قازاقستاندا قۇقىق قورعاۋشىلاردىڭ قۋدالانىپ جاتقانى جايلى اقپاراتقا الاڭداعان حالىقارالىق قۇقىق قورعاۋ ۇيىمدارى ەۋرووداق باستاعان قازاقستاننىڭ حالىقارالىق ارىپتەستەرىن نۇر-سۇلتانعا قىسىم جاساۋعا ۇندەدى،- دەپ حابارلايدى Centralasian.

Amnesty International, Front Line Defenders, Human Rights Watch (HRW) جانە International Partnership for Human Rights (IPHR) ۇيىمدارىنىڭ 3 جەلتوقساندا جاريالاعان مالىمدەمەلەرىندە قازاقستاننىڭ سالىق ورگاندارى وننان استام جەرگىلىكتى ۇكىمەتتىك ەمەس ۇيىمعا ايىپپۇل سالىپ، قارجى ەسەبىندە جىبەرگەن «قاتەلىكتەرى» ءۇشىن ولاردى «جابامىز» دەپ قورقىتقانى جازىلعان. مالىمدەمە اۆتورلارى سالىق ورگاندارى قۋعىنداۋدى توقتاتىپ، ەسكەرتۋ قاعازدارىن قايتىپ الۋى ءتيىس دەگەن.

اپتا باسىندا قازاقستانداعى بىرنەشە قۇقىق قورعاۋ ۇيىمى پارلامەنت سايلاۋى قارساڭىندا سالىق ورگاندارى تاراپىنان قىسىم ۇدەگەنىن ايتىپ، شاعىمدانعان. قۇقىق قورعاۋشىلاردىڭ سوزىنە قاراعاندا، قازان مەن قاراشا ايلارىندا قازاقستان بويىنشا كەمىندە 13 ۇيىم «قارجى ەسەبىنىڭ دۇرىس تولتىرماعانى» جايلى ەسكەرتۋ قاعاز العان. ولار سالىق ورگاندارى «نەگىزسىز ەسكەرتۋ جاساپ وتىر» دەپ سانايدى.

سايلاۋ قارساڭىندا تەكسەرۋلەر مەن ەسكەرتۋلەردىڭ جيىلەۋىن العا تارتقان حالىقارالىق ۇيىمدار بيلىك وسىلايشا تاۋەلسىز ۇيىمداردى قورقىتىپ، بەلگىلى ءبىر ۋاقىت ارالىعىندا ارەكەتىنە شەكتەۋ قويعىسى كەلەدى دەپ ەرىكسىز تۇجىرىم جاساۋعا ءماجبۇرمىز دەيدى.

«مۇنداي ارەكەتتەردى ازاماتتىق قوعامعا شابۋىل دەپ باعالاۋعا بولادى. بۇل 2021 جىلى 10 قاڭتاردا ءوتۋى ءتيىس پارلامەنت سايلاۋى قارساڭىندا قوعامدىق باقىلاۋ كۇشەيەدى دەگەن «قاۋىپتەن» تۋىنداۋى مۇمكىن» دەلىنگەن مالىمدەمەدە.

وسىعان دەيىن بىرقاتار ۇكىمەتتىك ەمەس ۇيىمدار مەن بىرلەستىكتەر پارلامەنت سايلاۋىن باقىلايتىنىن حابارلاعان.

«قازاقستان بيلىگى ازاماتتىق قوعامنان شىققان تاۋەلسىز توپتارعا نەگىزسىز ەسكەرتۋ جاساۋىن دەرەۋ توقتاتۋى ءتيىس جانە ادام قۇقىعى سالاسىندا العان حالىقارالىق مىندەتتەمەلەرىن ورىنداۋى ءتيىس»، دەلىنگەن حابارلامادا.

«قازاقستان بيلىگىنىڭ قۇقىق قورعاۋشىلار مەن قۇقىق قورعاۋ توپتارىنىڭ جۇمىسىنا كەدەرگى كەلتىرمەي، كەرىسىنشە قۇرمەتتەپ، كومەكتەسۋى وتە ماڭىزدى»، دەدى International Partnership for Human Rights ۇيىمىنىڭ ديرەكتورى بريدجيت ديۋفۋر.

قۇقىق قورعاۋشىلاردىڭ ايتۋىنشا، قازاقستاندا سوڭعى بىرنەشە جىلدا ۇكىمەتتىك ەمەس ۇيىمداردىڭ ارەكەتىن شەكتەپ، مەملەكەتكە قارجىلىق ەسەپ بەرۋگە مىندەتتەيتىن تۇزەتۋلەر كۇشىنە ەنگەن. حالىقارالىق ۇيىمدار قازاقستان بيلىگىن سالىق تەكسەرۋلەرىن العا تارتىپ، قۇقىق قورعاۋ توپتارىنا قىسىم جاسايدى دەپ مالىمدەگەن.

Abai.kz