قاسىم-جومارت توقاەۆ ازياداعى ءوزارا ءىس-قيمىل جانە سەنىم شارالارى جونىندەگى كەڭەس حاتشىلىعىنىڭ جاڭادان تاعايىندالعان اتقارۋشى ديرەكتورى قايرات سارىبايدى قابىلدادى.

سۇحبات بارىسىندا تاراپتار ازيا كەڭەسىنە قازاقستان توراعالىق ەتەتىن 2021-22 جىلدارداعى باسىمدىقتار جايىندا پىكىر الماستى. پرەزيدەنت قازىرگىدەي تاۋەكەلى مەن سىن-قاتەرى ورشىگەن اۋمالى-توكپەلى زاماندا كەڭەستىڭ ايماقتىق جانە عالامدىق قاۋىپسىزدىكتى قامتاماسىز ەتۋدەگى ءرولىن ارتتىرۋ مەن ونىڭ ينستيتۋتسيونالدىق دامۋ ماسەلەلەرىنە نازار اۋداردى. سونداي-اق ازيا كەڭەسىن باسقا دا كوپجاقتى حالىقارالىق ۇيىمدارمەن ىنتىماقتاستىقتى ودان ءارى دامىتۋعا شاقىردى.

ءوز كەزەگىندە اتقارۋشى ديرەكتور ازياداعى ءوزارا ءىس-قيمىل جانە سەنىم شارالارى جونىندەگى كەڭەس قۇرىلعان ۋاقىتتان بەرى بەدەلدى دە بەلسەندى ۇيىم رەتىندە قالىپتاسقانىن اتاپ ءوتتى. سونىمەن قاتار كەڭەسكە مۇشە ەلدەردىڭ دۋشانبە سامميتىندە قابىلدانعان دەكلاراتسياسىنا سايكەس قول جەتكىزىلگەن ۋاعدالاستىقتاردى جۇزەگە اسىرۋ بويىنشا اتقارىلىپ جاتقان جۇمىستار تۋرالى اقپارات بەردى.

قاسىم-جومارت توقاەۆ پەن قايرات سارىباي اوسشك اياسىندا الداعى ۋاقىتتا جوسپارلانعان ءىس-شارالار، اتاپ ايتقاندا، 2022 جىلى قازاقستاندا وتەتىن ازيا كەڭەسىنىڭ VI سامميتىنە دايىندىق ماسەلەلەرى تۋرالى وي ءبولىستى.

كەزدەسۋ سوڭىندا مەملەكەت باسشىسى قازاقستان ازيا كەڭەسىنىڭ جۇمىسىنا جاڭا سەرپىن بەرۋگە ءوز ۇلەسىن قوسۋعا دايىن ەكەنىن قۋاتتاپ، مۇشە مەملەكەتتەر مەن حاتشىلىقتىڭ الدىندا تۇرعان ورتاق ماقساتتاردى ىسكە اسىرۋعا باعىتتالعان كۇش-جىگەرىن تولىق قولدايتىنىن مالىمدەدى.

Abai.kz