قازىرگى تسيفروۆيزاتسيا داۋىرىندە ادام بالاسىنا قاجەتتى قىزمەتتەر مەن سان-سالالى تۇرمىس - تىرشىلىك تەتىكتەرى وڭتايلانىپ، قولجەتىمدىلىگى ارتۋدا. ونىڭ ۇستىنە، الەمگە ۇرەي سەپكەن، «ءتاجتۇماۋ» دا وسى سالانىڭ تەزدەتىپ دامۋىنا وڭ اسەرىن تيگىزىپ، «كاتاليزاتور» ءرولىن اتقارۋدا. 

وزدەرىڭىز بىلەسىزدەر، قازىرگى تاڭدا الەۋمەتتىك، ەكونوميكالىق سالالارىمىزداعى بۇرىننان قالىپتاسىپ قالعان ۇعىمدارىمىز بەن جۇمىس ىستەۋ تاسىلدەرىمىزگە دياگونالدى كەرەقارىس تاسىلدەر مەن ۇعىمدار ەنۋدە. جانە ءبىر ەرەكشەلىگى سول، ەنگىزىلىپ جاتقان وزگەرىستەر وزدەرىنىڭ ومىرشەڭدىگى مەن تيىمدىلىگىن كورسەتۋدە. 

وسىعان وراي، ءماجىلىس دەپۋتاتتارىنىڭ دا جۇمىس ىستەۋ ءتاسىلىن ساندىق تاسىلگە بەيىمدەپ، وڭتايلاسا دۇرىس بولار ەدى. ياعني، حالىق قالاۋلىلارى ەلىمىزدىڭ استاناسىنا جينالماي، ءوزىن سايلاعان حالىق اراسىندا وتىرىپ-اق ءوز جۇمىستارىن تولىعىمەن اتقارا الار ەدى. كەز كەلگەن اقپارات بولسىن، نەمەسە قانداي دا ءبىر مالىمەت بولسىن قازىرگى تاڭدا قولجەتىمدى. 

دەپۋتاتتاردىڭ حالىق اراسىندا بولۋى قابىلدانعان نەمەسە دايىندالىپ جاتقان زاڭداردىڭ حالىققا قانشالىقتى ءتيىمدى ەكەندىگىن، كانشالىقتى وڭ نەمەسە تەرىس وزگەرىستەرگە قول جەتكىزىلەتىندىگىن شۇعىل اڭعارۋعا مۇمكىندىك بەرەر ەدى. سونىمەن قاتار، زاڭداردى حالىق اراسىندا تالقىلاۋ نەمەسە ءتۇسىندىرۋ جۇمىستارى دا وڭتايلانارى داۋسىز. ساياسي ماسەلەلەردى جەرگىلىكتى قوعامدىق ۇيىمدارمەن، ماسليحاتتارمەن تالقىلايدى، زاڭعا وزگەرىستەر ەنگىزۋ جان-جاقتى قارالىپ، تالدانىپ بارىپ ىسكە اسىرۋعا قول جەتەدى. جەرگىلىكتى ماسليحاتتارمەن بايلانىس جاقسارادى، ولاردىڭ مەملەكەتتىك دەڭگەيدەگى ماسەلەلەردى شەشۋگە قاتىستىرۋ تەتىگى ارتتىرىلادى.

ەڭ باستىسى، قاراپايىم حالىقتىڭ ءوز دەپۋتاتتارىنا قولجەتىمدىلىگى مۇمكىن بولار ەدى. دەپۋتات ءوز سايلاۋشىلارىنىڭ كوتەرگەن ماسەلەسىمەن تىكەلەي بارىپ تانىسىپ، قاجەتتىلىگىن، شەشۋ مۇمكىنشىلىگىن جەرگىلىكتى بيلىكپەن بىرىگىپ قاراستىرىپ جۇمىس ىستەيدى. كۇردەلى جانە قوماقتى قارجى قاجەت ماسەلەلەردى رەسپۋبليكالىق ورگاندارعا ناقتى دالەلدەي الۋعا بولادى، ءوز كوزىمەن كورىپ جۇرگەنىن ايتا الادى.

ال شۇعىل شەشىمدەر ءۇشىن 2-3 كۇنگە ىسساپارمەن استاناعا بارعاندا، قوناق ۇيگە توقتاۋعا بولادى. 

جالپى الىپ قاراعاندا، پرەزيدەنت ايتپاقشى «سلىشاششي پارلامەنت» بولۋىنا ىقپالىن تيگىزەدى، استاناعا باراتىن كوپتەگەن شاعىمداردىڭ الدىن الۋعا بولادى. پرەزيدەنتىمىز ءوز جولداۋىندا قويىپ وتىرعان حالىقتىق ۇكىمەت ساياساتىنا ءماجىلىس تاراپىنان ۇلكەن قولداۋ بولار ەدى. 

بۇل جوبانىڭ ەكونوميكالىق تۇرعىدان دا ەلىمىزدىڭ بيۋدجەتىنە ەداۋىر قوسىمشا اكەلەرىنە ەشىم تالاسا قويماس. دەرەكوزدەرگە سۇيەنسەك ءاربىر دەپۋتاتقا جىلىنا 92 ملن تەڭگە جۇمسالادى ەكەن. ءار وبلىس ءوز دەپۋتاتتارىنا وزدەرى جاعداي جاساپ ءتيىستى قارجىنى مۇمكىندىگىنشە وبلىس بيۋدجەتىنەن قاراستىرعان بولار ەدى. 

قورتىندىسىندا ورتالىقتاندىرىلعان دەپۋتاتتارعا ارنالعان كوپتەگەن ماتەريالدىق شىعىنداردى ۇنەمدەۋگە بولادى.

- قىزمەتتىك كابينەتتەر، كولىكتەر، شتاتتىق بىرلىكتەر; 

- تۇرعىن ۇيلەر، ت.ب.

پەنسياعا شىعىپ، جاقسى دەمالىپ، ۇيىقتاپ جۇرەتىن جالقاۋ دەپۋتاتتاردان قۇتىلۋعا بولادى. 

راحمانقۇل بايتەليەۆ

Abai.kz