تاۋەلسىزدىك كۇنى مەرەكەسى قارساڭىندا قازاقستان رەسپۋبليكاسى پرەزيدەنتىنىڭ جارلىعىمەن بەلگىلى عالىمدار، مادەنيەت جانە ادەبيەت قايراتكەرلەرى، وندىرىستىك سالا وكىلدەرىنىڭ ەڭبەكتەرى «قۇرمەت» وردەنىمەن باعالاندى.

ولاردىڭ قاتارىندا جازۋشى، ماحمۇد قاشقاري اتىنداعى سىيلىقتىڭ يەگەرى، Abai.kz اقپاراتتىق پورتالىنىڭ قۇرۋشىسى، «اباي-اقپارات» قازاق ينتەرنەت كەڭىستىگىن دامىتۋ قورى» قق پرەزيدەنتى، «قازاق ادەبيەتى» گازەتىنىڭ باس رەداكتورى داۋرەن قۋات تا بار. 

داۋرەن قاسەنۇلىن «قۇرمەت» وردەنىن الۋىمەن قۇتتىقتاي وتىرىپ، جازۋشى، جۋرناليست ساكەن سىبانبايدىڭ مىنا ءبىر جازباسىن وقىرمان نازارىنا ۇسىنامىز. 

ءبىزدىڭ «قۇرمەت»-ءتى داۋرەن

«قازاق ادەبيەتى» گازەتىنىڭ باس رەداكتورى، جازۋشى، جۋرناليست داۋرەن قۋات «قۇرمەت» وردەنىمەن ماراپاتتالدى!

داۋرەننىڭ قانداي قۇرمەتكە دە لايىق بەينەتقور، ىسكەر، العىر ازامات ەكەنىن، ءوز ءىسىنىڭ كاسىبي شەبەرى، ناعىز مايتالمانى ەكەنىن ەل جاقسى بىلەدى. جۋرناليستيكاعا وزىندىك بولەك قولتاڭباسىمەن، دارا ۇنىمەن كەلگەن ول ءا دەگەننەن-اق ساياسي-الەۋمەتتىك ماقالانىڭ ءوزىن قازاقتىڭ شۇرايلى تىلىمەن شىرايىن كەلتىرە جازاتىن ءارى كوركەم، ءارى ويناقى، جاتىق ستيلىمەن ەرەكشەلەنگەن ەدى. كەيىن كەلە داۋرەننىڭ وسى جۇردەك قالامىنىڭ ۇشىنا ۇيىعان قۇنارلى ءسوز مايەگى ونىڭ شىعارماشىلىق قيالىن شارىقتاتىپ، جازۋشىلىق قىرىن اشتى. «قورعاسىن ءارىپتىڭ ۋىن جۇتا» ءجۇرىپ (س.بەردىقۇلوۆ) جاستايىنان شىڭدالعان ونىڭ گازەتتى وقىلىمدى دا تارتىمدى ەتىپ شىعارۋدىڭ ءتۇرلى ءادىسىن يگەرگەنى سونشا، كەزىندە ءوزى باسقارعان «التىن وردا»، «جاس قازاق»، ەندى، مىنە، بۇگىنگى «قازاق ادەبيەتى» باسىلىمدارى وقىرمان ىزدەپ وقيتىن گازەتكە اينالدى.

2009 جىلى «جاس قازاقتان» كەتكەننەن كەيىن داۋرەننىڭ بىرەر اي تىم-تىرىس قالعانى راس. بىراق ول قاراپ جاتۋشى ما ەدى، جاڭا ءداۋىردىڭ تالابىن ەسكەرىپ، الدا عالامتور زامانى كەلە جاتقانىن باعامداپ، تىڭ جوبالار ويلاپ جاتىپتى. كوپ ۇزاماي «abai.kz» اتتى قازاق تىلىندەگى تۇڭعىش اقپاراتتىق-ساراپتامالىق پورتالدى جارق ەتكىزدى! سول «اباي. كز» بۇگىندە ۇلكەن اقپاراتتىق كۇشكە اينالدى، ينتەرنەت كەڭىستىگىندە قازاقشا كونتەنتتىڭ مولايۋىنا وراسان زور ۇلەس قوستى. ءالى دە قوسىپ كەلەدى.

داۋرەن دوسىمىز شىعارماشىلىق جۇمىسپەن شەكتەلىپ قالماي، ەندى ەلدىڭ الەۋمەتتىك-ساياسي ومىرىنە دە ارالاسىپ كورمەككە بەل بۋىپتى. حالىقتىق-دەموكراتيالىق ءھام پاتريوتتىق «اۋىل» پارتياسىنىڭ اتىنان پارلامەنت ءماجىلىسىنىڭ دەپۋتاتتىعىنا ءتۇسىپ، «تاۋەكەل» دەپ، باق سىناپ وتىرعان جايى بار. اۋىلدىڭ قامىن ويلاۋ - قازاقتىڭ قامىن ويلاۋ دەگەن ءسوز. جاساندى تولەرانتتىلىقتى، اسىرەساقتىقتى، جالتاقتىقتى جيىپ قويىپ، پارلامەنت مىنبەرىنەن قازاقتىڭ مۇددەسىن اشىق قورعاپ، ۇلتتىڭ ءسوزىن سويلەيتىن ادامدار قازىر بىزگە وتە قاجەت. ۇلت كوسەمى ءاليحان بوكەيحاندى ءپىر تۇتاتىن داۋرەن قۋات - سونداي ازاماتتىڭ ءبىرى دەپ بىلەمىن.

ماراپاتىڭ دا، قادامىڭ دا قۇتتى بولسىن، اعاي!

ساكەن سىبانباي

Abai.kz