قاراشا ايىنىڭ باسىندا ورتالىق سايلاۋ كوميسسياسى ءماجىلىس پەن ءماسليحاتتار سايلاۋىنا قاتىسۋعا جىبەرىلگەن التى پارتيانى جاريالادى.

ءبىر ايدىڭ ىشىندە بارلىق پارتيالار وزدەرىنىڭ سەزدەرىن وتكىزدى. 2020 جىلدىڭ 5 قاراشاسىندا «بىرلىك» پارتياسىنىڭ ساياسي كەڭەسى ءوزىنىڭ اتاۋىن وزگەرتۋ تۋرالى شەشىم قابىلدادى. پارتيانىڭ جاڭا اتاۋى - «Adal». 2020 جىلدىڭ 11 قاراشاسىندا قازاقستان كوممۋنيستىك حالىق پارتياسىنىڭ XV كەزەكتەن تىس سەزىندە پارتيانىڭ رەبرەندينگى جاريالاندى – «قازاقستان كوممۋنيستىك حالىق پارتياسى» اتاۋىن «قازاقستاننىڭ حالىق پارتياسى» دەپ وزگەرتۋ تۋرالى شەشىم قابىلداندى. 18 جانە 25 قاراشادا «اۋىل» جانە «Nur Otan» پارتيالارى وزدەرىنىڭ سەزدەرىن وتكىزدى. 2020 جىلعى 27 قاراشادا جالپىۇلتتىق سوتسيال-دەموكراتيالىق پارتيا (جسدپ) سايلاۋعا قاتىسپايتىنى تۋرالى شەشىمىن جاريالادى.

جسدپ سەزىنەن كەيىن سايلاۋ پروتسەسىنە قاتىسۋشى پارتيالار سانى بەسەۋ بولدى: «اق جول» دەموكراتيالىق پارتياسى، «اۋىل» حالىقتىق-دەموكراتيالىق پارتياسى، «Adal» پارتياسى، «قازاقستاننىڭ حالىقتىق پارتياسى»، «Nur Otan» پارتياسى.

«قوعامدىق پىكىر» زەرتتەۋ ينستيتۋتى پارتيالىق رەيتينگتەردىڭ كەزەكتى ءبولىمىن ۇسىنادى. ساۋالناما ينستيتۋتتىڭ جەكە قاراجاتىنا 2020 جىلدىڭ جەلتوقسان ايىنىڭ ءبىرىنشى اپتاسىندا سۇحبات تۇرىندە (face-to-face) وتكىزىلدى، رەپرەزەنتاتيۆتى ىرىكتەمە بويىنشا 1200 رەسپوندەنتكە ساۋالناما جۇرگىزىلدى، قاتەلىك +/- 2,82%-دى قۇرادى. زەرتتەۋ گەوگرافياسى: قازاقستان رەسپۋبليكاسىنىڭ 14 وبلىسى، نۇر-سۇلتان، الماتى، شىمكەنت قالالارى.

«ەگەر سايلاۋ جاقىن جەكسەنبىدە وتەتىن بولسا، وندا ءسىز قاي ساياسي پارتياعا داۋىس بەرەتىن ەدىڭىز?» سۇراعىنا رەسپوندەنتتەر كەلەسى جاۋاپ نۇسقالارىن بەردى: «Nur Otan» - 72,5%، «اۋىل» - 6,0%، «اق جول» - 5,5%، «قحپ» - 4,7%، «Adal» - 2,5%. رەسپوندەنتتەردىڭ 8,8%-ى جاۋاپ بەرۋگە قينالدى.

پارلامەنت ءماجىلىسىنىڭ سايلاۋىنا ءبىر اي قالدى. 10 قاڭتاردان باستاپ پارتيالار حالىق اراسىندا ۇگىت-ناسيحات جۇمىستارىن بەلسەندى جۇرگىزە باستايدى، وسىلايشا الداعى اي شەشۋشى بولادى. سايلاۋ قارساڭىندا وتكىزىلەتىن ساۋالناما ناتيجەلەرىن قاڭتاردىڭ باسىندا جاريالايمىز.

اينۋر ماجيتوۆا، 

«قوعامدىق پىكىر» زەرتتەۋ ينستيتۋتىنىڭ ديرەكتورى،
الەۋمەتتىك عىلىمدار ماگيسترى

Abai.kz