ماجىلىستە قۇجاتتى تانىستىرعان سىرتقى ىستەر ءمينيسترى مۇحتار تىلەۋبەردى قازاقستان حاتتامانى تولىق راتيفيكاتسيالاعاننان كەيىن ءولىم جازاسىن قولدانباۋ مىندەتىن الادى دەدى. بىراق ءبىر جاعدايدا عانا قولدانۋى مۇمكىن.

"ەكىنشى فاكۋلتاتيۆتىك حاتتامانىڭ 2-بابىنا سايكەس، قازاقستان سوعىس ۋاقىتىندا جاسالعان اسكەري اۋىر قىلمىستار ءۇشىن كىنالى دەپ تانىلعاندارعا، سوعىس ۋاقىتىندا ءولىم جازاسىن قولدانۋ قۇقىعىن وزىنە قالدىرادى" دەدى مينيستر.

قىركۇيەك ايىندا قازاقستاننىڭ بۇۇ-داعى وكىلى قايرات وماروۆ سىرتقى ىستەر مينيسترلىگى "ازاماتتىق جانە ساياسي قۇقىقتار تۋرالى حالىقارالىق پاكتىنىڭ ءولىم جازاسىن جويۋعا باعىتتالعان ەكىنشى فاكۋلتاتيۆتىك حاتتاماسىنا قول قويدى" دەپ حابارلاعان ەدى. ۆەدومستۆونىڭ حابارلاۋىنشا، پارلامەنت قۇجاتتى تولىق راتيفيكاتسيالاپ، زاڭناماعا ارنايى تۇزەتۋ ەنگىزگەننەن كەيىن حاتتاما كۇشىنە ەنەدى.

قازىر قىلمىستىق كودەكستە 10-نان استام قىلمىس قۇرامى ("مەملەكەتكە وپاسىزدىق جاساۋ", "تەرروريزم", "سوعىس ۋاقىتىندا جاسالعان اۋىر قىلمىستار" جانە ت.ب) بويىنشا ءولىم جازاسىن قولدانۋ قاراستىرىلعان. قىلمىستىق كودەكستە ءبىرىنشى پرەزيدەنت نۇرسۇلتان نازارباەۆقا قاستاندىق جاساعانداردى دا ءولىم جازاسىنا كەسۋ قاراستىرىلعان.

قۇقىق قورعاۋشىلار بيلىكتى بىرنەشە رەت ءولىم جازاسىن الىپ تاستاۋعا شاقىرعان.

Abai.kz