زاڭ بويىنشا، پەنتاگون باسشىسى قىزمەتىنە تاعايىندالاتىن ادام وتستاۆكادا كەمىندە 7 جىل بولۋى ءتيىس. 67 جاستاعى وستين زەينەتكە 2016 جىلى شىققان. سول سەبەپتى بۇل قىزمەتكە وتىرۋ ءۇشىن ونىڭ كانديداتۋراسىن كونگرەستىڭ قوس پالاتاسى ماقۇلداۋى كەرەك. قورعانىس مينيسترلىگىن 2017-2019 جىلدارى باسقارعان دجەيمس مەتتيس تە پەنتاگون جەتەكشىسى بولار الدىندا كونگرەستەن رۇقسات سۇراعان ەدى.

امەريكا اقپارات قۇرالدارى ءوستيندى "كوپشىلىك كوزىنە تۇسۋدەن قاشقاقتايتىن ادام" دەپ سيپاتتايدى. ول 2013-2016 جىلدارى اقش-تىڭ تاياۋ شىعىستاعى اسكەرىن باقىلايتىن ورتالىق قارۋلى كۇشتەر باسقارماسىنىڭ جەتەكشىسى قىزمەتىن اتقارعان.

ءوستيندى "امەريكاعا قاجەت ادام" دەپ سيپاتتاعان بايدەن ونىڭ كانديداتۋراسىن تەزىرەك ماقۇلداۋعا شاقىردى.

سىنشىلار جاقىندا عانا وتستاۆكاعا كەتكەن گەنەرالدى پەنتاگون باسشىسى ەتىپ تاعايىنداۋدى ورىنسىز شەشىم دەپ سانايدى.

بايدەن الداعى ۋاقىتتا امەريكا قوعامىنىڭ شىنايى بەينەسىن كورسەتەتىن كابينەتتى تانىستىرۋعا ۋادە ەتتى. قارجى مينيسترلىگىنىڭ حاتشىسى قىزمەتىنە العاش رەت ايەل ادام - دجانەت يەللەن تاعايىندالماق.

Abai.kz