2021 جىلى وتەتىن ءماجىلىس دەپۋتاتتارىنىڭ كەزەكتى سايلاۋىنىڭ ءادىل وتۋىنە ۇلەس قوسۋ ءۇشىن قوعام بەلسەندىلەرى مەن جۋرناليستەر «تازا سايلاۋ» ازاماتتىق باقىلاۋ ۇيىمىن قۇردى. بۇل تۋرالى Azattyq-ruhy مالىمدەدى.

اتالعان ۇيىم بەلسەندىلەرى 13 قاراشا كۇنى الماتىداعى قازاقستان ءباسپاسوز ورتالىعىندا باق وكىلدەرىمەن كەزدەسىپ، قوزعالىستىڭ ماقساتى تۋرالى ايتتى.

باقىلاۋشىلار قاتارىندا جازۋشى، قوعام بەلسەندىسى – بيگەلدى عابدۋللين، جۋرناليست ماحات سادىق، تەلەجۋرناليست ەرقانات كوپجاسارۇلى، قوعام بەلسەندىسى جاننا احمەتوۆا، ساياساتتانۋشى ەدۋارد پولەتاەۆ بار.

«تازا سايلاۋ» توپ باستاماشىلارى تاۋەلسىز سايلاۋشى تولقىنىن تاربيەلەۋدى كوزدەپ وتىرمىز. قازاقستاندا ساياسي مادەنيەت مەكتەبىن قالىپتاستىرامىز. ءبىز ەشقانداي پارتياعا مۇشە ەمەسپىز. ءبىزدىڭ قوزعالىستىڭ ماقساتى – الەمگە تازا، ءارى، ءادىل سايلاۋ جاساي الاتىنىمىزدى كورسەتۋ. قوزعالىس بەلسەندىلەرى سايلاۋ كۇنى جۇمىس ىستەيدى. ءبىزدىڭ باقىلاۋشىلار ارنايى دايىندىقتان ءوتىپ، ۆيزۋالدى تۇردە ءبارىن باقىلايتىن بولادى. ءبىزدىڭ بيلىك تە ەلدە تازا سايلاۋ وتۋىنە مۇددەلى»، - دەدى جۋرناليست بيگەلدى عابدۋللين.

تاۋەلسىز باقىلاۋشىلار قوزعالىس ارتىندا ەشقانداي «ادام تۇرماعانىن» جانە ۇيىمدى ەشكىم قارجىلاندىرمايتىنىن جەتكىزدى.

«ءبىز تەك سايلاۋ كەزىندە عانا جۇمىس ىستەيمىز. ارتىمىزدا ەشكىم تۇرعان جوق جانە ءبىزدى ەشكىم قارجىلاندىرمايدى. ايماقتارداعى وكىلدەرىمىزدىڭ كوپشىلىگى - كاسىپكەرلەر. ايماقتارداعى باقىلاۋشىلاردى ZOOM ارقىلى وقىتامىز. باقىلاۋشىلار ءۇشىن ەشقانداي ارتىق شىعىن جوق. اۋديو، ۆيدەولاردىڭ ءوزى ۇلكەن كۇش. ءادىل سايلاۋ وتپەسە، ءادىل سايلاۋ بولماسا، دەموكراتيا دەگەن ءسوزدى ايتۋدىڭ ەش قيسىنى جوق. حالىق بولاشاعىنا نەمقۇرايلى قاراماۋى كەرەك. بەلسەندىلەر بار، باسقالارىمىز بولىپ ءادىل سايلاۋدىڭ وتۋىنە مۇرىندىق بولۋىمىز كەرەك. باستى كۇشىمىزدى سايلاۋعا كوپ ادامنىڭ كەلۋىنە جۇمسايمىز», - دەدى تەلەجۋرناليست ەرقانات كوپجاسارۇلى.

ايتا كەتەيىك، 2021 جىلدىڭ 10 قاڭتارى كۇنى ءماجىلىس سايلاۋى وتەدى. سايلاۋعا 6 پارتيا قاتىسادى.

Abai.kz