سەيسەنبى, 1 جەلتوقسان 2020
COVID-19 قازاقستاندا. جۇقتىرعاندار — 132348. جازىلعاندار — 116863. قايتىس بولعاندار — 1990
579 0 پىكىر 28 قازان, 2020 ساعات 16:30

ليتسەنزياسىنان ايىرىلعان جوو ستۋدەنتتەرى باسقا ۋنيۆەرسيتەتتەرگە قالاي اۋىسادى؟

ليتسەنزياسىنان ايىرىلعان جوعارى وقۋ ورىندارىنىڭ ستۋدەنتتەرى سەمەستردىڭ اياقتالۋىن كۇتپەي-اق باسقا ۋنيۆەرسيتەتتەرگە اۋىسا الادى. بۇل تۋرالى ءبىلىم جانە عىلىم مينيسترلىگىنەن ءمالىم بولدى.

«جوعارى وقۋ ورىندارىنىڭ جابىلۋى مەن ستۋدەنتتەردى باسقا وقۋ ورىندارىنا ۋاقىتىلى اۋىستىرۋ قاجەتتىلىگىنە بايلانىستى مينيسترلىك نورماتيۆتىك قۇجاتتارعا وزگەرىستەر ەنگىزدى. ەندى جوو ءبىلىم بەرۋ قىزمەتىمەن اينالىسۋ ليتسەنزياسىنان نەمەسە ليتسەنزياعا قوسىمشادان ايىرىلعان، سونداي-اق جوعارى وقۋ ورنى جابىلعان جاعدايدا اتالعان وقۋ ورنىنىڭ ستۋدەنتتەرى سەمەستردىڭ اياقتالۋىن كۇتپەستەن بىردەن باسقا جوو-عا اۋىسا الادى. بۇل نورما وقۋلارىن جالعاستىرۋ بارىسىندا ستۋدەنتتەرگە قولداۋ كورسەتۋگە باعىتتالعان»، - دەلىنگەن ۆەدومستۆو مالىمەتىندە.

قازىر مينيسترلىكتە ءبىلىم بەرۋ ۇيىمدارى قىزمەتىنىڭ ۇلگىلىك قاعيدالارىنا ليتسەنزياسى توقتاتىلعان جوو ءبىلىم الۋشىلارىن اۋىستىرۋ بولىگىندە قوسىمشا وزگەرىستەر ەنگىزۋ بويىنشا جوعارى وقۋ ورىندارىنان ءتۇسىپ جاتقان بىرقاتار ۇسىنىس قاراستىرىلىپ جاتىر. الداعى ۋاقىتتا مۇنداي جاعدايلار ورىن السا، ستۋدەنتتەر ليتسەنزيانىڭ ىقتيمال كەرى قايتارىلۋىن كۇتپەي-اق باسقا جوو-عا اۋىسا الادى.

«جوعارىدا كورسەتىلگەن ۇسىنىستار مۇددەلى ۇيىمدارمەن كەلىسۋ بويىنشا ءتيىستى راسىمدەردەن وتەدى. مينيسترلىك جابىلاتىن جوعارى وقۋ ورىندارىنىڭ ستۋدەنتتەرىن باسقا جوو-عا اۋىستىرۋدى قامتاماسىز ەتەدى. بۇل رەتتە ستۋدەنتتەردى قابىلدايتىن جوعارى وقۋ ورىندارىنىڭ وقۋ قۇنىن كوتەرمەۋى بويىنشا ماسەلەلەر شەشىلەتىن بولادى»، - دەپ اتاپ وتىلگەن حابارلامادا.

Abai.kz

0 پىكىر