قحر-نان جۇك تاسىمالداۋمەن اينالىساتىن ازاماتتار باقىلاۋ-وتكىزۋ پۋنكتىنە ەلەكتروندى كەزەك جۇيەسىندە تىركەلمەي كىرۋ مۇمكىندىگى ءۇشىن شەكارالاس ايماقتاعى جاعدايدى ۋشىقتىرۋعا تىرىسۋدا، بۇل رەسپۋبليكالىق ماڭىزى بار اۆتوموبيل جولىندا كولىكتىك كوللاپس جاساۋ ارقىلى كورىنىس تاپتى. بۇل تۋرالى قر قم مەملەكەتتىك كىرىستەر كوميتەتىنىڭ ءباسپاسوز قىزمەتى حابارلادى.

مكك مۇنداي ازاماتتاردى شەكارادان وتكىزۋ، ونىڭ ىشىندە ەلەكتروندى كەزەك جۇيەسى شەڭبەرىندە تاۋارلاردى وتكىزۋدىڭ بەلگىلەنگەن ءتارتىبىن ساقتاۋعا شاقىرادى.

ەسكە سالا كەتەيىك، باقىلاۋ-وتكىزۋ پۋنكتىنە كەلۋدى رەتتەۋ ءۇشىن پروتسەستىڭ اشىقتىعىن جانە شىعىنداردىڭ تومەندەۋىن قامتاماسىز ەتەتىن ەلەكتروندى كەزەك جۇيەسى ەنگىزىلگەن بولاتىن. ەندى كەزەكتى الدىن-الا GoCargo.kz ۆەب-سايتىندا نەمەسە ءموبيلدى قوسىمشا ارقىلى برونداۋعا بولادى. جۇيەدە «كەرى بايلانىس» سىلتەمەسى بار، تاسىمالداۋشىلاردى SMS حابارلامالارى ارقىلى حاباردار ەتەدى.

جۇيەدە تىركەلگەن كولىك قۇرالدارىنىڭ بارلىق ءتىزىمىن، سونداي-اق اعىمداعى كۇنى شەكارادان ءوتۋدى كۇتكەن كولىك قۇرالدارى (اتس) تۋرالى مالىمەتتەر كورسەتىلەدى. 

ەلەكتروندىق كەزەك شتاتتىق رەجيمدە جۇمىس ىستەۋدە. جالپى، اعىمداعى جىلدىڭ 23 قازانىنان باستاپ، وسى ۋاقىتقا دەيىن ەلەكتروندى كەزەك جۇيەسى ارقىلى باقىلاۋ بەكەتىنەن 1069 اكق وتكەن، تاۋلىگىنە ورتا ەسەپپەن 23 اكق.

بۇرىن حابارلانعانداي، پاندەميا باستالعاننان بەرى قىتاي قازاقستاننان كولىكتەردى كىرگىزۋگە شەكتەۋلەر ەنگىزدى.

كۇندەلىكتى قازاقستاندىق تاراپتان 20-دان كوپ ەمەس اكق قابىلداندى. كەپتەلىس كۇشەيە ءتۇسىپ، «نۇر جولى» باقىلاۋ-وتكىزۋ بەكەتىندەگى كەزەك 40 شاقىرىمنان اسىپ جىعىلدى. 

كەپتەلىس باستالعاننان بەرى بىرقاتار شۇعىل شارالار قابىلداندى. كەلىسسوزدەر قىتايدىڭ ورتالىق مەملەكەتتىك ورگاندارى دەڭگەيىندە دە، قىتايدىڭ شۇاا اكىمشىلىگى دەڭگەيىندە دە وتكىزىلدى.

رەسپۋبليكادا ەنگىزىلگەن توتەنشە جاعدايعا بايلانىستى جابىلعان قىتايمەن وتكىزۋ پۋنكتتەرى اشىلدى.

قىتاي تاراپىنىڭ ەپيدەميولوگيالىق قاۋىپسىزدىكتى قامتاماسىز ەتۋ تۋرالى قورقىنىشىن ەسكەرە وتىرىپ، جۇكتەردى قازاقستاندىق كولىك-لوگيستيكالىق ورتالىققا ىشكى كولىككە ءارى قاراي قايتا تيەۋ جانە ولاردىڭ باراتىن جەرىنە قاراي جەتكىزۋ ارقىلى كونتاكتىسىز مەحانيزمدى ەنگىزۋ تۋرالى قر ۇكىمەتى دەڭگەيىندە ءتيىستى شەشىم قابىلداندى.

بۇل شارالار، سونىڭ ىشىندە جۇكتەردى كونتاكتىسىز تاسىمالداۋ مەحانيزمىن ەنگىزۋ، قىتاي قابىلداعان كولىكتەردىڭ سانىن كوبەيتۋگە مۇمكىندىك بەردى. 

سونىمەن بىرگە، اعىمداعى جىلدىڭ 10 قاراشاسىنان باستاپ قىتاي تاراپى قازاقستاندىق تاراپتان كولىكتەردى قابىلداۋدى شەكتەدى، ال ەكسپورتتىق تاۋارلار قابىلدانبايدى.

قابىلدانعان اكق سانىنىڭ تومەندەۋ سەبەپتەرى، سونداي-اق قىتاي تاراپىنان ەكسپورتتىق تاۋارلاردىڭ قوزعالىسىنا تىيىم سالۋ تۋرالى رەسمي اقپارات بولعان جوق.

قازاقستان رەسپۋبليكاسىنىڭ مەملەكەتتىك ورگاندارى، سونىڭ ىشىندە قازاقستاننىڭ قىتايداعى ەلشىلىگى قىتايلىق تاراپپەن تاۋارلار مەن كولىك قۇرالدارىنىڭ وتكىزۋ پۋنكتتەرىنەن ءوتۋىن ارتتىرۋ بويىنشا كەلىسسوزدەردى جالعاستىرۋدا.

Abai.kz