10 قاڭتاردا بولاتىن ءماجىلىس پەن بارلىق دەڭگەيدەگى ءماسليحاتتاردىڭ سايلاۋىنا قاتىساتىن ساياسي پارتيالار ەل اۋماعىندا ۇگىت-ناسيحات جۇمىستارىن جۇرگىزىپ جاتىر. بۇگىن ماڭعىستاۋ وبلىسىندا Nur Otan توراعاسىنىڭ ءبىرىنشى ورىنباسارى باۋىرجان بايبەك پەن قازاقستاننىڭ ەڭبەك سىڭىرگەن قايراتكەرى تۇرسىنبەك قاباتوۆ جاستارمەن كەزدەسىپ، ولاردى ۇلتجاندى جانە قوعامدا بەلسەندى بولۋعا شاقىردى.

ساتيريك تۇرسىنبەك قاباتوۆ قازاق قوعامىندا ءبىرىن-ءبىرى ءجون-جوسىقسىز سىناۋشىلاردىڭ بارىنا ناليتىنىن ايتتى.

«قازاقتار ءۇي سالعاندا ەشكىم كەلىپ كومەكتەسپەيدى، سالىپ بولعان سوڭ عانا سىناۋشىلار كوبەيەدى. شاتىرىن تەمىرمەن جابۋ كەرەك ەدى، ەسىگىن ارعى جاقتان شىعارۋ كەرەك ەدى دەپ سىناپ كەتەدى. بىراق، سولاردى ءۇي سالىپ جاتقان كەزدە تاپپايسىڭ. سول سەكىلدى ەلباسى توقسانىنشى جىلدارى مەملەكەتتى اياققا تۇرعىزىپ جاتقاندا وعان كومەكتەسكەندەر از بولدى. ەندى شەكارانى بەكىتىپ بەرگەن سوڭ ەسىگىن باسقا جاقتان شىعارۋ كەرەك ەدى دەيتىندەر كوبەيدى»، - دەيدى ت.قاباتوۆ.

ول جاستاردى ءبىر كۇندىك ءومىر ءۇشىن ەمەس، ەل بولاشاعى ءۇشىن ايانباي ەڭبەك ەتۋگە شاقىردى.

«قازىر جاستاردىڭ اراسىندا ءومىردىڭ ءمانىن تاماق ءىشىپ، كيىم كيىپ، جۇرگەن-تۇرعانىڭدى الەۋمەتتىك جەلىگە جۇكتەۋمەن شاتاستىراتىندار كوپ. كەشكە ۇيگە كەلەدى دە، ۇلكەن جۇمىس تىندىرعانداي وتىرادى. ال، سىزدەر ەلدەگى وسىنداي ۇلكەن ءىس-شارالارعا قازىردەن ارالاسىپ جاتىرسىزدار. مۇنىڭ ءبارى ەلدىڭ بولاشاعى ءۇشىن»، - دەپ بەلسەندى جاستاردى قاناتتاندىردى.

ونىڭ پىكىرىنشە، قازاقستاندا جۇمىس ىستەيمىن دەگەن كەز كەلگەن ادامنىڭ ەكى قولىنا ءبىر كۇرەك تابىلادى. ال، جالقاۋ ادامنىڭ الدىنا جۇمىستى دايىنداپ اراساڭ دا ىستەمەيدى دەيدى قاباتوۆ.

«قازىر ەلدىڭ بولاشاعىنا سەنبەيتىن جاستار بار. ەلدىڭ بولاشاعىنا سەنبەيتىن ادام – وزىنە سەنبەيتىن ادام. سىزدەردىڭ وسىلاي بولاشاققا سەنىم ارتقاندارىڭىز قۋانتادى. جۇرەگىمىز وتان دەپ تۇرسىن»، - دەپ ءسوزىن ءتۇيدى تۇرسىنبەك قاباتوۆ.

تۇپنۇسقا: azattyq-ruhy.kz

Abai.kz