وسى اپتاداعى ەڭ شۋلى وقيعا - اقش رەسەيدىڭ التى ازاماتىن كيبەرالاياقتىق جاسادى دەگەن ايىپتادى. اتاپ ايتقاندا، رەسەي باس بارلاۋ باسقارماسىنىڭ (گرۋ) № 74455 بولىمشەسىنىڭ وفيتسەرلەرى: يۋري اندريەنكو، سەرگەي دەتيستوۆ، پاۆەل فرولوۆ، اناتولي كوۆالەۆ، ارتەم وچيچەنكو جانە پەتر پليسكيندەرگە رف مۇدەسىنە كيبەرالاياقتىق جاسادى دەگەن ايىپ تاعىلىپ وتىر.  

وسى ماسەلەگە قاتىستى تەرگەۋ ەكى جىلدان اسا جۇرگىزىلىپ، 19 قازان كۇنى باس پروكۋروردىڭ ۇلتتىق قاۋىپسىزدىك بويىنشا كومەكشىسى دجون دەمەرس، FBI ديرەكتورىنىڭ ورىنباسارى دەۆيد بوۋديچ، پەنسيلۆانيا اۋماعىنىڭ باتىس بولىگىنىڭ پروكۋرورى سكوتت ۋ. برەدي جانە FBI قۇزىرلى اگەنتتەرىنىڭ قاتىسۋىمەن وتكەن ارنايى ءباسپاسوز كونفەرەنتسياسىندا جۇرت نازارىنا ۇسىنىلدى. 

 «بۇل گرۋ-لىق hacker-لەر مەن ولاردىڭ يتارشىلارى رەسەي ۇكىمەتىنىڭ قولداۋىمەن كيبەرشابۋىلدار جاساپ، ۋكراينا، گۇرجىستاننىڭ قۇتىن قاشىرىپ، فرانتسياداعى ت.ب. ەلدەردەگى سايلاۋعا ىرىتكى سالدى»، - دەلىنەدى  دەپارتامەنت پرەسس-رەليزىندە. 

وسى ارنايى ءباسپاسوز كونفەرەنتسياسىندا باس پروكۋروردىڭ ۇلتتىق قاۋىپسىزدىك بويىنشا كومەكشىسى دجون دەمەرس: «ەشبىر ەل ءدال رەسەي سياقتى ءوز كيبەر مۇمكىندىگىن ءارى زالىمدىكپەن، ءارى جاۋاپسىزدىقپەن وزگەلەرگە قاساقانا زالال كەلتىرە وتىرىپ قولدانعان ەمەس. — <…> ەشبىر حالىق تاپ وسىلايشا ءوزىنىڭ ايىرىلعان ۇلىلىعىن قايىرا قالپىنا كەلتىرە المايدى» دەدى.

ايىپتاۋدا كيبەرشابۋىلدا 2015 جىلدىڭ قاراشاسىنان باستاپ، 2019 جىلدىڭ قازانىنا دەيىنگى ارالىقتا BlackEnergy, KillDisk, Industroyer, NotPetya, Olympic Destroyer سىندى زالالدى باعدارلامالار قولدانىلعانى باسا ايتىلادى. اقش قۇزىرلى ورىندارى بۇل كومپيۋتەر شابۋىلداردى ءبىر عانا توپتىڭ تاراپىنان جاسالعان بۇرىن سوڭدى بولماعان ەڭ سويقاندى كيبەر سوققىلار دەپ باعالايدى.  

«NY Times» گازەتى كيبەر قاۋىپسىزدىك اناليتيكتەر اراسىندا «Soul Knight» (قۇم قۇرتى) اتانعان № 74455 بولىمشەسىنىڭ ساربازدارى 2016 جىلعى سايلاۋدا حيللاري كلينتوننىڭ شتابىنىڭ  ەلەكتروندى پوشتاسىن جىمقىرۋعا قاتىستى دەپ جازادى.  ءارى اقش پرەزيدەنتىنىڭ ۇلتتىق قاۋىپسىزدىك بويىنشا بۇرىنعى كەڭەسشىسى توماس بوسسەرتتىڭ سوزىنەن «گرۋ حاكەرلەرى رەسەي مەملەكەتىنىڭ ستراتەگيالىق ءبىر بۇتاعى رەتىندە ءىس-ارەكەت ەتىپ، كيبەر قۇرالداردى اسكەري ناۋقانداعى اسكەري قارۋ رەتىندە قولدانادى» دەگەن دايەكسوز كەلتىرەدى. 

دامىعان باتىس وسىلاي الەمدىك دەڭگەيدە بايبالام سالىپ جاتقاندا، ورتالىق ازيا ەلدەرىنىڭ كيبەرقاۋىپسىزدىگى قانداي دەڭگەيدە دەگەن كۇماندى ويعا قالامىز.

ءابىل-سەرىك الياكبار

Abai.kz