قىرعىزستان پرەزيدەنتى سوورونباي جەەنبەكوۆ بۇگىن تاعى دا ۇندەۋ جاساپتى. جەەنبەكوۆتىڭ كەزەكتى ۇندەۋى «president.kg» سايتىندا جاريالانعان.

«قۇرمەتتى مەكەندەستەر!

قىرعىزستان قازىر ەڭ كۇردەلى كەزەڭدى باستاپ وتكىزىپ جاتىر.  ەشبىر بيلىك، ەشبىر لاۋازىم ادام ومىرىنەن قىمبات ەمەس! سول سەبەپتى دە، «اق ءۇيدى» باسىپ العان كەزدە مەن ەشبىر ادامنىڭ ومىرىنە قاۋىپ توندىرمەۋ ءۇشىن كۇش قولدانۋعا تاپسىرما بەرگەن جوقپىن. ماعان سول كەزدە-اق، نارازىلىققا شىققان جۇرتتى كۇشپەن باسىپ تاستاۋ تۋرالى ۇسىنىستار ايتىلدى. بىراق، مەن ولاي جاسامادىم! ولاي ەتكەن جاعدايدا ناعىز قاقتىعىس بولار ەدى. مىنە، سوندىقتان دا مەن ەلدە توتەنشە جاعداي ەنگىزۋ تۋرالى جارلىققا قول قويعان جوقپىن.

وڭىرلەردە مەنى قولداپ ميتينگىگە شىقپاقشى بولعان ازاماتتار از بولعان جوق. مەن ولاردان ميتينگىگە شىقپاۋدى ءوتىندىم. سەبەبى، وسى كۇندەرى حالىقتى ءبولىپ-جارۋدىڭ قانشالىقتى قاۋىپتى ەكەنىن ءوز كوزىمىزبەن كوردىك.

قۇرمەتتى وتانداستار! كىم قىزمەت العىسى كەلدى، ولار دەگەنىنە جەتتى!

ەندى ولار كوشەلەردە شەرۋلەتىپ جۇرگەن ءوز جاقتاستارىن توقتاتۋى كەرەك. مەن ولاردىڭ (نارازىلىق اكتسيالارىن) ۇيىمداستىرۋشىلار مەن ساياسي ليدەرلەرىن تاعى ءبىر مارتە قۇقىقتىق الاڭعا (كەلىسسوزگە) شاقىرامىن.

مەن بۇگىن وزدەرىنىڭ ازاماتتىق قۇقىقتارىن تاباندىلىقپەن قورعاپ شىققان جاستارعا ەرەكشە العىس ايتقىم كەلەدى. ءتۇنى بويى كوز ىلمەي، بەيبىتشىلىكتى ساقتاپ قالۋ ءۇشىن اۋقىمدى ءىس اتقاردىڭىزدار! وسى ءۇشىن سىزدەرگە العىس ايتامىن!

وسى كۇندەرى كىمگە نەنىڭ قىمبات ەكەنىن كوردىك. بۇگىن ءبىزدىڭ جاستارىمىز اناۋ بيلىك ءۇشىن كۇرەسكە شىققان اعالارىنا لايىقتى تۇردە ۇلگى كورسەتتى! وسى ارقىلى سىزدەرگە بيلىك لاۋازىمى ەمەس، قىرعىزستان قىمبات ەكەنىن كورسەتتىڭىزدەر! ەلدىڭ مۇددەسى بارىنەن جوعارى ەكەنىن دالەلدەدىڭىزدەر!

بارلىق تاراپتاردى سابىر مەن توزىمدىلىككە شاقىرامىن. ەلدىڭ مۇددەسى جەكە امبيتسيادان جوعارى تۇراتىنىن جانە ءبىر مارتە ەسكە سالامىن! بۇل تىعىرىقتان ءبىز بىرگە شىعامىز!

قۇرمەتتى وتانداستار! قازىرگى كۇننىڭ ەڭ باستى شارۋاسى – قىرعىزستاندا تۇراقتىلىق ورناتۋ! ەلدى تىنىشتاندىرۋ!

جاراتقان ءوزى قىرعىزعا جار بولسىن!»، - دەپتى سوورونباي جەەنبەكوۆ.

جەەنبەكوۆ: مەن قىرعىزستاننىڭ لەگيتيمدى پرەزيدەنتىمىن!

ەستەرىڭىزگە سالا كەتەيىك، بۇل جالپىحالىقتىق «توڭكەرىس» باستالعالى بەرگى قىرعىزستان پرەزيدەنتىنىڭ ەكىنشى جەدەل ۇندەۋى. العاشقى ۇندەۋىن 6 قىركۇيەك كۇنى جاساعان ەدى. ول كەزدە جەەنبەكوۆ قىرعىزستانداعى بارلىق ساياسي كۇشتەردى كەلىسسوزگە شاقىرعان.

بۇدان بولەك باق-قا سۇحبات بەرىپ، ءوزىنىڭ لەگيتيمدى پرەزيدەن تەكەنىن ايتقان.

«بۇل – بيلىكتى زاڭسىز باسىپ الۋ. كەشەگى جانە بۇگىنگى وقيعالار نەنى كورسەتىپ وتىر؟ ميتينگىگە شىققانداردىڭ ماقساتى – سايلاۋدىڭ قورىتىندىلارىن جويۋ عانا ەمەس، ەلدىڭ تىنىش ءومىرىن بۇزۋ! مۇنىڭ بارلىعى – مەنى بيلىكتەن كەتىرۋ ءۇشىن جاسالىپ جاتىر.

تاڭ ازاننان بەرى ءبىز قىرعىزدار ەكى رەت باستان وتكەرگەن وقيعالاردىڭ قايتالانعانىن كورىپ وتىرمىز. ءبىز توڭكەرىس جاعدايىنا قايتا ورالدىق. مەن مۇنىڭ باسىندا تۇرعان بارلىق تاراپتارعا ۇندەۋ تاستايمىن. مۇنى توقتاتۋعا شاقىرامىن.

مەن لەگيتيمدىمىن. لەگيتيمدى پرەزيدەنت رەتىندە مەندە قۇزىرەت بار. مەن ولاردىڭ باستارىن بىرىكتىرىپ، ارقايسىسىمەن جەكە-جەكە كەلىسسوز جۇرگىزۋگە دايىنمىن. بۇل مەنىڭ مىندەتىم! مەن دايىنمىن.

مەن ءبىرىنشى كەزەكتە ەلدەگى جاعدايعا الاڭدايمىن. مۇنداي جاعداي بولماۋى كەرەك ەدى. بىراق، بولدى. ەندى بۇل تىعىرىقتان شىعۋىمىز كەرەك»، - دەگەن سوورونباي جەەنبەكوۆ.

ايتا كەتەيىك، 4 قىركۇيەكتە باستالعان جالپىحالىقتىق نارازىلىقتىڭ اياعى توڭكەرىسكە ۇلاسقان. ميتينگىگە شىققاندار مەن قارۋلى كۇشتەردىڭ تەكەتىرەسى 4 قىركۇيەكتە، ساعات 20:00-دەن باستالىپ، اقىرى نارازى حالىقتىڭ «اق ۇيگە» باسىپ كىرۋىمەن اياقتالدى.

مەملەكەتتىك قاۋىپسىزدىك كوميتەتى عيماراتىن باسىپ العان دەمونسترانتتار ەلدىڭ بۇرىنعى پرەزيدەنتى المازبەك اتامباەۆتى, 2018 جىلى 11 جىلعا سوتتالعان ەكس-دەپۋتات سادىر جاپاروۆتى, بۇرىنعى پرەمەر-ءمينيسترى ساپار يساكوۆتى, ەكس-دەپۋتات راۆشان جەەنبەكوۆتى بوساتىپ العان.

سوسىن قىرعىزدىڭ جوعارعى كەڭەسى (پارلامەنتى) شۇعىل جيىن وتكەرىپ،  بۇرىن سوتتالىپ، كەشە حالىق بوساتىپ العان ەكس-دەپۋتات سادىر جاپاروۆتى قىرعىزستاننىڭ سۋ جاڭا پرەمەر-ءمينيسترى ەتىپ سايلاعان. سادىر جاپاروۆقا 62 دەپۋتات داۋىس بەرگەن. ال بۇرىنعى پرەمەر قۋاتبەك بورونوۆ وتستاۆكاعا كەتكەن.

قىرعىزستاننىڭ پارلامەنت سپيكەرى دە اۋىستى. بۇرىنعى سپيكەر داستان جۇمابەكوۆ مانداتىن تاپسىرىپ، جاڭا سپيكەر رەتىندە مىقتىبەك ابدىلداەۆ تاڭدالعان.

وسىدان كەيىن، بىشكەك پەن وش حالقى قايتا كوتەرىلگەن. ولار قاماۋدان بوساپ شىققان ساياساتكەرلەردىڭ قىرعىز بيلىگىندەگى جوعارعى لاۋازىمداردى ءوزارا بولىسكە سالعانىنا نارازى بولعان. بىشكەكتەگى نارازىلىق اكتسيالارى بۇگىن دە جالعاسىپ جاتىر. الاڭداعى جۇرت: «جاڭارۋ»، «يمپيچمەنت»، «جاستارعا وران بەرىڭدەر» دەگەن ۇراندار ايتۋدا.  بۇگىن كەشكى ساعات 17:00 شاماسىندا نارازى حالىق ليدەرلەرى شۇعىل جيىن وتكىزىپ، 29 جاستاعى تىلەك توقتوعازيەۆتى ۋاقىتشا پرەمەرلىككە تاعايىنداعانى تۋرالى اقپارات تارادى.

ايتا كەتەيىك، 4 قازاندا قىرعىزستاندا پارلامەنت سايلاۋى ءوتتى. «جوعارعى كەڭەستىڭ» سايلاۋىنا بارلىعى 16 ساياسي پارتيا قاتىسقان. Cايلاۋ قورىتىندىسى بويىنشا ءبىرىنشى ورىندا «بيريمديك» پارتياسى، ەكىنشى ورىندا «مەكەنيم كىرگىزستان» پارتياسى، ءۇشىنشى ورىندا «كىرگىزستان» پارتياسى تۇرعان بولاتىن. ءسويتىپ سايلاۋ ەسەبىمەن كەلىسپەي، قارسى بولعان حالىق ميتينگىگە شىقتى.

Abai.kz