قازاقستاندىق بوتاگوز كوپباەۆا كوررۋپتسيالىق كورىنىستەردىڭ بەتىن اشقانى ءۇشىن بەرىلەتىن Transparency International حالىقارالىق ۇيىمىنىڭ Anti-Corruption Award 2020 سىيلىعىنىڭ لاۋرەاتى اتاندى.

كوپباەۆا 2017 جىلى قۇرمانعازى اتىنداعى قازاق ۇلتتىق كونسەرۆاتورياسىنىڭ قارجى-ەكونوميكالىق ماسەلەلەرى بويىنشا پرورەكتورى بولىپ جۇمىس ىستەدى. 2018 جىلدىڭ جازىندا وقۋ ورنىنداعى قارجىلىق زاڭ بۇزۋشىلىقتاردى انىقتاعانىن جازعان. وسىدان كەيىن 20 جىل بويى كونسەرۆاتوريانى باسقارعان ءجانيا اۋباكيروۆا قىزمەتىنەن كەتتى. كوپ ۇزاماي كوپباەۆاعا شابۋىل جاسالدى. وقۋ ورنى ونىمەن كەلىسىم-شارتتى بۇزدى. بىراق سوت شەشىمىمەن كوپباەۆا قىزمەتىنە قايتا كەلدى.

2019 جىلدىڭ مامىر ايىندا سوت شەشىمىمەن كونسەرۆاتوريانىڭ بۇرىنعى باس ەسەپشىسى سەگىز جىلعا سوتتالدى. بىراق كامەلەتكە تولماعان بالاسى بارى ەسكەرىلىپ، جازاسى بەس جىلعا كەيىنگە شەگەرىلدى. سوت سونىمەن بىرگە وعان وقۋ ورنىنا 128 ملن تەڭگە تولەپ بەرۋگە، بۇدان بولەك مەملەكەتكە 3,8 ملن تەڭگە سالىق تولەۋگە مىندەتتەدى.

TI مالىمدەمەسىندە كوپباەۆا وزىنە جاسالعان شابۋىلعا، قىسىمدارعا قاراماستان كوررۋپتسيالىق بىلىقتاردىڭ بەتىن اشتى دەيدى.

كوپباەۆامەن بىرگە بۇل سىيلىقتى اۋعان ءجۋرناليسى زاكي داريابي دە الدى.

دەرەككوز: Centralasian

Abai.kz