قۇرمەتتى دوستار!

ساعات 15.00-دەگى مالىمەت بويىنشا «پرايمەريز» جۇيەسىنىڭ جۇمىسى ءبىر قالىپقا ءتۇستى. پارتيالاستاردىڭ بارلىعى داۋىس بەرە الادى، تەحنيكالىق ىركىلىستەر شەشىمىن تاپتى.

وسى ساتكە دەيىن ەل كولەمىندە 390 مىڭنان اسا پارتيالىق ءوز تاڭداۋىن جاساپ ۇلگەردى. بۇل – جۇيەدە تىركەلگەن بارلىق ادامنىڭ جارتىسىنا جۋىق، ياعني 49%-دان استامى.

ينتەرنەتكە كىرۋ مۇمكىندىگى جوق جەرلەردە تۇراتىن پارتيالىقتار ەرتەڭ، 3 قازاندا ارنايى سايلاۋ ۋچاسكەلەرىندە قاعاز بيۋللەتەندەر ارقىلى داۋىس بەرە الادى. قولدا بار اقپاراتقا سايكەس، 82 214 پارتيالىق قاعاز بيۋللەتەن ارقىلى داۋىس بەرۋ قۇقىعىن پايدالانادى.

اقپاراتتىق جۇيەدەگى سۇرانىستاردى وڭدەۋگە بايلانىستى ىركىلىستەر مەن قيىندىقتار بويىنشا احۋالدى جان-جاقتى تۇسىندىرە كەتەيىن.

ەلەكتروندى فورماتتا داۋىس بەرۋ قازاقستاندا عانا ەمەس، بۇكىل ورتا ازيادا تۇڭعىش رەت وتكىزىلىپ وتىر. پرايمەريزدىڭ العاشقى كۇنىنەن باستاپ ءبىز جۇيەگە تۇسەتىن سالماقتىڭ اسا اۋىر بولاتىنىن تۇسىندىك.

كەشەدەن بەرى پارتيالىقتار مەن قوعام تاراپىنىڭ نازارى جاپپاي پرايمەريزدە داۋىس بەرۋ بارىسىنا اۋدى. ءبىر مەزەتتە كوپ ادامنىڭ اقپاراتتىق جۇيەگە كىرىپ وتىرۋى تەحنيكالىق اقاۋلىقتار تۋدىرىپ جاتىر.

سونىمەن بىرگە كانديداتتار مەن ولاردىڭ سەنىمدى تۇلعالارى دا ونلاين رەجيمىندە داۋىس بەرۋ بارىسىن ءجىتى قاداعالاپ وتىرعانىن بىلەمىز. كەشەدەن بەرى جۇيەدە تۇراقتى تۇردە 50 مىڭنان استام پايدالانۋشى وتىر. جەلىلىك اۋىرتپالىق نەگىزىنەن ەكى باعىتتا: داۋىس بەرۋ پروتسەسى مەن ناتيجەسىن بەلگىلەۋگە ءتۇسىپ تۇر.

وتكەن تۇندە اقپاراتتىق جۇيەنىڭ ماماندارى ءوندىرتىپ جۇمىس ىستەدى. سۇرانىستارعا وڭتايلاندىرۋ جۇرگىزىلدى. ەندى داۋىس بەرۋ جانە ونىڭ ناتيجەلەرىن قاراۋ فۋنكتسيالارى ەكى سەرۆەر مەن ينتەرنەت-سايتقا ءبولىندى.

داۋىس بەرۋ https://vote.primaries.kz/ ارنايى ءبولىمى ارقىلى جۇرگىزىلىپ، ال ناتيجەلەرى https://primaries.kz/ پورتالىندا شىعارىلادى.

ەندى داۋىس بەرۋ ناتيجەلەرىن primaries.kz سايتىندا عانا كورۋگە بولادى. سونداي-اق، داۋىس بەرۋ ناتيجەلەرىن وڭدەۋ مەن ارالىق قورىتىندىلارىن شىعارۋ كەستەسى دە جاڭارتىلدى. دەرەكتەر ءاربىر 30 مينۋت سايىن جاڭارتىلىپ وتىرادى. ءبىر مەزەتتە وتە اۋقىمدى كولەمدەگى سۇرانىستاردىڭ تۇسۋىنە بايلانىستى داۋىس بەرۋ ناتيجەلەرى باياۋ جۇكتەلۋى مۇمكىن.

تەحنيكالىق قىزمەت جۇمىسى تاۋلىكتىك رەجيمگە كوشىرىلدى.

تاعى دا اتاپ وتەيىن، «پرايمەريز» جۇيەسى داۋىس بەرۋدىڭ قۇپيالىلىعىن قامتاماسىز ەتەدى. ءاربىر داۋىس ەسەپكە الىنادى، وڭدەلەدى جانە جۇيەدە كورسەتىلەدى.

قۇرمەتتى پارتيالاستار!

پرايمەريزدە ۇگىت جۇمىستارىن جۇرگىزۋ كەزىندە شىنايى باسەكەلەستىك بولدى دەپ سانايمىن. داۋىس بەرۋدىڭ سوڭعى ناتيجەلەرى شىققانعا دەيىن ءالى ۋاقىت بار. تۇجىرىم جاساۋعا، قورىتىندى شىعارۋعا ءالى ەرتە. بارشا پرايمەريز قاتىسۋشىلارىن ۇگىتتەۋ قارقىنىن باسەڭدەتپەي، سوڭعى ساتكە دەيىن ءاربىر داۋىس ءۇشىن كۇرەسۋگە شاقىرامىن!

داۋىس بەرۋشىلەردى ماجبۇرلەۋگە جانە ولارعا قىسىم كورسەتۋگە جول بەرۋگە بولمايدى. ءسىز ءۇشىن شەشىم قابىلداۋعا ەشكىمنىڭ قاقىسى جوق! بۇل – ءسىزدىڭ قۇقىعىڭىز جانە پارتيانىڭ عانا ەمەس، ەلىمىزدىڭ بولاشاعى ءۇشىن قابىلدايتىن شەشىم ءۇشىن جەكە جاۋاپكەرشىلىگىڭىز.

ءادىل داۋىس بەرۋ تالابىن بۇزۋدىڭ قانداي دا ءبىر جولىنا قاتاڭ توسقاۋىل قويىلدى. ايىپتى بولعاندارعا ءتيىستى شارا قولدانامىز. پارتيالىق باقىلاۋ كوميتەتى كۇشەيتىلگەن رەجيمدە جۇمىس جاساۋدا. ەرەجە بارشاعا ورتاق، ەشكىمگە ارتىقشىلىق بەرىلمەيدى.

وسى ورايدا، قاداپ ايتاتىن نارسە – جالاڭ ايىپتاۋ بولماۋى ءتيىس. بارلىق ارىز-شاعىمدى ناقتى فاكتىلەرمەن نەگىزدەۋ قاجەت.

قازىرگى كەزدە پارتيالىق باقىلاۋ كوميتەتى لاۋرا ماليكوۆانىڭ مالىمدەمەسىندە ايتىلعان داۋىس بەرۋدى بۇرمالاۋ فاكتىلەرىنە قاتىستى تەكسەرۋ جۇرگىزىپ جاتىر. ەگەر ولار راستالسا، وندا ءتارتىپ بۇزۋشىلىققا جول بەرگەن كانديدات دودادان شىعارىلاتىن بولادى.

مىسالى، تۇركىستان جانە اقمولا وبلىستارىندا پارتيالىقتاردى داۋىس بەرۋگە ماجبۇرلەمەكشى بولعان ازاماتتار «Nur Otan»-نان شىعارىلىپ، جاۋاپكەرشىلىككە تارتىلدى. نۇر-سۇلتان قالاسىندا پرايمەريزگە قاتىسۋشى 3 كانديدات تىركەۋدەن شىعىپ قالدى. ولاردىڭ قاتارىندا الماتى اۋداندىق فيليالى توراعاسىنىڭ ءبىرىنشى ورىنباسارى دا بار. «پرايمەريز» اقپاراتتىق جۇيەسىندە پارتيا مۇشەلەرىن تىركەۋ كەزىندە ءتارتىپ بۇزۋشىلىققا جول بەرگەنى ءۇشىن بالقاش قالالىق فيليالى توراعاسىنىڭ ءبىرىنشى ورىنباسارىنا، «ارداگەر» بپۇ، «گۇلدەر» بپۇ، «ستانتسيا بالحاش» بپۇ مەن «شيپاگەر» بپۇ توراعالارىنا تارتىپتىك جازا قولدانىلدى.

ءتارتىپ بۇزۋشىلىقتار مەن جازالاۋلار تۋرالى مالىمەتتەردى اقپارات قۇرالدارى ارقىلى جاريالاپ وتىرمىز.

كەز كەلگەن ءتارتىپ بۇزۋشىلىق بويىنشا (800) 080 4441 (قوڭىراۋ شالۋ تەگىن) جەدەل جەلىسىنە نەمەسە komek@nurotan.kz ەلەكتروندى پوچتاسىنا حابارلاسۋعا بولادى.

پارتيا پرايمەريزدى بارىنشا اشىق، ءادىل جانە شىنايى باسەكە تۇرىندە وتكىزۋگە مۇددەلى.

الىبەك الدەنۇلى

Abai.kz