بالانىڭ ويىنشىعىن تارتىپ السا، بالاقان قانداي قايعى-قاسىرەتكە ۇشىرايدى. كەيبىر ءبىزدىڭ اعايىن ءوزىنىڭ مەملەكەتتىك تەرريتورياسىنان ايرىلىپ وتىر. ولاردىڭ ىشىندەگى قۇسانىڭ قالاي قايناپ جاتقاندىعىن سەزىنۋ مۇمكىن ەمەس.

مەن يزرايل مەن پالەستينادا بولدىم، ەكى اعايىن حالىق. گرۋزيادا بولدىم. ابحازياعا قاراپ اڭساپ تۇرعان گرۋزين جىگىتتەردى كوردىم. سول حالىقتاردىڭ قاي-قايسىسى بولسىن، قانداي قايعى- قاسىرەت، قورلاۋدى باسىنان كەشىرىپ وتىرعانىن تۇسىنۋگە بولادى.

ءازىربايجان دوستارىم بار، تەرريتوريالىق ماسەلەگە كەلگەندە كوزدەرىنەن پارلاپ جاس شىعىپ كەتەدى. ىشتە قانداي ىزا، تاعدىرعا رەنىش جاتقانىن ءوزىڭىز ويلاپ كورىڭىز.

تاريحي ادىلەتتىلىكتى قالىپتاستىرۋ وتە قيىن، قيامەت-قايىم جۇمىس. تورتكۇل دۇنيەدە تۇراقسىزدىق زامانى ورناپ تۇر. اينالانىڭ بارلىعى قوراپ سىرىڭكە ءتارىزدى لاۋلاپ كەتۋگە دايىن. بارشامىزعا ساليقالى وي، سالماقتى قادام بەرسىن. وسىنداي كەزدە بەيبىتشىلىك پەن تۇسىنىستىكتىڭ قادىر-قاسيەتىن ءبىلىپ، ەلدەگى ىقپالداستىقتىڭ باس فاكتور ەكەندىگىن تۇسىنەسىڭ. «اقىرىن ءجۇرىپ، انىق باساتىن» ۋاقىت دەگەن وسى شىعار. اياعىڭدى جەرگە نىق قويىپ، ادىمىڭدى ويلانىپ الماساڭ ءسۇرىنىپ قالارىڭ انىق. قازىر سۇرىنەتىن زامان ەمەس. قاۋىپسىزدىكتى ويلاپ، تۇتاستىق ساقتاپ، ىنتىماقتى دامىتىپ، ىقپالداسۋ جاسايتىن كەزەڭ تۋىپ كەلەدى...

ەرلان سايروۆتىڭ جازباسى

Abai.kz