بۇگىنگى تاڭدا جەرگىلىكتى اتقارۋشى ورگاندار ەلىمىزدەگى مەكتەپتەر مەن كوللەدجدەرگە كومپيۋتەرلىك تەحنيكا ساتىپ الۋدا. وسىعان بايلانىستى مەملەكەتتىك قاراجاتتىڭ اشىقتىعى تولىق قامتاماسىز ەتىلىپ، ۇقىپتى جۇمسالۋى قاجەت.

بۇگىنگى تاڭدا قر ءبىلىم جانە عىلىم مينيسترلىگىمەن ارنايى رەسۋرس دايىندالىپ جاتقانىن ايتا كەتكەن ءجون. بۇل جەردە جەرگىلىكتى اتقارۋشى ورگاندار مەن ءبىلىم بەرۋ ۇيىمدارىنىڭ وكىلدەرى قازاقستاندىق مەكتەپتەر مەن كوللەدجدەرگە تەحنيكالىق جابدىقتاردى ساتىپ الۋ ءۇردىسىنىڭ اشىقتىعىن قامتاماسىز ەتۋ ءۇشىن اقپارات ورنالاستىرا الادى. سونىمەن قاتار ءار ءتۇرلى دەڭگەيدەگى ءبىلىم بيۋدجەتى تۋرالى باسقا دا اقپاراتتى كورۋگە بولادى. بۇل تۋرالى بۇگىن ءبىلىم جانە عىلىم ۆيتسە-ءمينيسترى رۇستەم بيعاري Facebook-تەگى پاراقشاسىندا جازدى.

«بيۋدجەتتىك قارجىلاندىرۋ جانە ساتىپ الۋ ماسەلەلەرىنە قاتىستى مينيسترلىكتىڭ ۇستانىمى مىناداي: تولىق اشىقتىق قامتاماسىز ەتىلۋى ءتيىس جانە مەملەكەتتىك قاراجات ۇقىپتى جۇمسالۋى قاجەت. مەكتەپتەر مەن كوللەدجدەر ءۇشىن قارجىلاندىرۋ مەن ساتىپ الۋدى اكىمدىكتەر نەمەسە ءبىلىم بەرۋ ۇيىمدارى (مەكتەپتەر، كوللەدجدەر) جۇزەگە اسىرادى. مۇنى ءبارى بىلە بەرمەيدى. قازىرگى ۋاقىتتا مەكتەپتەرگە كومپيۋتەرلەردى جەرگىلىكتى اتقارۋشى ورگاندار ساتىپ الىپ جاتىر. ساتىپ الۋ پروتسەدۋراسى اشىق جۇرگىزىلۋى ءتيىس. قاجەت بولعان جاعدايدا، ماتەريالدار مەن فوتوسۋرەتتەردى ارنايى مونيتورينگتىك توپ مۇشەلەرىنە بەرۋ قاجەت»، – دەپ اتاپ ءوتتى قر ءبىلىم جانە عىلىم ۆيتسە-ءمينيسترى رۇستەم بيعاري.

سونداي-اق  «اتامەكەن» ۇكپ، تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى جانە قر ءبىلىم جانە عىلىم مينيسترلىگىمەن جابدىقتارعا، سەرۆيستىك قىزمەت كورسەتۋگە، كەپىلدىكتەرگە، سونىمەن قاتار باسقا دا اسپەكتىلەرگە قويىلاتىن ەڭ تومەنگى تالاپتار كەلىسىلىپ، ۇسىنىمدار رەتىندە جەرگىلىكتى اتقارۋشى ورگاندارعا جىبەرىلگەنىن ەستەرىڭىزگە سالامىز.

بۇعان دەيىن ءبىلىم جانە عىلىم مينيسترلىگى جەرگىلىكتى اكىمدىكتەرگە تەحنيكالىق جابدىقتاردى جەتكىزۋشىلەردى ىرىكتەۋ بارىسىن قوعام بەلسەندىلەرىمەن، ارنايى مونيتورينگتىك توپ وكىلدەرىمەن بىرلەسىپ ۇيىمداستىرۋدى ۇسىندى.

Abai.kz