بۇگىن پارلامەنت ءماجىلىسىنىڭ جالپى وتىرىسىندا دەپۋتاتتار مەملەكەتتىك ساتىپ الۋ ماسەلەلەرى تۋرالى زاڭ جوباسىن ماقۇلدادى.

وسىعان وراي، ءماجىلىس توراعاسى نۇرلان نىعماتۋلين زاڭعا ەنگىزىلگەن نورمالار مەملەكەتتىك ساتىپ الۋدىڭ تيىمدىلىگىن ارتتىرۋعا، ەڭ باستىسى، سىبايلاس جەمقورلىقتى تومەندەتەتىنىن ايتتى.

سونداي-اق، نۇرلان نىعماتۋلين مەملەكەتتىك ساتىپ الۋ سالاسىندا باسشىلاردىڭ قىزمەتىن مىندەتتى رەيتينگتىك باعالاۋ زاڭ دەڭگەيىندە بەكىتىلەتىنىنە نازار اۋداردى. ول ەڭ الدىمەن، مەملەكەت مۇددەسىن ساقتاي وتىرىپ، اشىق جۇمىس ىستەۋگە جول اشادى.

ايتا كەتۋ كەرەك، قولدانىستاعى زاڭدا جەتكىزۋشىلەرمەن تىكەلەي شارتتار جاساسۋ ارقىلى ءبىر كوزدەن ساتىپ الۋ ءۇشىن نەگىزدەر قاراستىرىلعان. بىراق، دەپۋتاتتار بۇل نورمالاردى تاپسىرىس بەرۋشىگە مەملەكەتتىك ساتىپ الۋدى ۇيىمداستىرۋدىڭ باسەكەلەستىك ادىستەرى تاۋسىلعان كەزدە عانا وسىنداي مۇمكىندىكتى پايدالانۋ تالابىمەن تولىقتىردى. بۇل تالاپتى ورىنداماعان مەملەكەتتىك ورگانداردىڭ باسشىلارى 100 ايلىق ەسەپتىك كورسەتكىش كولەمىندە اكىمشىلىك جاۋاپكەرشىلىككە تارتىلاتىن بولادى.

سونىمەن قاتار، مەملەكەتتىك ورگانداردىڭ ءبىرىنشى باسشىلارىن ادال جانە اشىق مەملەكەتتىك ساتىپ الۋلاردى وتكىزۋگە ىنتالاندىرۋ ءۇشىن دەپۋتاتتار ولاردىڭ قىزمەتى تيىمدىلىگىنىڭ نەگىزگى كورسەتكىشتەرىن ەنگىزۋ جولىن ۇسىندى. اتاپ ايتقاندا، ءبىر كوزدىڭ ۇلەسى، قۇقىق بۇزۋشىلىقتار سانى، قارجى قاراجاتىن ۇنەمدەۋ ۇلەسى، وتكىزىلمەگەن ساتىپ الۋ سانى، سونداي-اق كۇشى جويىلعان ساتىپ الۋ جانە ت. ب.

وسى رەتتە، ءماجىلىس توراعاسى رەيتينگتىك باعالاۋدى ەنگىزۋدىڭ، سونداي-اق وسى پروتسەستى اۆتوماتتاندىرۋ ماسەلەلەرىن پىسىقتاۋدىڭ ماڭىزدىلىعىنا نازار اۋدارىپ، باسەكەلەستىك جەتكىزۋشىلەر اراسىندا عانا ەمەس، تاپسىرىس بەرۋشى مەملەكەتتىك ورگاندار اراسىندا دا بولۋى كەرەك ەكەنىن اتاپ ءوتتى.

Abai.kz