الماتىدا «نامىس» جاستار قوزعالىسىنىڭ بەلسەندىلەرى تاۋەلسىزدىك الاڭىنا بارىپ، جەلتوقسان قۇرباندارىنىڭ رۋحىنا تاعزىم ەتتى. 

ۇيىم بەلسەندىلەرى شەيىت كەتكەن بوزداقتارعا قۇران باعىشتادى. سونىمەن بىرگە قازاقستان تەرريتورياسىنا كوز الارتقان رەسەيلىك ساياساتكەرلەردىڭ مالىمدەمەسىنە قاتىستى پىكىر ءبىلدىردى.

«جيرينوۆسكي، نيكونوۆ، ليمونوۆ سىندى دارىنسىز ساياساتكەرلەر بۇلىك شىعارعىسى كەلىپ، وزدەرىنىڭ ساۋاتسىزدىعىن كورسەتتى. قازاقتىڭ نامىسىنا ءتيىپ سايقىمازاق بولدى. ولار كىتاپ بەتىن اشىپ، از دا بولسا تاريحقا ۇڭىلسە كىمنىڭ كىم ەكەنىن بىلەتىن ەدى. قازاقتىڭ نامىستى جاستارى باردا ولاردىڭ كوزدەگەنى بولا قويمايدى»، – دەدى قوزعالىس باسشىسى ازامات جولدانباي.

وسى رەتتە قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆقا ءۇن قاتقان ۇيىم بەلسەندىلەرى بيلىككە شارت قويدى. ولاردىڭ اتاپ وتكەنىندەي رەسەيلىك ساياساتكەرسىماقتاردىڭ ساۋاتسىز مالىمدەمەسىن جاۋاپسىز قالدىرۋعا بولمايدى.

جاستار «رەسەي يمپەرياسىنان قالعان پاۆلودار، پەتروپاۆل دەگەن اتاۋلار جويىلىپ، قالالارعا قازاقي اتاۋ بەرىلۋىن» تالاپ ەتتى.

«ولار تاريحتى زەرتتەپ، وقىپ، وي تۇيگەنى ابزال. تاريح بەتتەرىنە ۇڭىلسەك رەسەي تۇگىلى، شەكارالاس ەلدەردە قازاقتار، ياعني، ءبىزدىڭ اتا-بابالارىمىز ءومىر سۇرگەن، قازاقي اتاۋ ارقالايتىن قالالار كوپ. بۇل اقيقات!

وسى رەتتە قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆقا ۇندەۋ. وسىنداي سايقىمازاق ساياساتكەرلەردىڭ تىرلىكتەرىنە قاشانعى بەيجاي وتىرا بەرەسىزدەر؟ سوزبەن ەمەس، قاعازبەن ەمەس، ىسپەن دالەلدەيتىن كەز كەلدى عوي.

قازاقتار قىزىلجار جانە ەرتىس دەگەن اتاۋدى پايدالانعان. سول اتاۋلار قايتارىلسىن», – دەدى «نامىس» جاستار قوزعالىسىنىڭ بەلسەندىلەرى.

جاستار بۇل تالاپ ورىندالماسا سولتۇستىك قازاقستانعا بارىپ ميتينگ وتكىزەتىندەرىن ايتتى.

ۆيدەو: «nege.kz»

Abai.kz