شەرۋشىلەر تۇسكە تامان قالا ورتالىعىنداعى تەمىرجول ۆوكزالى عيماراتىنىڭ الدىنا جينالىپ، ەركينديك داڭعىلىمەن ءجۇرىپ ءوتتى دە، كەيىن "الا-توو" الاڭىنا بارىپ توقتادى. اكتسيا قاتىسۋشىلارى "حانستيتۋتسياعا جول جوق!", "حانستيتۋتسيا وتپەيدى", "كونستيتۋتسيا جيلەت اۋىستىرۋ ەمەس" دەگەن سەكىلدى جازۋى بار پلاكات ۇستاپ شىقتى.

جينالعاندار اراسىندا قۇقىق قورعاۋشىلار، جوگوركۋ كەڭەشتىڭ قازىرگى جانە بۇرىنعى دەپۋتاتتارى جانە قوعام قايراتكەرلەرى بولدى. ازاتتىق راديوسى قىرعىز قىزمەتىنىڭ ءتىلشىسى اكتسياعا شامامەن 500 ادامنىڭ قاتىسقانىن حابارلادى.

17 قاراشا كۇنى ەل پارلامەنتى – جوگوركۋ كەڭەش اتا زاڭنىڭ جاڭا جوباسىن قوعامدىق تالقىعا شىعاردى. 80 دەپۋتات كونستيتۋتسياعا وزگەرىس ەنگىزۋ بويىنشا رەفەرەندۋم تاعايىنداۋ تۋرالى زاڭعا باستاما كوتەردى. بىراق زاڭ جوباسىنىڭ اۆتورى ءالى بەلگىسىز.

كونستيتۋتسيانىڭ جاڭا جوباسىندا پرەزيدەنتتىڭ قۇزىرەتتەرى كەڭەيىپ، مەملەكەتتىك باسقارۋعا حالىق قۇرىلتايى ينستيتۋتى ەنگىزىلگەن. پرەزيدەنت مەملەكەت باسشىسى بولىپ، اتقارۋشى بيلىكتى باسقارادى، ەلدىڭ ىشكى جانە سىرتقى ساياساتىن انىقتايدى. ول بەس جىلدىق ەكى مەرزىمگە سايلانا الادى، ۇكىمەتتىڭ قۇرىلىمى مەن قۇرامىن انىقتايدى. جاڭا جوبا بويىنشا، پارلامەنت دەپۋتاتتارىنىڭ سانى 120-دان 90-عا قىسقارادى.

Abai.kz