىنىڭ ارنايى زەرتحاناسىندا زەرتتەلگەن. ناۆيچوك توبىنىڭ ۋلارىمەن ناۆالنىيدىڭ ۋلانۋ فاكتىسىن فرانتسيا مەن شۆەتسياداعى زەرتحانالار دا راستادى.

ال رەسەي سىرتقى ىستەر مينيسترلىگى ناۆالنىيدىڭ ۋلانۋىنا قاتىستى مالىمدەمەلەر فاكتىلەرمەن راستالماعانىن مالىمدەدى. رەسەيدىڭ سىرتقى بارلاۋ قىزمەتىنىڭ باسشىسى سەرگەي نارىشكين گەرمانياعا اتتانار كەزدە ساياساتكەردىڭ دەنەسىندە ۋدىڭ ىزدەرى بولماعانىن ايتتى.

Charite كلينيكاسىنىڭ دارىگەرلەرى 7 قىركۇيەكتە ناۆالنىيدى مەديتسينالىق كومادان شىعارىپ، تىنىس الۋ اپپاراتىنان اجىراتقانىن حابارلادى.

14 قىركۇيەكتە نەمىس دارىگەرلەرى ساياساتكەردىڭ ءوزىن جاقسى سەزىنەتىنىن جانە قازىردىڭ وزىندە اياققا تۇرعانىن حابارلادى.

15 قىركۇيەكتە رەسەيلىك وپپوزيتسيونەر Instagram پاراقشاسىندا ۋلانۋدان كەيىنگى العاشقى جازباسىن جاريالادى.

15 قىركۇيەك كۇنى ەۋرووداق جاڭا سانكتسيالاردى ناۆالنىيدىڭ اتىمەن اتاۋدى ۇسىندى. ادام قۇقىقتار مەن گۋمانيتارلىق قۇقىقتاردىڭ بۇزىلۋىنا قاتىستى ەۋرووداق ازىرلەپ جاتقان جاھاندىق سانكتسيانى ناۆالنىيدىڭ اتىمەن اتاعان دۇرىس. بۇل پىكىردى ەو سىرتقى ساياسات جانە ساياي قاۋىپسىزدىك جونىندەگى جوعارعى توراعاسى جوزەپ بوررەل ايتقان.

17 قىركۇيەك كۇنى ەۋروپارلامەنت دەپۋتاتتارى ناۆالنىيدىڭ ۋلانۋىنان كەيىن رەسەيگە قارسى سانكتسيالاردى كۇشەيتۋ تۋرالى رەزوليۋتسيانى قابىلدادى.

ەۋرووداق ەلدەرى ناۆالنىيدى نوبەلدىڭ بەيبىتشىلىك سىيلىعىنا ۇسىنىپ جاتقاندا رەسەي پرەزيدەنتى ۆلاديمير پۋتين دە سىيلىقتان قۇرالاقان قالماپتى.

18 قىركۇيەكتەگى اقپارات. اقش-تىڭ گارۆارد ۋنيۆەرسيتەتىندە شنوبەل سىيلىعى ۇلەستىرىلگەن ەكەن. شنوبەل - عىلىمداعى كۇماندى جانە ابسۋردتى دەگەن عىلىمي ەڭبەكتەر ءۇشىن بەرىلەتىن ءازىل سىيلىق.

بۇل سىيلىقتىڭ 2020 جىلعى يەگەرلەرىنىڭ قاتارىندا بىرنەشە مەملەكەتتىڭ باسشىلارى بار ەكەن. اتاپ ايتقاندا، رەسەي پرەزيدەنتى ۆلاديمير پۋتينگە، اقش پرەزيدەنتى دونالد ترامپقا جانە بەلارۋس پرەزيدەنتى الەكساندر لۋكاشەنكوعا بەرىلگەن.

«مەديتسينالىق ءبىلىم بەرۋ سالاسى بويىنشا شنوبەل ءازىل سىيلىعى برازيليا، ۇلىبريتانيا، ءۇندىستان، مەكسيكا، بەلارۋس، اقش، تۇركيا، رەسەي جانە تۇركىمەنستان ليدەرلەرىنە ادام ءومىرى مەن ولىمىنە عالىمدار مەن دارىگەرلەردەن گورى ساياساتكەرلەردىڭ كۇشتىرەك ىقپال ەتەتىنىن الەمگە ۇيرەتۋ ءۇشىن كوروناۆيرۋس پاندەمياسىن ءساتتى پايدالانعانى ءۇشىن بەرىلەدى»، - دەپتى سىيلىقتى ۇيلەستىرۋشى مارك ابراحامس.

كەرىمسال جۇباتقانوۆ

Abai.kz