شىڭجاڭ قازاقتارىنا ءبىر جىلعا بوسقىن مارتەبەسىن بەرۋ شەشىمىن 16 قازاندا اقمولا وبلىسى پوليتسيا دەپارتامەنتى كوشى-قون قىزمەتى جانىنان قۇرىلعان كوميسسيا قابىلداعان. ادۆوكات باقبەرگەن ازاتتىققا قاستەر مۇساحانۇلى مەن مۇراگەر ءالىمۇلىنا بوسقىن مارتەبەسى ءبىر جىلعا بەرىلگەنىن، ولاردىڭ "الداعى قادامدارىن ەندى اقىلداساتىنىن" ايتتى.

مۇساحانۇلى مەن ءالىمۇلى 2019 جىلدىڭ قازان ايىنىڭ باسىندا شىڭجاڭ ولكەسى ءدۇربىلجىڭ ايماعىنان جولعا شىعىپ، قازاقستان شەكاراسىنان زاڭسىز وتكەن. اۋەلى شىعىس قازاقستان وبلىسىنا تاپ بولعان، كەيىن الماتىعا جەتكەن. 14 قازاندا الماتىدا وتكىزگەن ءباسپاسوز ءماسليحاتىندا "قىتايداعى قىسىمنان قاشىپ كەلگەندەرىن" مالىمدەپ، قازاقستاننان بوسقىن مارتەبەسىن سۇراعان.

كەيىن ەكەۋىن قازاقستان بيلىگى جاۋاپقا تارتتى. قاڭتاردا شىعىس قازاقستان وبلىسى زايسان اۋداندىق سوتى ەكەۋىن "مەملەكەتتىك شەكارانى بۇزىپ وتكەنى ءۇشىن ايىپتى" دەپ تانىپ، ءبىر جىلعا بوستاندىعىنان ايىرعان. تۇرمەدەگى كۇندەرىنىڭ باسىم بولىگى ەكى كۇن دەپ ەسەپتەلىپ، ولار 22 ماۋسىمدا سەمەيدەگى تۇرمەدەن بوستاندىققا شىققان. كەيىن قازاقستان ولارعا "پانا ىزدەۋشى كۋالىگىن" بەرگەن ەدى. كۋالىكتىڭ ۋاقىتى 20 قازاندا ءبىتۋى ءتيىس ەدى.

قازاقستانمەن شەكتەسەتىن قىتايدىڭ سولتۇستىك-باتىسىنداعى شىڭجاڭ ايماعىندا يسلام ءدىنىن ۇستاناتىن بايىرعى جەرگىلىكتى تۇرعىندار – ۇيعىر، قازاق، قىرعىز جانە وزگە مۇسىلماندارعا كوممۋنيستىك بيلىكتىڭ قىسىم كورسەتىپ، لاگەرگە قاماپ جاتقانى تۋرالى حابارلار 2017 جىلدان باستاپ تاراي باستاعان. 2018 جىلى بۇۇ شىڭجاڭداعى لاگەرلەردە ميلليونعا جۋىق ادام وتىرعان بولۋى مۇمكىن دەپ مالىمدەگەن.

پەكين شىڭجاڭداعى ساياساتى ءۇشىن حالىقارالىق قاۋىمداستىقتان سىنعا ۇشىرادى. اقش پەكينگە بىرنەشە رەت سانكتسيا دا سالدى. رەسمي پەكين باتىس ەلدەرىنىڭ شىڭجاڭعا قاتىستى مالىمدەمەلەرىنىڭ كوبىن جوققا شىعارادى.

ەۋروپا ەلدەرى قىتايدان شىڭجاڭعا تاۋەلسىز ساراپشىلاردى كىرگىزۋدى تالاپ ەتەدى. پەكين شىڭجاڭعا بۇۇ مەن باتىس ەلدەرىنىڭ رەسمي وكىلدەرىن كىرگىزبەي وتىر.

Abai.kz