وسىعان دەيىن سايتىمىزدا «وسپان باتىردىڭ ۇرپاقتارى پرەزيدەنتتەن اراشا سۇرايدى» اتتى ماقالا جاريالانعان ەدى. وندا قىتايدىڭ قىزىل ۇكىمەتى وسپان باتىردىڭ ءۇش بىردەي ۇرپاعىن ءجونسىز جالامەن ءومىربويى قاماۋعا ۇكىم ەتكەنى جازىلعان. ءارى حالىقارالىق ۇيىمداردان جانە قازاقستان بيلىگىنەن وسى باسسىزدىققا اراشا سۇراعان بولاتىن. 

بۇگىن، 2 قازاندا اتالعان ازاماتتاردىڭ قازاقستانداعى تۋىستارى ءباسپاسوز جيىنىن وتكىزگەلى وتىر ەكەن. ءباسپاسوز جيىنى الماتى قالاسىندا وتەدى.

وسپان باتىردىڭ ۇرپاقتارىنا اراشا سۇرايدى! زيالى قاۋىم وكىلدەرى، قوعام بەلسەندىلەرى مەن تۋىستارى قىتايدا ءومىر بويى باس بوستاندىعىنان ايىرۋعا ۇكىم ەتىلگەن وسپان باتىردىڭ ۇرپاقتارىنا قازاق بيلىگىنەن، ادام قۇقىعىن قورعايتىن حالىقارالىق ۇيىمداردان اراشا سۇراپ، ءباسپاسوز جيىنىن وتكىزبەك.

قىتاي بيلىگىنىڭ شىڭجاڭداعى از ساندى ۇلتتارعا جاساپ جاتقان قىسىمى ونداعى قازاق قانداستارىمىزدىڭ ەركىندىگىن، ادامي قۇقىعىن اۋىر دارجەدە بۇزۋمەن بىرگە، بەلگىلى دەڭگەيدە قازاقستان ازاماتتارىنا دا ءوزىنىڭ كەرى اسەرىن تيگىزىپ وتىر. كەيبىر قر ازاماتتارىنىڭ ونداعى تۋىستارى، وتباسى مۇشەلەرى ءتۇرلى ايىپتارمەن قۋدالانۋدا.

قحر شۇار التاي ايماعى كوكتوعاي اۋدانىندا تۇراتىن نۇرلان ءنابيۇلى (وسپان باتىردىڭ نەمەرەسى), ناعىز مۇحاممەدۇلى (وسپان باتىردىڭ نەمەرەلەس اعايىندارىنىڭ ۇرپاعى), تولقىن سوعىسايۇلى (وسان باتىردىڭ اتالاس اعايىندارىنىڭ ۇرپاعى) 2017 جىلدىڭ جەلتوقسان ايىنان 2018 جىلدىڭ ناۋرىزىنا دەيىن ارت-ارتىنان قاماۋعا الىنعان. ۇزاق ۋاقىت اۋىر قيناۋ كورگەن ولارعا قاتىستى العاشقى سوت وتىرىسى ەكى جارىم جىلدان كەيىن عانا، 2020 جىلى 10 شىلدەدە وتكەن. 24 قىركۇيەك كۇنى اتالعان ءۇش ازاماتقا كوكتوعاي اۋداندىق ورتا سوتى «ۇلتشىل»، «وتان تۇتاستىعىنا قاۋىپ ءتوندىرۋشى» دەگەن اۋىر ايىپتارمەن قاتار «قازاقستاننىڭ تاۋەلسىزدىك كۇنىن قۇتتىقتاپ قوناعاسى بەرگەن» دەگەن ايىپتار تاعىپ ءومىر بويى باس بوستاندىعىنان ايىرۋعا ۇكىم شىعارعان.

ايىپتالعان ازاماتتار سوت وتىرىسىندا وزدەرىنە تاعىلعان ايىپتاردى جوققا شىعارعان جانە نەگىزسسىز ايىپتاپ، اۋىر قيناۋ كورسەتىپ دەنساۋلىقتارىنا اۋىر زارداپ كەلتىرگەن كوكتوعاي اۋداندىق قوعام قاۋىپسىزدىك مەكەمەسى مەن ۇلتتىق قاۋىپسىزدىك بيۋروسىنىڭ ارەكەتىن قايتا قاراۋدى تالاپ ەتكەن. سوت ۇكىمىمەن مۇلدە كەلىسپەيتىندەرىن اشىق بىلدىرگەن.

ءباسپاسوز جيىنىنىڭ ۋاقىتى: 2 قازان 2020 ج. 14:00

ورىنى: ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسى، (بتس كازينۆەستستروي، 8-ي ميكرورايون، 4ا، 4 ەتاج).

Abai.kz