قازاقستان قاراشىعاناق كونسورتسيۋمىنان وتەماقى الدى. بۇل تۋرالى ەنەرگەتيكا مينيسترلىگى مالىمدەدى.

"ەنەرگەتيكا مينيسترلىگى، قر قارجى مينيسترلىگى جانە وكىلەتتى ورگان – PSA جشس ارقىلى ارەكەت ەتكەن قازاقستان رەسپۋبليكاسىنىڭ ۇكىمەتى، سونداي-اق قاراشىعاناق جوباسىنىڭ اكتسيونەرلەرى – ەني، شەلل، شەۆرون، لۋكويل كومپانيالارى داۋدى شەشۋدى اياقتاۋ جونىندە كەلىسىمگە قول قويدى", - دەلىنگەن حابارلامادا.

وسىلايشا كونسورتسيۋم قازاقستان رەسپۋبليكاسىنا 1 ميلليارد 305 ميلليون اقش دوللارى كولەمىندە تولەم جاسادى.

سونىمەن قاتار، تاراپتار ءونىم ءبولۋدىڭ تۇپكىلىكتى ادىستەمەسىن كەلىستى، ناتيجەسىندە: قازاقستان 2037 جىلعا دەيىن قوسىمشا 600 ميلليون اقش دوللارىن الادى (مۇناي باعاسى 1 باررەل ءۇشىن 40-50 اقش دوللارى بولعان كەزدە).

ايتا كەتەيىك، قاراشىعاناق جوباسى قازاقستان رەسپۋبليكاسىنىڭ ۇكىمەتى، شەلل، ەني، شەۆرون ، لۋكويل شەتەلدىك كومپانيالار اليانسى جانە قازمۇنايگاز اراسىندا جاسالعان ءونىمدى ءبولۋ تۋرالى تۇپكىلىكتى كەلىسىم شەڭبەرىندە ىسكە اسىرىلادى.

2015 جىلى رەسپۋبليكا كونسورتسيۋمنىڭ پايدانى بولۋىمەن جانە ادىستەمە بويىنشا ەسەپتەۋلەرىمەن كەلىسپەيتىنىن بىلدىرگەن بولاتىن. وسى كوممەرتسيالىق كەلىسپەۋشىلىك ناتيجەسىندە قازاقستان ءونىمدى ءبولۋ تۋرالى تۇپكىلىكتى كەلىسىمنىڭ تالاپتارىنا سايكەس حالىقارالىق تورەلىككە جۇگىندى. تورەلىك پروتسەسى ءجۇرىپ جاتقان كەزدە ۇكىمەت پەن كونسورتسيۋم ءوزارا قولايلى شەشىم تابۋ جانە كەلىسپەۋشىلىكتەردى شەشۋ ءۇشىن كەلىسسوزدەر جۇرگىزىپ جاتقان ەدى.

Abai.kz