ەلەكتروندى ەڭبەك بيرجاسى جۇمىس ىزدەۋشىگە بوس ۆاكانسيالاردى اۆتوماتتى تۇردە ۇسىنادى. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى.

«ەندى ەلەكتروندىق ەڭبەك بيرجاسىنىڭ پورتالى جۇمىس ىزدەپ جۇرگەن ادامعا داعدىلارىنا سايكەس اۆتوماتتى تۇردە بوس ۆاكانسيالاردى، «ەڭبەك» باعدارلاماسىنىڭ قۇرالدارىن ۇسىنادى. ياعني، شەشىمدى اقپاراتتىق جۇيە قابىلدايدى. جۇمىس تابىلماعان جاعدايدا اقپاراتتىق جۇيە اۆتوماتتى تۇردە ادامدى جۇمىسسىز رەتىندە تىركەيدى دە، وعان ءتيىستى جۇمىسسىزدىققا قاتىستى الەۋمەتتىك تولەمدى پرواكتيۆتى تۇردە ەسەپتەپ تاعايىندايدى. وسىلايشا، بىرنەشە قىزمەتتى بىرىكتىرىپ، بيزنەس پروتسەسىن جەڭىلدەتىپ، ءبىز «تسيفرلىق» جۇمىسپەن قامتۋ ورتالىقتارىنا كوشۋ جولىندامىز»، — دەدى مينيستر ۇكىمەت وتىرىسىندا.

جالپى، بيىل بارلىعى 9,5 ملن مەملەكەتتىك قىزمەت كورسەتىلگەن. جىل سوڭىنا دەيىن مەملەكەتتىك قىزمەتتەردىڭ 90%-ى ەلەكتروندىق فورماتقا كوشىرىلەدى جانە 2022 جىلى 93%-عا دەيىن جەتكىزۋ جوسپارلانىپ وتىر.

Abai.kz