بۇگىن ەلوردادا «اۋىل» پارتياسىنىڭ توراعاسى ءالي بەكتاەۆ پارتيا بەلسەندىلەرى جۇرگىزگەن اۋىل تۇرعىندارىن ينتەرنەتپەن قامتاماسىز ەتۋ مونيتورينگىنىڭ قورىتىندىسى بويىنشا تۇسىنىكتەمە بەردى. بۇل تۋرالى baq.kz حابارلادى.

- ەڭ الدىمەن ايتارىم، مەملەكەتتىك ورگاندار جالعان اقپارات بەرۋدى دوعارۋى كەرەك. قولدان جاقسى ستاتيستيكا جاساپ، جاقسى كورىنۋدىڭ قاجەتى جوق. حالىق ءبارىن كورىپ، ءبىلىپ وتىر. ءبىز قانشا جەردەن «جاعدايىمىز جاقسى» دەگەنىمىزبەن، كەمشىن تۇستى حالىق بايقاماي قويمايدى.

ءبىز بۇگىن «اۋىل» پارتياسىنىڭ مونيتورينگتىك توبىمەن بىرنەشە اۋىلداعى ينتەرنەت جەلىسىنىڭ  جۇمىسى جونىندە رەيد وتكىزىپ، مونيتورينگ جۇرگىزدىك. قىزمەتكەرلەرىمىز قازىر دە سول اۋىلداردا. ءدال قازىر قورعالجىن جانە تسەلينوگراد اۋداندارىنا قاراستى 6 اۋىلدا ءبىزدىڭ ماماندار جۇمىس ىستەپ جاتىر. سول اۋىلدارداعى ينتەرنەتتىڭ ساپاسى دا، سانى دا، دەڭگەيى دە وتە تومەن ەكەنىنە تاعى كوز جەتكىزىپ وتىرمىز.

مىسالى، ەلورداعا جاقىن ورنالاسقان ورازاق اۋىلىنىڭ جارتى بولىگىندە ينتەرنەت بار، جارتىسىندا جوق. ءتىپتى، وسىدان 5 جىل بۇرىن سۋ الىپ، جاڭادان سالىنعان مولتەك اۋدان بار، سونىڭ وزىندە بايلانىس تا، ينتەرنەت تە جوق. مۇنى قالاي تۇسىنۋگە بولادى؟! - دەيدى ول.

پارتيا توراعاسىنىڭ ايتۋىنشا، قورعالجىن اۋدانىنا قاراستى ەكپىندى اۋىلىندا دا ينتەرنەتپەن قامتۋ ماسەلەسى ءماز ەمەس.

- ەكپىندى اۋىلىندا ءدال قازىر نە بايلانىس، نە ينتەرنەت، نە مەكتەپ جوق. ەل استاناسىنان 50-60 شاقىرىم جەردە ورنالاسقان اۋىلدارداعى جاعداي وسىنداي بولسا، وندا باسقا جەردە نە بولىپ جاتىر؟ 60 شاقىرىم جەردەگى اۋىلدا مەكتەپ جوق بولسا، 600 شاقىرىم جەردەگى اۋىل مەكتەپتەرىنىڭ جاعدايى قالاي؟

مىنە، وسى ماسەلەلەر كوپ ويلاندىرادى. مۇمكىن ءبىزدىڭ مينيسترلەر كابينەتتەرىندە وتىرا بەرمەي، اۋىلدارعا شىعىپ كورسە دۇرىس بولار ما ەدى دەگەن وي كەلەدى. اۋىلداردا مەكتەپتەر نەگە جابىلىپ جاتىر؟ نەگە ينتەرنەت، بايلانىستىڭ جۇمىسىندا كەدەرگى بار؟ وسى ماسەلەلەردىڭ توڭىرەگىندە مينيسترلەر وزدەرى ءجۇرىپ قاداعالاسا، ءبىراز دۇنيە وزگەرەر ەدى، - دەدى ءالي بەكتاەۆ.

Abai.kz