دەپۋتات بولا سالايىنشى...
(ساتيرا)
زەينەتكەرلىكتەن ابدەن زەرىكتىم. ءىشىم پىستى. وسىلاي جۇرگەندە «پارلامەنت سايلاۋى وتەدى ەكەن» دەگەن حاباردى ەستىپ، ەسىم شىعا قۋاندىم. تەككە ساندالىپ جۇرگەنشە «دەپۋتات بولا سالايىنشى» دەگەن ويدىڭ كەلە قالعانى عوي. بيلىككە جاعاتىن «ۇندەمەستەر» پارتياسىنا قابىلدانىپ، ءتيىستى قۇجاتتارىن تاپسىرىپ، سايلاۋشىلارمەن كەزدەسە باستادىم.
-اقساقال، جاسىڭىز قانشادا؟- دەپ سۇراق قويدى ءبىر اقىماق ءبىر كەزدەسۋدە.
-جاسىمدى قايتپەكسىڭ؟- دەپ شاق ەتە قالدىم مەن. ماسەلە جاستا ەمەس، باستا عوي. جاسىم سەكسەندە بولسا دا، باسىم باياعى قالپىندا. ميىم ءالى كەپكەن جوق.
-استاپىراللا! - دەدى الگى اڭگۇدىك. سىزگە دەپۋتاتتىققا ەمەس، «انا جاققا» دايىندالۋ كەرەك قوي.
-ءوي، اينالايىن - دەدىم مەن وعان. ويىمدى قالاي ءدال تاپتىڭ.«ول جاققا» ءجاي زەينەتكەر بولىپ كەتكەنشە، دەپۋتات بولىپ كەتكەنىم دۇرىس قوي. سولاي ەمەس پە؟
سوندا پارلامەنت، ۇكىمەت: «پالەنشە» دەگەن اسا قۇرمەتتى دەپۋتاتىمىز «انا جاققا» «جۇماققا» ءجۇرىپ كەتتى» دەپ «ايقايلاتىپ»، گازەتتەرگە سۋرەتىمدى باسىپ، قوشتاسۋ ءسوزىن جازىپ، تەلەديداردان حابارلاپ، بىرەر دەپۋتاتتار «كوز جاسىن سىعىپ»، ازا تۇتپاي ما؟ پارلامەنتتەگى زەينەتكەرلەر نەگە كەتپەي وتىر دەيسىڭ؟ ءبارى دە ءوزىڭ ايتقان «جاققا» سولاي دەپۋتات رەتىندە قۇرمەتپەن كەتكىسى كەلەدى. ەندى تۇيسىگىڭە بىردەڭە جەتتى مە؟
-اپىر-اي، ءسىز زەينەتكەر دەپۋتاتتاردىڭ اسا ماڭىزدى «مەملەكەتتىك» قۇپياسىن اشىپ قويدىڭىز عوي، - دەدى الگى اڭگۇدىك. باسە، ولاردىڭ الدى سەكسەندى ورتالاپ قالسا دا نەگە كەتپەيدى دەسەك، سولاي ما ەدى؟ راحمەت، سىزگە! ءسىزدىڭ دە «باعىڭىز جانىپ»، اسا مارتەبەلى پارلامەنتتىڭ اسا مارتەبەلى دەپۋتاتى بولۋىڭىزعا تىلەكتەسپىن!
-ءامين! ايتقانىڭ كەلسىن!
-اقساقال، ءسىز دەپۋتاتتىققا قاي پارتيانىڭ اتىنان ءتۇسىپ تۇرسىز؟- دەدى تاعى ءبىر ءماڭكۇس.
-«ۇندەمەستەر» پارتياسىنان.
-نە دەيت!- دەدى الگى ەسۋاس. سونداي دا پارتيا بار ما؟
-ە، نەگە بولماسىن. وعان نەگە تاڭقالاسىڭ؟ قازىر جاسىلدار پارتياسى دەي مە، «ماسىلدار» پارتياسى دەي مە، شىعىپ جاتىر عوي.
-سوندا ءسىزدىڭ پارتياڭىزدىڭ ماقساتى نە؟
-وتە ورىندى سۇراق. ءبىزدىڭ پارتيانىڭ ماقساتى تۇسىنە بىلگەن ادامعا وتە كەرەمەت.
-سوندا قانداي؟
-ۇندەمەۋ.
-تۇسىنبەدىم.
-تۇسىنۋگە مىندەتتى ەمەسسىڭ. ءبىزدىڭ پارتيانىڭ «ۇرانى» - «ۇندەمەگەن ۇيدەي بالەدەن قۇتىلادى». ءبىز پارلامەنتتە قانداي ماسەلە كوتەرىلىپ جاتسا دا، ۇندەمەيمىز. ويتكەنى، ەشكىمدى كۇندەمەيمىز، ەشكىمدى تىلدەمەيمىز، ەشكىمدى تىلمەن تۇيرەمەيمىز. ءبىزدىڭ باسقا «بولتۋن» پارتيالاردان ارتىقشىلىعىمىز دا وسىندا.
-ماسەلەن، پارلامەنتتىڭ قازاق دەپۋتاتتارى قازاقشا سويلەيتىن بولسىن دەگەن ۇسىنىس تۇسسە، نە دەيسىزدەر؟
-ۇندەمەيمىز.
-ال ساياسي تۇتقىنداردى بوساتۋ كەرەك دەگەن ۇسىنىس تۇسسە شە؟
-ۇندەمەيمىز.
-ميتينگىگە شىققانداردى قۋدالاۋدى توقتاتۋ كەرەك دەگەن ۇسىنىس بولسا شە؟
-اۋ، ايتتىم عوي ساعان ۇندەمەيمىز دەپ، ۇندەمەيمىز، ۇندەمەيمىز، ۇندەمەيمىز.
-استاپىراللا! وسىنداي دا پارتيا بولادى ەكەن عوي،- دەدى ماناعى ماڭكۇس.
-ە، نەگە بولماسىن. ۇندەدىڭ نە، ۇندەمەدىڭ نە، ءبارىبىر ەمەس پە؟ ۇندەسەڭ دە الاتىڭىڭ سول جالاقى، ۇندەمەسەڭ دە الاتىنىڭ سول جالاقى. ۇندەسەڭ دە، ۇندەمەسەڭ دە مىنەتىءنىڭ سول قىزمەتتىك «سۋپەر» ماشينا. ۇندەسەڭ دە، ۇندەمەسەڭ دە تۇراتىنىڭ قىزمەتتىك كەرەمەت پاتەر. ۇندەسەڭ دە، ۇندەمەسەڭ دە جاسالاتىن الەۋمەتتىك جەڭىلدىك. سەن ۇندەمەدىڭ ەكەن دەپ جالاقىڭدى قىسقارتىپ، كولىگىڭدى تارتىپ الىپ، پاتەرىڭنەن قۋىپ شىقپايدى عوي. سوندا اتاڭنىڭ باسىنا سويلەۋىمىز كەرەك پە؟ سويلەمەيمىز، ۇندەمەيمىز. ۇندەيتىندەر «پوجالىستا»، ۇندەي بەرسىن. ءبىز ولارعا دا ۇندەمەيمىز. ويتكەنى، ءبىز ەشكىمدى كۇندەمەيمىز، ەشكىمدى تىلدەمەيمىز، ەشكىمدى تىلمەن تۇيرەمەيمىز. تىنىشتىق كەرەك قۇلاققا، ۇندەمەي- اق وتىرا بەرەمىز، پارلامەنت دەگەن «جۇماقتا». ءتۇسىندىڭ بە، ماۋباس!
دامير ابىشەۆ
Abai.kz
