قر قورعانىس مينيسترلىگى كادر جانە اسكەري ءبىلىم دەپارتامەنتىنىڭ بۇرىنعى باستىعى گەنەرال-مايور قايرات كوپباەۆ پارا العانى ءۇشىن سوتتالدى. بۇل تۋرالى ANTIKOR News مالىمدەدى. 

سىبايلاس جەمقورلىققا قارسى قىزمەت پارا الۋ فاكتىسى بويىنشا قر قورعانىس مينيسترلىگى كادر دەپارتامەنتىنىڭ (بۇدان ءارى – قر قم) بۇرىنعى باستىعى گەنەرال-مايور قايرات كوپباەۆقا قاتىستى قىلمىستىق ءىستى اياقتادى.

«2019 جىلدىڭ مامىر ايىندا كوپباەۆتىڭ اقتوبە ق. «ت.بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتى» رمم-نە وفيتسەرلىك لاۋازىمعا تاعايىنداعانى ءۇشىن 200 مىڭ تەڭگە سوماسىندا پارا العانى انىقتالدى.

اقمولا گارنيزونى اسكەري سوتىنىڭ ۇكىمىمەن كوپباەۆ مەملەكەتتىك قىزمەتتە لاۋازىم اتقارۋ قۇقىعىنان ءومىر بويىنا ايىرا وتىرىپ، 5 جىلعا باس بوستاندىعىنان ايىرىلدى»،- دەلىنگەن حابارلامادا.

سونىمەن بىرگە، سوت قازاقستان رەسپۋبليكاسى پرەزيدەنتىنىڭ اتىنا كوپباەۆتى گەنەرال-مايور اسكەري اتاعىنان جانە «قۇرمەت» وردەنىنەن ايىرۋ تۋرالى ۇسىنىس ەنگىزەدى.

Abai.kz